1 Evaqa wijsayoj rikhurerqa qosan Adanpaj. Nacechikorqa Caínta, nerqataj: Tiyapuwan uj qhari wawa; kaytaqa Tata Dios qowan, nispa. 2 Chay qhepaman nacechikullarqataj Caínpa wawqen Abeltañataj. Abelqa ovejasta michej karqa, Caíntaj jallp'ata llank'aj karqa. 3 Qhepaman Caínqa uj p'unchay Tata Diosman jaywanata aparqa llank'aspa poqochisqasninmanta. 4 Abelpis apallarqataj Tata Diosman jaywanata ovejasninmanta uj sumajnin kajta, ñawpaj kaj uñasmanta. Tata Diostaj allin ñawiwan Abelta qhawarerqa, jinallatataj jaywasqantapis. 5 Caintarí mana jinatachu qhawarerqa, nillataj jaywasqantapis. Chaymanta Caínqa maytapuni phiñarikorqa, uyampis uj jinayarqa. 6 Tata Diostaj nerqa: Imaraykutaj jinata phiñakunki, uyaykipis uj jinayanri? 7 Sichus allinta ruwawaj chayqa, mana jina uyayojchu kawaj. Qanqa mana allintachu ruwanki, chayrayku juchaqa atipasuytaña munashan. Manachus jina kawaj chayqa, juchata atipawaj, nispa. 8 Uj kuti Caínqa Abelta pusarqa: Jaku campoman, nispa. Chay campopi kashaspataj, Caínqa wawqen Abelta maqayta qallarerqa wañuchinankama. 9 Chantá Tata Diosqa Caínta taporqa: Maytaj wawqeyki Abelri? nispa. Paytaj kuticherqa: Mana yachanichu. Noqachu wawqey Abelta qhawanay karqa imatajri? nispa. 10 Diostaj nerqa: Imanarqankitajri? Wawqeykej yawarninta jich'asqaykeqa jallp'amantapacha qhaparikamushawan. 11 Chayrayku qanqa maldecisqa kanki, wijch'usqataj kanki kay jallp'amanta, mayqenchus wawqeykej yawarninta upiykun, chaymanta. 12 Kunanqa llank'ashajtiykipis, jallp'aqa manaña poqonanta jinachu poqonqa. Qanqa kay pachantimpi puriskiri kanki, mana jayk'aj samarikuyta tarejtaj. 13 Caínqa Tata Diosman kuticherqa: Noqapaj kayqa ancha jatun castigo. 14 Kunan Qanqa qharqowanki kay jallp'amanta. Puriskiri kamusaj kay pachantimpi Qanmanta karupi, ni jayk'aj samarikuytapis tarispa. Pipis tinkukuwaspaqa, wañuchillawanqachari, nispa. 15 Tata Diostaj chayman kuticherqa: Pipis qanta wañuchejqa qanchis kuti castigasqa kanqa, nispa. Chaymantataj Tata Diosqa Cainman uj señalta churarqa, pipis taripaytawan ama wañuchinampaj. 16 Caínqa Tata Diosmanta t'aqakuspa riporqa. Tiyakorqataj Nod jallp'api, Edenmanta inti llojsimuy cheqakojpi. 17 Caínpa warmin wijsayoj rikhurispa, nacechikorqa churin Enocta. Chantá Caínqa uj llajtata sayacherqa, chay llajtatataj suticharqa churin Enocpa sutinwan. 18 Enocqa karqa Iradpa tatan, Iradtaj karqa Mehujaelpa tatan. Mehujaeltaj Metusaelpa tatan karqa, Metusaeltaj Lamecpa tatan karqa. 19 Lamecqa iskay warmisniyoj karqa. Ujnin kajpata Ada sutin karqa, ujnin kajpatataj Zila. 20 Adaj churin karqa Jabal, chaypa miraynintaj karqanku toldospi tiyakojkuna, uywasta uywajkuna. 21 Wawqenqa Jubal karqa; chaypa wawasnin karqanku arpata, qenatawan tocajkuna. 22 Zilapis wawayojllataj karqa, sutintaj karqa Tubalcaín. Payqa herrero karqa; ruwaj tukuy imata broncemanta, fierromantawan. Tubalcainpata panampis tiyarqa, sutintaj Naama karqa. 23 Uj kuti Lamecqa warmisninta nerqa: Ada, Zila, sumajta uyariwaychej imatachus nisqayta: Warmisníy, uj runata wañuchini wajtawasqanrayku, uj waynatataj sajmawasqanrayku. 24 Sichus Caínta qanchis kutita castiganqanku chayqa, noqataqa castigawanqanku qanchis chunka qanchisniyoj kutista. 25 Adanpa warmin ujtawan wijsallisqa rikhurerqa. Ajinamanta uj wawan kallarqataj, suticharqankutaj Set sutiwan. Evataj nerqa: Dios qowan uj churitañataj Abelpa cuentanmanta, pitachus Caín wañucherqa, chaymanta, nispa. 26 Setpatapis churin kallarqataj, sutintaj karqa Enós. Chaymantapacha Tata Diospa sutinta oqhariyta qallarerqanku Diosninkupaj rejsikapusqankurayku.
