GÉNESIS 21

1Tata Diosqa Saraman imatachus qonanta nisqanman jina, parlasqanta junt'arqa. 2Saraqa wijsayoj rikhurerqa. Jinamanta qosan Abrahampaj wawayoj karqa, Dios mayk'ajchus kananta nerqa, chayman jina. Chaypacha Abrahamqa allin machuña karqa. 3Abrahamqa warmin Sara nacechipusqan wawata Isaac sutiwan suticharqa. 4Pusaj p'unchayninmantaj wawata circuncidarqa Diospa kamachisqanman jina. 5Abrahamqa pachaj watasniyoj karqa, wawan Isaac naceshajtin. 6Chaypacha Saraqa unancharqa: Dios asichiwarqa. Kunanqa kayta yachajkuna noqawan khuska asikonqanku. 7Pitaj ninman karqa Abrahamman paypaj wawayojraj kanaytari? Chaywampis payman wawata rejsichiniraj chay jina machuyaynimpi. 8Isaacqa jatunña karqa, ñuñumantapis p'itisqaña. Chay p'itisqanku p'unchaypi Abrahamqa jatun mikhuykunata wayk'ucherqa. 9Chantá Saraqa rikorqa Abrahampa churin Ismael, kamachin Agarpi karqa, chay waynata Isaacmanta alqochakushajta. 10Chaymanta llojsiytawan, Abrahamman nerqa: Chay kamachi warmita wawantinta qharqoy. Isaac wawallay tukuy herenciata jap'inan tiyan; kay kamachi warmej wawanrí mana imatapis paywan khuska jap'enqachu, nispa. 11Abrahamqa chayta uyarispa, mayta llakikorqa, imaraykuchus Ismaelpis wawallantaj karqa. 12Diosrí Abrahamta nerqa: Ama llakikuychu chay wawaykimanta, nitaj kamachiykimantapis. Kasuy warmiyki Sara imatachá nisunki chayta, imaraykuchus qampa mirayniykeqa jatunyanqa Isaac wawaykinejta. 13Kamachiykej churinmantapis uj jatun nacionta wiñachisaj, qampa churiyki kasqanrayku, nispa nerqa Tata Diosqa. 14Q'ayantin tutamanta Abrahamqa Agarman jaywarqa t'antata, uj qara botapi yakutawan. Jinaspataj, Agarman chay yaku botata q'epiriykucherqa, kacharpayarqataj iskayninkuta. Chaymanta Agarqa riporqa, mana yachaspa maymanchus rinanta, Beerseba ch'in pampaman chayanankama. 15Apakusqanku yakupis tukukapojtin, churinta uj juch'uy sach'a uraman siriykucherqa, 16jinaspataj Agarqa karunejman rerqa: Waway wañojta ama rikusajchu, nispa. Chaypi tiyaykukuspa, sinch'ita sonqo nanayta waqarikorqa. 17Diostajrí wawaj waqasqanta uyarimuspa, uj angelta kachamorqa janaj pachamanta, chay angeltaj Agarman nerqa: Imataj tiyan qanwan, Agar? Ama phutikuychu; Dios uyarin wawaj waqasqanta, maypichus kashan, chaypi. 18Sayariy, wawaykita makinmanta aysarimuy, imaraykuchus Noqa paymanta ruwasaj uj jatun nacionta, nispa. 19Jinapi Diosqa rikucherqa Agarman uj yaku pujyuta. Paytaj riytawan, qara botanman junt'aykucherqa, apamuspataj Ismaelman ujyacherqa. 20Ajinata Dios yanaparqa Ismaelta. Payqa wiñarqa, tiyakorqataj ch'in pampapi; chantaqa sumajtataj arcowan flechasta kachariyta yacharqa. 21Pay tiyakorqa Parán ch'in pampapi, mamantaj payta casaracherqa uj egipcia warmiwan. 22Chay tiempollapitaj Abimelecqa, soldadosninta kamachej Ficolwan rerqanku Abrahamwan parlaj. Chayaspataj, nerqanku: Rikuyku qanta Dios tukuy ima ruwasqasniykipi yanapasusqanta. 23Chayrayku qan juray ari Diospa ñawpaqempi mana ima sajratapis ruwanawaykita, ni wawasniypaj, nitaj mirayniypajpis. Jurallaytaj ari allinta ruwanawaykita, noqa imaynatachus ruwarqayki, ajinata, jinallataj allinta ruwanaykita kay runaspajpis, mayqenkunaj nacionninkupichus tiyakushanki, chaykunapaj, nispa. 24Abraham kuticherqa: Arí, ajinata ruwasaj Diospa ñawpaqempi, nispa. 25Jinapis Abrahamqa Abimelecta yuyaricherqa Abimelecpa kamachisnin uj yaku pujyunta qhechusqankuta. 26Abimelectajrí nerqa: Kunankama mana yacharqanichu chayta; qampis chaymantaqa mana imatapis niwarqankichu. Mana yachanichu pichus chayta ruwasqanta, nispa. 27Jinataj Abrahamqa Abimelecman qorerqa ovejasta, wakasta, iskayninkutaj uj tratota ruwarqanku. 28Chantá Abrahamqa qanchis ovejasta wajnejman t'aqarqa. 29Abimelectaj taporqa: Imapajtaj chay qanchis ovejasta t'aqashankiri? nispa. 30Abrahamtaj kuticherqa: Kay qanchis ovejasta qoshayki, chayqa kanqa yachakunampaj noqa kay yaku pujyuta ruwasqayta, nispa. 31Chayrayku chay cheqata suticharqanku Beerseba sutiwan, imaraykuchus chaypi allin parlayman yaykorqanku iskayninku. 32Chay tratota Beersebapi ruwaytawan Abimelecwan, soldadosta kamachej Ficolwan kutiporqanku filisteospa llajtanman. 33Abrahamtaj uj tamarisco sach'ata chaypi plantarqa. Chantá Beersebapi Abrahamqa wiñay kawsayniyoj Señor Tata Diospa sutinta oqharerqa Diosnimpaj rejsikapusqanrayku. 34Jinamanta Abrahamqa unayta tiyakorqa filisteospa jallp'ampi.

will be added

X\