GÉNESIS 46

1Jinamanta Jacobqa purirerqa tukuy iman kajwan. Chayarqataj Beersebaman, chaypitaj uywa wañuchisqa q'olachinasta jaywarqa Isaac tatampa Diosninman. 2Chay ch'isi Israelman Dios parlarqa mosqoypi jina sutinmanta wajyaspa. Paytaj kuticherqa: Kaypi kashani, nispa. 3Chantá Dios payman nerqa: Noqa Dios kani, tataykej Diosnin. Ama Egiptoman riyta manchachikuychu; chaypi mirachisaj mirayniykita uj jatun nación kanampaj. 4Noqa qanwan Egiptoman urayk'usaj, noqallataj qhepaman mirayniykita orqhospa, kutichimusaj kayman. Chantapis wañojtiyki, Joseyki qayllaykipi kanqa. 5Chaymanta Jacobqa Beersebamanta rillarqapuni. Israelpa churisnenqa tatankuta, wawasninkuta, warmisninkuta ima Faraonpa apachimusqan carretasninman wicharicherqanku, paykunata Egiptoman pusarinankupaj. 6Jacobqa, pininchá tiyaporqa, chaykunawan riporqa Egiptoman. Chantapis apakaporqanku wakasninkuta, ovejasninkuta, imasninkuchá tiyaporqa Canaán jallp'api kashajtinku, chay imastawan. 7Tukuy churisnin, ususisnin, qhari kaj allchhisnin, warmi kaj allchhisnin ima riporqanku paywan. 8Kaykuna karqanku israelitaspa sutisninku Egiptoman ripojkunajta Jacobpa mirayninmanta: Jacobpa kuraj kaj churin Rubén. 9Rubenpa churisnin karqanku: Janoc, Falú, Hezrón, Carmi ima. 10Simeonpa churisnin karqanku: Jemuel, Jamín, Ohad, Jaquín, Zohar, Saúl ima, mayqenchus karqa cananea warmej churin, chay. 11Levijpa churisnin karqanku: Gersón, Coat, Merari ima. 12Judajpa churisnin karqanku: Er, Onán, Sela, Fares, Zara ima. Chaypacha Canaán jallp'api wañusqasña karqanku Erwan, Onanwan. Farespa churisnin karqanku Hezrón, Hamul ima. 13Isacarpa churisnin karqanku: Tola, Fúa, Job, Simrón ima. 14Zabulonpa churisnin karqanku: Sered, Elón, Jahleel ima. 15Chaykuna karqanku Leaj churisnin, mayqenkunatachus Jacobpaj rejserqa, Padan-arampi kashaspa, Dina ususintawan, chaykuna. Chaykunamanta mirajkunaqa karqanku kinsa chunka kinsayoj qharis, chantá warmis ima. 16Gadpa churisnin karqanku: Zifión, Hagui, Ezbón, Suni, Eri, Arodi, Areli ima. 17Aserpa churisnin karqanku: Imna, Isvá, Isúi, Bería ima, chaykunaj panankutaj karqa Sera. Beríaj churisnin karqanku Heber, Malquiel ima. 18Chaykuna karqanku Zilpaj churisnin Jacobpaj rejsisqasnin. Payqa karqa Leaj warmi kamachin, mayqentachus Labán qoporqa ususin Leaman, chay. Chaykunamanta kajkuna karqanku tukuyninkupi chunka sojtayoj. 19Jacobpa warmin Raquelpa churisnin karqanku iskay: Josewan, Benjaminwan. 20Josejpa churisnintaj Asenatpi rejsisqasnin iskay karqanku: Manaseswan, Efraínwan, Egiptopi nacejkuna. Asenat warmenqa karqa Onmanta sacerdote Potiferaj ususin. 21Benjaminpa churisnin karqanku: Bela, Bequer, Asbel, Gera, Naamán, Ehi, Ros, Mupin, Hupin, Ard ima. 22Chaykuna karqanku Raquelpa miraynin Jacobpa warmimpata. Tukuynimpi chunka tawayoj karqanku. 23Danpa churenqa karqa Husim. 24Neftalijpa churisnin karqanku: Jahzeel, Gumi, Jezer, Silem ima. 25Chaykuna karqanku Bilhaj churisnin Jacobpaj rejsisqasnin. Bilhaqa Raquelpa kamachin karqa, mayqentachus Labán qoporqa ususin Raquelman, chay. Paypa miraynenqa qanchis karqanku tukuyninkupi. 26Jacobwan Egiptoman chayajkuna, pay kikimpa yawarninmanta kajkuna karqanku sojta chunka sojtayoj, churisnimpa warmisninta mana yupaspa. 27Josejpa churisnenqa karqanku iskay, Egiptopi nacejkuna. Ajinata Jacobpa ayllun chayarqa Egiptoman qanchis chunka runas. 28Chayanayashaspaña, Jacobqa Judá churinta kacharqa Joseman willamojta, jamunampaj taripaj Gosén chaynejman. Gosén, chaynejman chayajtinkutaj, 29Joseqa kamacherqa kamachisnin carretanta wakichipunankuta tatanta taripaj rinampaj. Tatanwan tinkukuspataj, Joseqa sumajta ojllaykorqa, unaytataj waqarqa tatan ojllarisqa. 30Chaymanta Israelqa nerqa José churinman: Noqa kikiy ñawisniywan rikukapuyki, kawsashajta taripakapuyki. Kunanqa atini wañupuyta, nispa. 31Chantá Joseqa wawqesninman, tatampa ayllusninman ima nerqa: Faraonman rispa, willamusaj: Wawqesniy, tataypa tukuy familiasnin chayamushanku Canaán jallp'amanta noqawan tiyakoj. 32Paykunaqa jamushanku wakasninkuwan, ovejasninkuwan, imankuchá tiyan, chay imaswan ima, imaraykuchus paykuna uywasllatapuni mirachiyta yachanku, nispa. 33Maypachachus Faraón wajyasonqachej, tapusonqachejtaj imastachus ruwayta yachasqaykichejta chaypacha, 34qankunaqa ninkichej: Ovejasllatapuni mirachiyta yachayku, ñawpa tatasniyku jina, nispa. Ajinamanta qankuna Gosén jallp'api tiyakunkichej, imaraykuchus egipciospajqa mana allinchu ovejeroswan khuska tiyakoyqa.

will be added

X\