HABACUC 1

1Kay willaytaqa Tata Dios sut'incharqa profeta Habacucman. 2Tata Dios, mayk'ajkamataj Qanta qhaparikamuspa, yanapata mañakusaj, mana uyarichikuspa? Mayk'ajkamataj qhaparikamusqayki kallpaman atienekuspa sajrata ruwaykuna kasqanrayku, manataj Qan jamunkichu kacharichinawaykupaj? 3Imaraykutaj rikuchiwanki chay chhika ñak'ariyta, juchatapis? Millay ruwaykunawan, tukuchinakuywan ima muyurisqa kani; tukuynejpi phiñakuykuna tiyan, maqanakuykunapis. 4Mana leyman jinachu imapis ruwakun, nitaj pipajpis justicia kanchu. Sajra runaqa cheqan runata qhatiykachan chinkachiyta munaspa, justiciapis q'ewisqa. 5Qhawariychej muyuyniykichejpi kaj nacionesta. Qhawarispa, mayta t'ukuychej. Uj imata ruwanaypaj jina kashani; pi willarisojtiykichejpis mana creewajchejchu. 6Caldeosta wakichisaj wañuchinaku maqanakuman yaykunapaj jina kanankupaj. Paykuna may sajra rumi sonqo runas kanku. Kay pachata uj ladomanta uj ladoman correykachallankupuni, wajpa jallp'asninta dueñochakuspa. 7Manchay t'ukuna, mancharikunataj kanku. Paykunapajqa mana waj ley kanchu paykunajmanta nisqaqa. 8Caballosninkupis tigremantapis astawan t'ijurinku; ch'in pampapi jatun k'ita alqos jina lobos nisqamantapis aswan manchachikuna phiña animales kanku. Caballospi lloq'aj soldadosninkupis ashkhamanta, sinch'itataj t'ijonqanku, karumantapachataj wañuchinaku maqanakuman phinkiykunku, imaynatachus anka jap'ej imamampis phawaykun, jinata. 9Pasaj jinalla tukuy imata phiriranku; maymanchus risqankupi runasta kharkachinku. Mama qocha kantupi t'iyu chhikapuni preso jap'irasqanku runas kanku. 10Reyesmanta asiykukunku, jinallataj kamachej runasmantapis. Jatun perqaswan jark'achasqa llajtasmantapis asiykukullankutaj. Jallp'a qollusta ruwarikunku chay perqasta wasaykunankupaj, atipaykuytawantaj, llajtata jap'ikapunku. 11Jatun muyoj wayra jina pasanku; paykunaj diosninkoqa kallpallanku. 12Tata Dios, manachu Qanqa mana jayk'aj wañoj, wiñay wiñaypaj kawsaj santo kaj Diosniy kankiri? Waqaychawajniy Tata Dios, Qanmin caldeosman kallpata qorqanki makiykipi seq'ona vara jina kanankupaj. 13Qanqa may santopuni kasqaykirayku mana juchata qhawallaytapis atinkichu, nitaj sajra ruwayta aguantayta atinkichu. Imaynatataj ari qhawakullanki chay millay ruwajkunatari, ch'inllataj kanki sajra runas paykunamanta aswan allin runasta wañuchejtinkuri? 14Imaraykutaj runasta qhawanki mama qochapi challwas, chayrí mana kamachejniyoj pampa khuruspis kankuman jinata? 15Caldeosqa waj nacionesta jap'inku, imaynatachus challwa jap'ej runas challwata jap'iranku, ajinata. Anzueloswan, ch'ipaswantaj jap'ej rinku; chantá qollullata challwasta rikuspa, mayta kusirikunku. 16Chayraykumin challwa jap'ejkunaqa chay anzuelosninkuta, ch'ipasninkutapis yupaychanku, chayraykutaj jaywanasta jaywanku, inciensostapis q'oshñichinku, chaykunanejta ashkha mikhunayoj kasqankurayku. 17Ajinatachu caldeosqa ch'ipasninkuwan jap'irallawasqaykupuni? Runasta mana uj chhikanta khuyarispa wañuchillanqankupunichu?

will be added

X\