HEBREOS 5

1Sapa kuraj kaj sacerdoteqa runas ukhumanta ajllasqa kaspa, churasqa kashan runaspa sutimpi ima ruwana kajta ruwanapaj. Payqa jaywanasta sutinkupi jaywan, jinallataj jucharayku uywa wañuchisqa q'olachinastapis. 2Mana yachajkunata, pantasqa kajkunatapis chay sacerdoteqa atin khuyayta, paypis pisi kallpawan p'achallisqa kasqanrayku. 3Ajina pisi kallpa kasqanrayku, paypa juchasninrayku uywa wañuchisqasta jaywan. Jinallatataj runaspa juchasninkuraykupis jaywanan tiyan. 4Mana pipis jatunchakuspa pay kikinta kuraj kaj sacerdote kanampaj churakunchu. Manachayqa Diospuni payta wajyanan tiyan, imaynatachus Aaronta wajyarqa, ajinata. 5Ajinata Cristopis mana jatunchakorqachu Pay kikin kuraj kaj sacerdote kanampaj churakuspa. Manachayrí Diospuni Payman nerqa: Qan Churiy kanki. Kunan yumarqayki, nispa. 6Wajnejpipis nillantaj: Qanqa wiñaypaj sacerdote kanki, Melquisedecpa t'aqanman jina, nispa. 7Jesusqa kay pachallapiraj kawsashaspa, qhapariywan, waqaywan mañakorqapuni Diosmanta, pichus atiyniyoj karqa wañuymanta salvanampaj, chaymanta. Jinataj tukuy sonqo k'umuykukusqanrayku Diosqa mañakusqanta uyarerqa. 8Diospa Churin kashaspapis, ñak'arisqanrayku kasukoj kayta yacharqa. 9Chaypaj jina allin wakichisqa kaspa, churasqa karqa Payta tukuy kasojkunaman wiñay kawsay salvacionta qonampaj. 10Diostaj Payta kuraj kaj sacerdoteta suticharqa, Melquisedecpa t'aqanman jina. 11Chaymantaqa ashkhataraj ninayku tiyan, chaytaj mana sut'inchay atina jinallachu. Qankunatajrí mana usqhayllata entiendeyta atinkichejchu. 12Unaymantapacha creesqaykichejrayku, yachachejkunaña kanaykichej karqa. Kunantajrí watejmanta yachachinaraj kankichej, Diospa Simi Nisqanmanta qallariy yachachinasta. Qankunaqa wawas jinaman kutispa, lechellapajraj kankichej, mana khamuna mikhunapajrajchu. 13Pichus lechellawanraj kawsajqa wawallaraj kasqanrayku, mana yachanchu imachus Diospa cheqan kaj yachachiynin kasqanta. 14Khamuna mikhuyrí wiñay tukusqa runaspajña. Paykunaqa sapa p'unchay ruwasqankurayku, yachasqa kanku reparanankupaj imachus allin, imatajchus mana allin kasqanta.

will be added

X\