GÉNESIS 1

1Qallariypeqa Dios cielotawan, kay pachatawan ruwarqa. 2Kay pachaqa chajrulla, ch'usajlla, yuyay chinkay ukhu laqhallataj karqa. Diospa Espirituntaj yaku patata muyuykachasharqa. 3Chantá Dios nerqa: K'anchay kachun, nispa, k'anchaytaj karqa. 4Dios rikorqa k'anchayqa sumaj kasqanta. K'anchaytataj laqhamanta t'aqarqa. 5Suticharqataj k'anchaytaqa: P'unchay, nispa. Laqhatataj suticharqa: Tuta, nispa. Ajinamanta ch'isiyaywan sut'iyaywan ñawpaj kaj p'unchay karqa. 6Chaymantá Dios nerqa: Yaku chawpipi uj jark'achina kachun, yakuta iskayman t'aqaj, nispa. Ajinataj karqa. 7Diosqa jark'achinata ruwarqa yakuta iskayman t'aqajta: Khuskan qhepakorqa urapi, khuskantaj patapi. 8Chay iskayman t'aqaj yaku jark'achinata suticharqa: Cielo, nispa. Ajinamanta ch'isiyaywan sut'iyaywan iskay kaj p'unchay karqa. 9Chaymantá Dios nerqa: Cielo urapi kaj yakoqa uj cheqallapi kachun, ch'aki kaj rikhurinampaj, nispa. Ajinataj karqa. 10Chay ch'aki kajta Diosqa suticharqa: Jallp'a, nispa. Yaku uj cheqallapi tantakojtataj suticharqa: Mama qocha, nispa. Chayta Dios rikorqa sumaj kasqanta. 11Chantá Dios nillarqataj: Jallp'api tukuy laya q'omerkuna wiñachun: Mujoj qhoras, poqoj sach'as ima, nispa. Ajinataj karqa. 12Jallp'api wiñarqa tukuy laya q'omerkuna: Qhoras, mujojkuna, poqoj sach'as ima. Chayta Dios rikorqa sumaj kasqanta. 13Ajina ch'isiyaywan sut'iyaywan kinsa kaj p'unchay karqa. 14Chaymantá Dios nerqa: K'anchaykuna kachun cielopi, p'unchayta wajman, tutatataj wajman t'aqanampaj, jinallataj señal kanampaj tiempospaj, p'unchaykunapaj, wataspajwan. 15K'anchaykuna kachun cielopi jallp'ata k'anchanankupaj, nispa. Ajinataj karqa. 16Dios ruwarqa iskay jatuchaj k'anchaykunata, sinch'i kajta p'unchaypi k'anchanampaj, pisi kajtataj tutapi k'anchanampaj. Chaymantá ruwallarqataj ch'askasta. 17Dios churarqa k'anchaykunata cieloman, jallp'ata p'unchaynintin, tutantin k'anchamunankupaj, k'anchaytataj wajman, laqhatapis wajman t'aqanankupaj. Chayta Dios rikorqa sumaj kasqanta. 19Ajina ch'isiyaywan sut'iyaywan tawa kaj p'unchay karqa. 20Chantá Dios nerqa: Yakupi rikhurichunku ashkha animales; jinallataj p'isqospis jallp'a patata phawaykachajkuna kachunku, nispa. Ajinataj karqa. 21Dios ruwarqa jatuchaj manchachikuna jina animalesta mama qochapi, tukuy laya khurustawan, layankuman jina yakupi kawsajkunata, jinallataj tukuy laya p'isqostapis layankuman jina. Chayta Dios rikorqa sumaj kasqanta. 22Dios chay tukuynin animalesta bendecispa, nerqa: Miraychej, mama qocha yakuman junt'achiychej. Phawajkunapis jallp'a patapi mirachunku, nispa. 23Ajina ch'isiyaywan sut'iyaywan phishqa kaj p'unchay karqa. 24Chantá Dios nerqa: Jallp'a patapi kawsachunku tukuy laya animales: Monte animales, uywas, pampata qhatatakojkuna ima, layankuman jina, nispa. Ajinataj karqa. 25Dios ruwarqa monte animalesta layankuman jina, uywasta layankuman jina, jinallataj pampata qhatatakoj animalestapis layankuman jina. Chaytataj Dios rikorqa sumaj kasqanta. 26Chay qhepata Dios nerqa: Runata ruwanachej noqanchejman rijch'akojta. Tukuynin animalesmanta aswan atiyniyoj kachun; atiynin urapi kachunku: challwas, p'isqos, tawa chakiyojkuna, jallp'a patapi qhatatakojkuna ima, nispa. 27Diosqa runata ruwashaspa, Payman rijch'akojta ruwarqa; qharita warmitawan ruwarqa. 28Chantá paykunata bendecispa, nerqa: Miraychej, kay pachaman junt'aychej; atiyniyojtaj kaychej, kamachispa mama qochapi kaj challwasta, tukuy p'isqosta, jallp'a patapi tukuy qhatatakojkunatawan, nispa. 29Chaymantá paykunaman nerqa: Qhawariychej, qankunaman qoykichej jallp'a patapi tukuy mujoj plantasta, tukuy sach'astawan. Chaykunaqa mikhunaykichejpaj kanqa. 30Tukuy monte animalesman, p'isqosman, jallp'a patapi tukuy qhatatakojkunamampis q'omer qhorasta qoni mikhunankupaj, nispa nerqa Diosqa. Ajinataj karqa. 31Dios rikorqa tukuy ima ruwasqanqa sumajpuni kasqanta. Ajinamanta ch'isiyaywan sut'iyaywan junt'akorqa sojta kaj p'unchay.

will be added

X\