OSEAS 5

1Sacerdotes, uyariychej kayta; allinta uyariychej, israelita runas; reypa familianmanta kajkunapis uyariychej: Qankunaj contraykichejpimin juicio kanqa, imaraykuchus Mizpapi uj misk'ana jina karqankichej, Tabor orqo patapi wakichisqa ch'ipa jinataj. 2Sitimpi may ukhu t'oqota allarqankichej runas chaypi urmaykunankupaj. Chayraykumin tukuyniykichejta castigasqaykichej. 3Noqa rejsini Efraintaqa: Payqa manamin uj mana rejsisqachu Noqapajqa. Efraínqa khuchichakorqa, Israelpis ch'ichichakullantaj. 4Runaspa tukuy millay ruwasqasninkoqa mana paykunata saqenchu Diosman kutirikojta. Khuchichakuypa atipasqan kaspa, Tata Diosta mana rejsinkuchu. 5Israelpa runaykachasqanqa uyallanmantaj laq'akamun; Efraínqa juchallampitaj misk'akun, Judapis paykunawan khuska misk'allanqataj. 6Ovejasnintin, wakasnintin Tata Diosta mask'aj jamonqanku, nitaj tarenqankuchu, imaraykuchus Tata Diosqa paykunamanta t'aqakaporqa. 7Tata Dioswan mana cheqantachu purerqanku; wawasninkoqa waj tatayoj karqanku. Chayrayku kunanqa uj killallapi jallp'asninkupis paykunapis chinkachisqa kanqanku. 8Gabaapi tocaychej maqanakuman wajyana putututa. Ramapitaj tocaychej cornetata. Bet-avenpeqa wakichisqa kachunku, Benjaminpipis kikillantaj. 9Efraínqa ch'inyachisqa kanqa, castigana p'unchay chayamojtin. Kay nisqayqa jinapuni kanqa Israel ayllus ukhupi. 10Tata Diosqa nin: Judamanta kurajkunaqa campospi mojonesta suchurichej runasman rijch'akunku. Paykunaj patankuman yakuta jina jich'aykusaj phiñakuyniytaqa. 11Efraínqa ñak'ariypi ñit'isqa kashan juicio atipasqataj, imaraykuchus manakaj lantisllata qhatej churakorqa. 12Chayrayku Efrainpajqa Noqa kasaj uj thuta jina, Judá ayllupajtaj sarru jina kasaj. 13Efraín onqosqa kasqanta rikukonqa, Judataj cuerpompi nanasqasninta rikukonqa. Efraínqa Asiriaman renqa jatun reypa yanapayninta mañakoj, chay reytajrí mana payta sanoyachiyta atenqachu, nitaj nanasqasnintapis jampiykuyta atenqachu. 14Imaynatachus uj león ima animaltapis oqoykunampaj phawaykun, ajinata Noqapis Efraínta, Judatawan ruwasaj; Noqa kikiy chhikan chhikanta t'isarpariytawan, ripusaj; Noqa jap'ejteyqa, mana pipis qhechuwayta atenqachu. 15Jinata ruwaytawankama, maypichus kanayman kutimpusaj, juchayoj kasqankuta reparakuspa willakunankukama, Noqata mask'anawankukamataj. Ñak'ariypi rikukuspa, Noqata mask'awanqankupuni.

will be added

X\