1 Ajinata cielota, kay pachatapis, chaypi kajkunatawan Dios ruwayta tukorqa. 2 Qanchis kaj p'unchaypi, Diospa tukuy ima ruwanasnin tukusqaña kajtin, Pay samarikorqa. 3 Chaymanta qanchis kaj p'unchayta Dios bendecerqa, churarqataj samarikuna p'unchayta, imaraykuchus Pay chay p'unchaypi samarikorqa tukuy imata ruwasqanmanta. 4 Chaymin cieloj qallarikuynin, kay pachaj qallarikuynintaj. Maypachachus Dios ruwarqa cielotawan, kay pachatawan chaypacha, 5 manaraj ni ima sach'apis karqachu, nitaj ima q'omer qhorapis jallp'api wiñarqarajchu, imaraykuchus Tata Dios manaraj parachimorqarajchu jallp'a pataman, nitaj pipis karqarajchu jallp'ata llank'anampaj. 6 Chaywampis Diosqa wawsita chhullata jina pampamanta llojsichimorqa, chaywantaj jallp'ata joq'ocharqa. 7 Chantá Tata Diosqa runata ruwarqa ñut'u jallp'amanta, senqanmantaj kawsay samayta samaykorqa. Ajinamanta runaqa kawsayta qallarerqa. 8 Tata Dios uj qhallallaj huertata Edenpi ruwarqa inti llojsimuynejpi, chaymantaj churarqa chay runa ruwasqanta. 9 Chay huertapi Tata Dios wiñacherqa tukuy laya sumaj sach'asta poqoyninta mikhunapaj. Huerta chawpipi wiñachillarqataj kawsay sach'ata, jinallataj allin kajta mana allin kajta yachanamanta sach'atapis. 10 Huertata qarpanapaj kikin Edenmanta uj mayu llojserqa, chaymantataj tawa mayusman t'aqakorqa. 11 Ñawpaj kaj mayoj sutin karqa Pisón. Chayqa muyuykushan Havila jallp'aj muyuyninta, chaypitaj qori tiyan. 12 Chay jallp'api kaj qoreqa sumaj karqa. Chaypi kallarqataj sumajta q'apashaj sach'a waqaywan, ónice valorniyoj rumiwan. 13 Iskay kaj mayoj sutenqa Gihón karqa, chaytaj muyuykushan tukuy Cus jallp'ata. 14 Kinsa kaj mayoj sutenqa Tigris karqa, chaytaj muyuykushan Asiriaj inti llojsimuyninnejta. Tawa kaj mayoj sutintaj Éufrates karqa. 15 Tata Diosqa runa ruwasqanta Edén huertaman churarqa llank'anampaj, qhawanampajtaj. 16 Chaymanta Tata Diosqa kamacherqa runata: Huertapi tukuynin kaj sach'asmanta mikhullanki. 17 Allin kajta mana allin kajta yachanamanta sach'aj poqoynillanta amapuni mikhunkichu. Chay sach'aj poqoynintachus mikhunki chayqa, wañunki, nispa. 18 Tata Diosqa nillarqataj: Mana allinchu runaqa sapallan kanan. Paywan kanampaj, uj yanapajta ruwapusaj, nispa. 19 Tata Dios ruwasqa jallp'amanta tukuy laya monte animalesta, tukuy laya p'isqostawan. Jinaspataj runaman qhaterqa, sapa ujta sutichanampaj. Chay runaj sutichasqasninwantaj sapa uj kashanku. 20 Runataj sapa uj animalesta sutichararqa: Monte animalesta, phawajkunata, uywasta ima. Chaywampis mana tarikorqachu payta yanapajqa. 21 Jinapi Tata Diosqa runata sinch'ita puñurpayacherqa, chaykamataj ujnin wajtanninta orqhorqa. Jinaspari, aychallanwantaj k'askaykuchiporqa. 22 Chantá Tata Diosqa runaj wajtanninta orqhosqanmanta uj warmita ruwarqa, jinaspataj runaman pusamorqa. 23 Qhareqa payta qhawarispa, nerqa: Kayqa kikin tulluymanta, kikin aychaymanta, kaypa sutintaj kanqa warmi, imaraykuchus Diosqa payta qharimanta ruwasqa, nispa. 24 Chayrayku qhareqa tatanta mamantawan saqenqa, warminwantaj ujchakonqa, iskayninkutaj uj runa jinalla kanqanku. 25 Chaypacha qhariwarmi q'alaslla kasharqanku, manataj p'enqakorqankuchu ajina kasqankumanta.
