1 Joseta Egiptoman apajtinku, uj egipcio Potifar nisqa payta rantikorqa ismaelitasmanta. Potifarqa karqa Egipto reypa guardianmanta kamachej, capitannintaj. 2 Tata Diosqa Josewampuni kasharqa. Chayrayku egipcio patronnimpapi kashajtin, tukuy imapi allin rerqa. 3 Patronnenqa repararqa Tata Dios paywampuni kasqanrayku tukuy imapi allin risqanta. 4 Ajinamanta Joseqa patronninwan mayta munachikorqa. Chaymantaqa Potifar, payta yanapanampaj Joseta churarqa mayordomomanta tukuy kapuyninmanta, wasimpi kajkunamantawan cuentayoj kanampaj. 5 Potifarqa wasinta, tukuy imasninta ima qhawanampaj Joseta churarqa. Tata Diosqa chaymantapacha bendecerqa Potifarta Josenejta, wasimpitaj, jinallataj chajrasnimpipis. 6 Ajinata Potifarqa tukuy imasninta Josejpa makisninman saqerqa; chayrayku payqa manaña ima ruwanasninmantapis allinta dakojchu; imatachus mikhunallanmanta dakoj. Joseqa k'acha wayna, sumajtaj karqa. 7 Chayrayku Potifarpa warmin qhepa p'unchaykunaman Joseta munapayaspa, uj kuti nerqa: Jamuy, noqawan puñuykunki, nispa. 8 Joserí mana munarqachu, nerqataj: Patronneyqa niwan noqa tukuy imasninmanta cuentayoj kanayta; noqa kaypi kashajteyqa, mana imamantapis llakikunanchu tiyan. 9 Kay wasipeqa mana pipis imata ruwananchu tiyan, manachayqa noqalla cuentayoj kani. Chayrayku patronneyqa niwan tukuy kapuyninmanta dueño jina kanayta. Qanllamanta mana ima ruwanaychu tiyan, imaraykuchus qanqa warmin kanki, chayrayku. Ajinaqa, imaynatataj noqa ruwasaj kasqa chay millaytari, juchallikusajtaj Diospa contrampiri? nispa. 10 Chaywampis chay warmeqa sapa p'unchay Joseta parlapayaj paywan puñuykunanta yuyaspa, payllawan ima ratopis kananta munaspa; Josetajrí mana uyarejllapis tukojchu. 11 Uj p'unchay Joseqa wasiman yaykorqa, imachá ruwanasnin karqa, chayta ruwaj. Mana ima runapis chaynejpi kajta rikuspataj, 12 warmeqa Joseta p'achanmanta jap'iykorqa: Puñuna, nispa. Josetajrí ch'urkirakuspa, chay p'achanta chay warmej makimpi saqerpariytawan, jawaman ayqerikaporqa. 13 Chay warmeqa makimpi p'acha jap'irisqa rikukuspa, 14 waj kamachisninta wajyarqa: Qankuna rikunkichej: Qosayqa kay hebreota pusamusqa noqanchejmanta alqochakunawanchejpaj. Noqa wasipi kashajtiy, yaykumun, noqawantaj puñuyta munan; chayrayku jatunmanta qhaparikorqani. 15 Paytaj tukuy kallpaywan jatunmanta qhaparikusqayta uyarispa, jawaman ima jina ayqen, p'achantapis saqerparispa, nispa. 16 Chaymanta chay warmeqa Josejpa p'achanta jallch'arqa qosan chayamunankama. 17 Chayamojtin, kikillantataj Potifarman willarqa: Chay hebreo kamachi pusamusqaykeqa cuartoyman yaykumun noqawan puñuyta munaspa, honrayta t'akayta munaspa. 18 Jatunmanta tukuy kallpaywan qhaparejtiytaj, uj ima jina jawaman ayqen, p'achantapis saqerparispa. 19 Ajinata kamachiykeqa noqata ruwawan, nispa. Jinamanta Potifarqa Josepaj maytapuni phiñakorqa, chay jinata warmin willajtin. 20 Chantá Potifarqa Joseta jap'ichiytawan, carcelman wisq'acherqa, maypichus reypa presosnin kasharqanku, chayman. José carcelpi kashajtimpis, 21 Tata Diosqa paywampuni karqa, tukuy imapi payta khuyaspa. Jinamanta Joseqa carcelta qhawajkunaj kurajninwanñataj munachikorqa. 22 Chayrayku chay runaqa Joseta churarqa carcelpi presosta qhawanampaj. Jinamanta payqa carcelpi tukuy imata sumajta kamacherqa, imaschus chay ukhupi ruwakoj, chaykunapi. 23 Chayrayku carcelta qhawaj runaqa mana imamanta dakojchu José cuentayoj kashajtin, imaraykuchus Tata Dios paywan kasharqa tukuy ima ruwasqasnimpi allin rinampaj.
