OSEAS 11

1Maypachachus Israel ayllu wawallaraj karqa chaypacha, Noqaqa payta munakoj kani, waway kasqanrayku; chayrayku Egiptomanta wajyakaporqani. 2Noqa payta astawan wajyashajtiy, astawan Noqamanta karunchakuwarqa. Aylloyqa uywa wañuchisqasta jaywarqa qhasi manakaj dioskunallaman, inciensostataj q'oshñicherqa lantisman. 3Chaywampis Efraínta makisninmanta jap'ispa, Noqaqa payta puriyta yachacherqani; paytajrí mana entienderqachu Noqamin payta waqaychaj kasqayta. 4Misk'i parlaywan sonqonta suwarqani, munakuywantaj waskhawan jina payta aysamorqani. Uyay chayman ñuñoj wawata jina astawan k'askaykuchikorqani, makiywantaj mikhucherqani. 5Chaywampis Efrainmanta kajkunaqa manapuni kutirimuwayta munarqankuchu. Chayraykumari Egiptoman kutirinanku kanqa, Asiriataj paykunata kamachenqa. 6Llajtasninkupi runas espadawan wañuchisqa kanqanku. Jark'achasqa wasisninkupis thuñisqa kanqa; imaymanasta wakichikusqankurayku phirisqa kanqanku. 7Israel aylloyqa Noqamanta karullapipuni kayta munan. Patapi kajman qhaparikunku nitaj pipis paykunata yanapanchu. 8Imaynallatataj saqesqayki, Efraín? Imaynatataj qonqarparisqayki Israel? Atiymanchu Adma llajtata jina phirisuyta, chayrí imaynatachus Zeboim llajtawan ruwarqani, ajinallatataj qanwampis ruwayta? Sonqoyqa wawayawan qampaj khuyakuywan junt'a kaspa. 9Mana phiñakuyniy k'ajarisqanman jinachu ruwasaj. Mana ujtawan Efraínta phirisajñachu, imaraykuchus Noqaqa Dios kani, manataj runachu. Noqamin Santo Kaj kani, chawpiykichejpi kashani chay, manataj phirejchu jamusaj. 10Paykunaqa Tata Diospa qhepanta renqanku. Tata Diosqa uj león jina qhaparenqa Paypa kajninkunataj inti yaykuy ladomanta kharkatitispa jamonqanku. 11P'isqos jina Egiptomanta kharkatitispa jamonqanku; Asiriamanta palomas jina jamonqanku. Jinamanta ujtawan wasisninkupi tiyakunankuta ruwasaj, nispa nin Tata Diosqa. 12Efraínqa llulleriosninwan muyuykuwan; Israel ayllupis ch'awkiriyusninwan muyuykuwan. Judatajrí Diosllawanraj kashan, Santo Kajwantaj cheqan sonqo kashan.

will be added

X\