GÉNESIS 11

1Chay tiempopi tukuy runas uj parlayllata parlaj kanku. 2Maypachachus inti llojsimuynejmanta llojsimorqanku chaypacha, tarerqanku uj pampata Sinarpi, chaypitaj qhepakorqanku unayta tiyakunankupaj. 3Ujpacha ninakorqanku paykunapura: Ladrillosta ruwanachej ninapi chayachispa, nispa. Chayta ruwarqanku rumej cuentanmanta, mach'ata chhajwatawan chajruykuspa. 4Chaymantataj ninakorqanku: Kunanqa ruwanachej uj llajtata, uj torretawan janaj pachaman chayanampaj. Ajinamanta noqanchej sumaj atiyniyoj nisqa kasunchej, amataj tukuynejman ch'eqerananchejpaj, nispa. 5Tata Diostajrí urayk'amorqa chay llajtata qhawarej, runaspa ruwasqanku, chay torretawan. 6Chantá Pay nerqa: Runasqa kunan sumaj ujchasqa kashanku, uj parlayllatataj parlanku; jinamanta kaytaqa ruwanku. Jinaqa kunanmantaqa imatachus munasqankuta ruwallanqankuña. 7Kunanqa jaku, urayk'unachej parlayninkuta chajroj, parlasqankuta ama entiendenakunankupaj, nispa. 8Ajinata Tata Diosqa tukuynejman paykunata ch'eqeracherqa. Paykunataj chay llajtata ruwayta saqeporqanku. 9Chay cheqapi Tata Dios chajrurparerqa runaspa parlayninkuta tukuynin kay pachapi, chaynejmantataj paykunata tukuynejman ch'eqeracherqa. Chayrayku chay llajtajta sutin karqa Babel. 10Kaykuna karqanku Sempa miraynin. Jatun musphay paramanta iskay watanman Semqa pachaj watasniyoj karqa, Arfaxad churin naceshajtin. 11Chaymanta qhepaman Semqa phishqa pachaj watastawanraj kawsarqa, wawasnintaj karqanku qharis, chantá warmis. 12Arfaxadqa karqa kinsa chunka phishqayoj watasniyoj churin Sala naceshajtin. 13Chaymanta qhepaman Arfaxadqa tawa pachaj kinsayoj watastawanraj kawsarqa, wawasnimpis karqankuraj qharis, chantá warmis. 14Salaqa kinsa chunka watasniyoj karqa churin Heber naceshajtin. 15Chay qhepata Salaqa tawa pachaj kinsayoj watastawanraj kawsarqa, wawasnintaj karqankuraj qharis, chantá warmis. 16Heberqa kinsa chunka tawayoj watasniyoj karqa churin Peleg naceshajtin. 17Chaymanta qhepaman Heberqa tawa pachaj kinsa chunkayoj watastawanraj kawsarqa; wawasnimpis karqankuraj qharis, chantá warmis. 18Pelegqa karqa kinsa chunka watasniyoj churin Reu naceshajtin. 19Chaymanta qhepaman Pelegqa iskay pachaj jisq'onniyoj watastawanraj kawsarqa; wawasnimpis karqankuraj qharis, chantá warmis. 20Reuqa kinsa chunka iskayniyoj watasniyoj karqa churin Serug naceshajtin. 21Chaymanta qhepaman Reuqa iskay pachaj qanchisniyoj watastawanraj kawsarqa; wawasnimpis karqankuraj qharis, chantá warmis. 22Serugqa karqa kinsa chunka watasniyoj churin Nacor naceshajtin. 23Chaymanta qhepaman Serugqa iskay pachaj watastawanraj kawsarqa; wawasnimpis karqankuraj qharis, chantá warmis. 24Nacorqa karqa iskay chunka jisq'onniyoj watasniyoj churin Taré naceshajtin. 25Chaymanta qhepaman Nacorqa pachaj chunka jisq'onniyoj watastawanraj kawsarqa; wawasnintaj karqankuraj qharis, chantá warmis. 26Tareqa kinsa churisniyojña karqa, qanchis chunka watasniyoj kashaspa. Paykuna karqanku Abram, Nacor, Harán ima. 27Kaykuna kanku Tarejpa miraynin. Pay karqa kinsa churisniyoj, chaykunataj karqanku Abram, Nacor, Harán ima. Haranqa Lotpa tatan karqa. 28Pay wañuporqa tatan Taremanta ñawpajta Caldea Urpi, maypichus nacerqa, chay kikin jallp'api. 29Abram casarakorqa Saraíwan, Nacortaj casarakorqa Milcawan. Chay Milcaqa karqa Haranpa ususin, ñañantaj karqa Isca. 30Saraipataqa mana wawasnin karqachu; payqa manapuni wijsallikuyta atejchu. 31Tareqa caldeospa jallp'an Urmanta llojsiporqa Canaán jallp'aman rinampaj, pusariykukuspa churin Abramta, allchhin Lotta, ñojch'an Saraitawan. Rispataj, Harán nisqa jallp'aman chayarqanku, chantaqa chaypi tiyakorqanku. 32Tareqa Harán jallp'api wañuporqa iskay pachaj phishqayoj watasniyoj kashaspa.

will be added

X\