1 Jinata rishaspa, Jacob rikorqa Esauta tawa pachaj runasninwan jamushajta. Chayrayku wawasninta mamasninkumankama t'aqaykorqa: Leaman, Raquelman, iskaynin kamachisnin Bilhamanwan Zilpamanwan. 2 Ñawpaj puntamanqa churarqa chay kamachisnintaraj wawasnintawankama, chaymanta Leata wawasnintawan, qhepa puntamantaj Raquelta wawan Josetawan. 3 Jinaytawantaj, Jacobqa ñawpaykuspa, qanchis kutita pampakama k'umuykukorqa, wawqen Esaumantaj qayllarqa. 4 Esautajrí correspa, Jacobta ojllaykuspa much'aykorqa. Chantá iskayninku waqarikorqanku. 5 Chaymanta Esauqa warmista, wawastawan qhawarispa, wawqenta taporqa: Kaykuna pikunataj kankuri? nispa. Jacobtaj nerqa: Chaykunaqa kanku kamachiykej wawasnin, Diospa qowasqan, nispa. 6 Jinata nishajtinku, iskaynin kamachis Bilhawan, Zilpawan sapa uj wawasninkuwan Esauman qayllaykuspa, qonqoriykukorqanku, pampakama umankuta chayachinankukama. 7 Qhepantataj Leañataj wawasninwan qayllaykorqa kikinta ruwaspa. Qhepa qhepatataj Raquelqa Josewan qayllaykuspa, kikillantataj qonqorikorqa. 8 Chantá Esaú taporqa Jacobta: Imatataj yuyanki kay chhika t'aqastawan taripasusqaywanri? nispa. Jacobtaj nerqa: Qampa k'acha kayniykita tariyta munaspa jamushani, nispa. 9 Esaú nerqa: Mana, wawqéy, noqajtaqa tiyapullawan; qampata kajqa, qampata kakullachun, nispa. 10 Jacobtajrí nillarqapuni: Sichus noqapaj k'acha kanki chayqa, jap'ikullaway kay qosusqasniyta. Qanta rikuspaqa kikin Diostapis rikushayman jina kani, qan may k'acha sonqowan suyawasqaykirayku. 11 Jap'ikullayña kay uywasta, mana imaypis pisipuwanchu. Chay jinatapuni Jacob nejtenqa, ñak'aymanta Esauqa jap'erqa chay tukuy ima qosqanta. 12 Chaymantataj Jacobman nerqa: Jina kajtenqa, jaku ripuna. Noqa ñawpaqeykita risaj, nispa. 13 Jacobtajrí nerqa: Munasqa wawqéy, yachanki jina, wawasniy pisi kallpasllaraj kanku, chantapis ovejasniy, wakasniy juch'uy uñasniyoj kanku; sayk'uspa, uj p'unchayllachari wañurankuman. 14 Chaypajqa qanllaraj ñawpaykapushay kay kamachiykimanta. Noqaqa pisimanta pisi jamullasaj uywaspa, wawaspa thaskimusqankuman jina. Chantá Seirpi tinkukullasunchej. 15 Esaú nerqa: Jina kajtenqa, saqesqayki noqawan jamoj wakin runasta, nispa. Jacobtaj nerqa: Ama chaymantaqa llakikuychu, imaraykuchus qampi khuyakuyta tariniña, nispa. 16 Chay ratopacha Esauqa Seirman kutiporqa. 17 Jacobtajrí chaymanta riporqa Sucotman. Chaypi wasita ruwakorqa, jinallataj ch'ujllasta ruwarakorqa uywasnimpaj. Chayrayku chay cheqata suticharqa Sucot sutiwan. 18 Jacobqa Padan-arammanta allillanta, walejllataj chayarqa Canaanman. Chayman chayaspataj, Sichem llajtaj chimpampi jarakorqa. 19 Chaypitaj jallp'ata rantikorqa Sichem sutiyojpa tatan Hamorpa churisninmanta pachaj phisuswan; chaypi jarakorqa. 20 Jinaspataj, uj altarta ruwarqa, suticharqataj Diosqa Israelpa Diosnin sutiwan.
