OSEAS 6

1Tukuy jamuychej, Tata Diosman kutipunachej. Paymin phiriwarqanchej, jinapis Payllataj jampiwasunchej. Nanachiwarqanchej, Payllataj sanoyachiwasunchej. 2Iskay p'unchaymanta kawsayta qowasunchej, kinsa p'unchaymantaj wañusqamanta kawsarichiwasunchej, Paypa ñawpaqempi kawsananchejpaj. 3Atisqanchejta kallpachakunachej Tata Diosta rejsinanchejpaj. Payqa jamonqapuni noqanchejman, imaynatachus inteqa cheqamanta llojsimunampuni kashan, ajinata, chayrí imaynatachus paraqa jallp'ata qarpanampuni kashan tiempompi, ajinata. 4Tata Diosqa nin: Efraín, imatataj qanwan ruwasajri? Judá, qanwampis imatataj ruwasajri? Noqapaj munakuyniykichejqa tutamanta phuyu jinalla, chayrí tutamanta chinkaripoj chhulla jinalla. 5Chayrayku profetasniynejta chhikan chhikanta t'unarqaykichej, willachimusqaywantaj wañucherqaykichej. Justiciaytaj uj k'anchay jina llojsimun. 6Noqaqa munani munakunawaykichejta, manataj uywa wañuchisqasta jaywanallawaykichejtachu. Astawan munani Diosniykichejta jina rejsinawaykichejta, uywa wañuchisqa q'olachinasmanta nisqaqa. 7Aylloyqa Adán jinallataj trato ruwasqayta p'akinku wasanchawaspa. 8Galaad llajtaqa millayta ruwajkunaj tiyakunanku llajtamin, yawarta jich'asqasninkuwan ch'ichichasqa kashanku. 9Sacerdotesqa tukuyninku suwayman qokapunku, runasmanta suwanankupaj wateqallankupuni. Imaymanasta ruwaspa, wañuchinku runasta Sichem llajtaman rina ñampi. 10Israelpeqa rikuni manchay millay ch'ichi ruwaykunata. Efraínqa ujwantaj ujwantaj khuchichakorqa, Israelpis chay juchallawantaj ch'ichichakorqa. 11Qampajpis, Judá, ñapis nisqaña ima p'unchaypichus castigasqa kanaykeqa. Maypachachus Israel aylluyta preso apasqa kasqanmanta kutichikampuyta munarqani,

will be added

X\