1 Kayqa profeta Habacucpa Diosmanta mañakuynin. 2 Qanmanta uyarispa, ruwasqasniykimantapis yachaspa, mayta yupaychayki. Ñawpa tiempo ruwasqasniykita jina kunampis ruwallaytaj, chaywan noqaykupis chay ruwasqasniykita rejsinaykupaj. Ajinamanta, chay phiñakuyniykipi rikuchiwayku khuyakuyniykita. 3 Diosqa jamun Temán chaynejmanta; Parán orqomanta Santo Kaj Diosqa jamun. Jatun kaynenqa tukuy cielota junt'aykun, kay pachataj Payta jatunchaywan junt'a kashan. 4 Lliphipej k'anchaypi mayt'usqa jamun, makisninmantataj k'anchaykuna llojsimunku, rikuchispa, Paypi kashan, chay pakasqa jatun atiyninta. 5 Paypa ñawpaqenta chayamunku millay wañuchej onqoykuna, chay qhepantataj k'aja onqoywan wañuypis jamullantaj. 6 Jallp'aqa kharkatitin Pay sayarejtenqa; qhawajtimpis, naciones kharkatitinku. Chay ñawpa orqosqa urmaranku, chay unayniyoj orqospis pampachakunku. Diospa ñankunanrí wiñaypaj kanku. 7 Noqa rikuni Cusanmanta runasta ñak'ariypi urmasqata, Madianpi tiyakojkunatataj manchachikuywan k'umuykusqata. 8 Tata Dios, mayuspa contrankupichu phiñakunki? Mama qochajpa contrampichu phiñasqa kashanki? Chayraykuchu caballosniykiman lloq'aykunki, atipaj maqanakunapaj carretasniykimampis? 9 Flechana arcoyki ñapis wakichisqaña kashan, jinataj tukuy flechasnimpis oqharinapajpachaña. Mayusniykiwan pampapi wayq'osta khallanki. 10 Orqosqa kharkatitinku rikususpa, parapis patamanta imata jina jich'akamun; chantá mama qochapis qhollchoqeyasqanwan manchayta ch'ajwarin, chhika patasta oqharikuspa. 11 Intipis, jinataj killapis pakakunankumanta mana llojsimunkuchu, flechasniyki lliphipirisqanrayku, t'ojsina lanzaykej lliphipirisqanraykutaj. 12 Phiñakuyniykipi tukuy kay pachantinta purinki; nacionestapis phiñakuywan sarurparinki. 13 Qan llojsimunki aylluykita yanapaj, jinallataj ajllakusqayki reyta. Sajra runaj wasimpa techonta Qan phirerqanki, cimientontapis ura k'uchunkama rikhuricherqanki. 14 Wañucherqanki chay kurajninkuta flechasnillankuwantaj, maypachachus caballosninkupi lloq'asqa phinkiykorqanku sinch'i wayra jina manchay machu machus, kay mana jark'akuyta atejkunata pakayllamanta wañuchinankupaj chaypacha. 15 Caballosniykiwan mama qochasnejta purinki, chay phosoqeyashaj chhika jatuchaj qochasnejta. 16 Kay tukuy imasta uyarispa, manchachikorqani. Parlasqaypipis simiy kharkatiterqa; chakisniy mana sayayta aterqachu, tukuy cuerpoytaj llawch'iyaporqa. Chaywampis alliywan suyallasaj, maypachachus Dios chay ñak'arichiwajninchejpa soldadosninta ñak'ariyman churanqa, chay p'unchayta. 17 Chaypachamari kusiywan junt'a kasaj Salvawajniy Tata Diosrayku. Amapis higo sach'as t'ikachunkuchu, amapis uvas poqochunchu nitaj olivospis; amapis chajras poqochunkuchu, tropamanta ovejaspis tukukapuchunku, amañapis wakas kachunkuchu corralespi. Chay tukuywampis Tata Diosta yupaychasajpuni. 19 Tata Diosmin kallpata qowan; chakisniymampis qon kallpata, usqhay usqhayta taruka jina correnaypaj. Aswan patasninta purichiwan ama pipis imananawampaj.
