1 Abrahamqa ujtawan casarakullarqataj, chay warmimpa sutintaj karqa Cetura. 2 Abrahampa churisnin Ceturapi karqanku: Zimran, Jocsán, Medán, Madián, Isbac, Súa ima. 3 Jocsanpa churisnin karqanku Sebawan, Dedanwan. Dedanpa miraynintaj karqanku: Asureos, letuseos, leumeos ima. 4 Madianpa churisnin karqanku: Efa, Efer, Hanoc, Abida, Elda ima. Chay tukuy karqanku Ceturaj miraynin. 5 Abrahamqa churin Isaacman tukuy kapuyninta qoporqa. 6 Jinamanta Abrahamqa wakin warmisnimpi wawasninman wakin imasllata jaywararqa. Chaymantaqa kawsashaspallaraj Isaacmanta chay wakin churisninta karunchacherqa, paykunatataj inti llojsimuynejman kacharqa. 7 Abrahamqa tukuynimpi kawsarqa pachaj qanchis chunka phishqayoj watasta. 8 Abrahamqa wañuporqa allin wañuypi, allin machuña, ashkha watasniyojtaj. Ajinamanta ñawpa tatasninman riporqa. 9 Churisnin, Isaac, Ismaelwan payta p'amparqanku Macpela chhanka cuevapi; chayqa kashan Mamremanta inti llojsimuynejpi, hitita Zoharpa churin Efronpa jallp'ampi. 10 Chay jallp'ata Abraham rantikusqa hititasmanta. Abrahamta p'amparqanku, warmin Sara p'ampasqa kasharqa, chaypi. 11 Abraham wañupusqanmanta qhepata Dios bendecerqa Abrahampa churin Isaacta; pay tiyakorqa, Pichus Kawsaj Rikuwan nisqa pujyoj qayllampi. 12 Kaykuna kanku Abrahampa churin Ismaelpa churisnin, pichus karqa egipcia Agarpa churin, Saraj kamachimpata. 13 Chaykunaqa nacesqankuman jina karqanku: Ismaelpa kuraj kaj churenqa Nebaiot, chantá Cedar, Adbeel, Mibsam, 14 Misma, Duma, Massa, 15 Hadar, Tema, Jetur, Nafis, Cedema ima. 16 Chaykuna kanku chunka iskayniyoj sutis Ismaelpa churisnimpata. Jallp'asninkupis kikin sutisninkuwan sutichasqa karqanku, jinallataj jarasninkupis. Sapa ujninku kurajkuna karqanku t'aqankupikama. 17 Ismaelqa pachaj qanchis chunka qanchisniyoj watasniyoj wañupuspa, ñawpa tatasninman riporqa. 18 Mirayninmanta kajkuna jamorqanku tiyakoj Havilawan Shurwan tinkuykunaman; chay kashan Egiptoj chimpampi, Asiriamanta jamunapi. Chaypi tiyakorqanku wawqepura chejninakuspa. 19 Kaymin kashan Abrahampa churin Isaacpa kawsayninmanta willayqa. 20 Isaacqa tawa chunka watasniyoj karqa Rebecawan casarashaspa; Rebecaqa Betuelpa ususin karqa, Labanpa panantaj; paykuna arameos nisqa karqanku, tiyakorqankutaj Padan-arampi. 21 Rebecaqa mana wawasniyoj kayta aterqachu. Chayrayku Isaacqa Diosmanta wawata mañakorqa. Tata Diostaj chay mañakusqanta uyarerqa; jinamanta Rebecaqa wijsayoj rikhurerqa. 22 Rebecaj wijsampi iskay wawas karqanku, teqenakorqankutaj. Chayrayku nerqa: Sichus ajinallapuni kanqa chayqa, imapajtaj kawsaniri? nispa. Chaymantaqa Tata Diosta taporqa. 23 Tata Diostaj nerqa: Wijsaykipi iskay naciones kashanku; iskay ayllus maqanakushanku manaraj naceshaspa. Ujnin kaj aswan atiyniyoj kanqa ujninmanta. Kuraj kajqa sullk'a kajpa nisqampi kanqa, nispa. 24 Rebecaj nacechikunan p'unchay chayamojtin, pay iskayta qhepan qhepanta nacechikorqa. 25 Ñawpajta nacej kajqa p'aqopacha, tukuy cuerpon thapulla karqa, suticharqankutaj Esaú sutiwan. 26 Ujnin kajtaj nacekorqa Esaujpa chaki talonninta ujnin makinwan jap'irisqa, chayrayku suticharqanku Jacob sutiwan. Isaacqa sojta chunka watasniyojña karqa, Rebeca warmin chay wawasta nacechikushajtin. 27 Chay wawasqa wiñarqanku. Esauqa campo runa kaspa, monte animalesta sumajta jap'iyta yacharqa. Jacobtajrí may sonqo tiyaykusqa runa karqa; payqa jarallapipuni kakuyta munaj. 28 Isaacqa anchata munaj mikhuyta Esaujpa monte animalesta jap'isqanmanta aycha kankata; chayrayku payta astawan munakoj. Rebecatajrí Jacobta munakoj. 29 Uj kuti Jacob wayk'usharqa, Esautaj monteta risqanmanta sayk'usqa chayamuspa, 30 nerqa Jacobman: Chay puka mikhuyniykimanta uj chhikata qoriway ari; yarqhaywan wañushaniña, nispa. Chayrayku payta Edom sutiwan suticharqanku. 31 Jacob nerqa: Kuraj churi kaspa jap'inaykita vendeway, nispa. 32 Esautaj nerqa: Yarqhaywan wañushaniña. Ima allintaj noqapaj kanqa kuraj churi kaspa jap'inay tiyapunawanri? nispa. 33 Jacobtajrí nillarqapuni: Kunampacha juray qonawaykita, nispa. Esautaj yarqhaywan mana kayta atispa, kuraj churi kaspa jap'inanta, jurarqa Jacobman qopunanta. 34 Chaymantaraj Jacobqa t'antata jaywarqa, chuwismanta wayk'usqa mikhunatawan. Esautaj mikhuykuspa, ujyaykuspataj sayariytawan riporqa. Ajinata Esauqa kuraj churi kaspa, jap'inanta pisipaj qhawarqa.
