GÁLATAS 4

1Chantá nillanitaj: Herenciata jap'ejqa wawallaraj kashaspa, kamachi jinallaraj kashan, tukuy imamanta dueño kashaspapis. 2Herenciata jap'ej wawaqa uywajkunaj, qhawajkunaj kamachiyninkupi kanan tiyan, tatampa nisqan p'unchaykama. 3Ajinallataj noqanchejpis wawas kashaspaqa, kamachis karqanchej kay pachaj kamachisqasninta kasuspa. 4Chantá chay chayamunan p'unchay junt'akojtin, Dios kachamorqa Churinta uj warmimanta nacekunampaj, leyta kasuspataj kawsanampaj. 5Jinaspataj, leypa kamachiynimpi kajkunata preciowan kacharicherqa tukuyninchej Paypa wawasnin jina rejsisqa kananchejpaj. 6Wawasninña kajtiykichejtaj, Diosqa Churimpa Espiritunta sonqoykichejman kachamorqa, Paytaj Dios Tataman qhaparikun: Tatáy, Tatáy, nispa. 7Ajinaqa sapa ujniykichej manaña kamachichu kankichej, astawanqa Diospa wawasnin. Wawanña kanki chayrí, Diosqa herenciata qosonqa. 8Cheqamanta ñawpajta manaraj Diosta rejsishaspa, wata runas jina sirverqankichej ruwasqa dioskunata, mayqenkunachus mana diospunichu kanku, chaykunata. 9Kunantajrí Diosta rejsispaña, chayrí Diospa rejsisqasnin kaspa, imaraykutaj ujtawan kutipuyta munankichej mana kallpayoj, mana sirvej yachachiykunaman, wata runasnin jina watejmanta chayta sirvinaykichejpaj? 10Qankunaqa waqaychankichej jatun p'unchaykunata, killasta, watasta ima. 11Llakikuni yuyaspa qankuna ukhupi ruwasqayqa qhasipájsina kananta. 12Mañakuykichej hermanos, noqa jinaman tukunaykichejta, imaraykuchus noqapis qankuna jinaman tukuni. Noqataqa mana ima sajratapis ruwawarqankichejchu. 13Qankunaqa yachankichej: Qallariypeqa onqosqa kasqayrayku evangeliota willarqaykichej. 14Ajina onqosqa kashajtiypis, mana pisipajchu qhawawarqankichej, nitaj wijch'uwarqankichejchu; astawanqa wajyarikuwarqankichej Diospa angelninta jina, Cristo Jesuspis kayman karqa, ajinata. 15Maytaj kunan chay jina kusiyniykichejri? Qankunamanta niyta atini: Chay kutipeqa atiwajchejchus karqa chayqa, ñawiykichejtapis orqhokuspa, qowankichejman karqa. 16Kunanrí qankunaman cheqa kajta nisqayraykuchu enemigoykichejman tukuni? 17Chay runasqa mayta munanku sonqosniykichejta suwayta, chaytajrí mana allin yuyaywanchu; manachayqa noqaykumanta qankunata karunchachiyta munasunkichej paykunaman k'askakunaykichejpaj. 18Sichus allin yuyaywan kanman chayqa, wajkunamanta dakuspa sonqo suwanaqa walejlla; chaywampis chayqa tukuy tiempo kanan tiyan, manataj noqa chaypi kashajtillaychu. 19Wawitasníy, ujtawan ñak'arishani nanaykunawan uj nacechikoj warmi jina, Cristoj imaynachus kasqan qankunapi rikhurinankama. 20Munayman kunampacha qankunawan kayta, waj jinamantaña qankunawan parlaspa. Qankunamanta imatachus yuyanayta mana yachanichu. 21Niwaychej, qankuna leypa kamachiynimpi kayta munajkuna: Manachu leypa nisqanta uyarerqankichej? 22Diosmanta Qhelqasqapi nin Abrahampata iskay churisnin kasqankuta, ujnin kajqa kamachin Agarpi, ujnintaj warmin Sarapi. 23Kamachi kajpataqa aychaman jina nacekorqa; warmimpi kajpatatajrí Diospa qosaj nisqanman jina nacekorqa. 24Kaytaj niyta munan chay iskay warmisqa iskay tratoswan ninakusqankuta. Uj tratoqa Sinaí Orqomanta jamun, chaytaj Agar; paypa wawasnin kamachis kanankupaj nacekunku. 25Agarqa ninakun Sinaí Orqowan, Arabiapi kashan, chaywan. Chay ninakullantaj kay tiempomanta Jerusalenwan, imaraykuchus Jerusalenqa wawasninwan kamachispuni kanku. 26Pata kaj Jerusalenrí mamanchej, chaytaj mana kamachichu. 27Diosmanta Qhelqasqapi nin: Kusikuy, mana nacechikoj warmi; jatunmanta qhaparispa kusikuy, nacechikoj warmej nanayninta mana rejsej, imaraykuchus saqerpayasqa kaj warmeqa aswan ashkha wawasniyoj, qosayoj warmimanta nisqaqa. 28Ajinaqa hermanos, qankunaqa Isaac jina Diospa qosaj nisqampa wawasnin kankichej. 29Chaypacha aychaman jina nacejqa Espirituman jina nacejta qhatiykacharqa. Kunampis jinallataj kashan. 30Astawanqa ima nintaj Diosmanta Qhelqasqapiri? Ajinata nin: Jawaman qharqoy kamachi warmita, churintawan, imaraykuchus kamachi warmej churenqa mana herenciata jap'enqachu mana kamachi kaj warmej churinwan khuska, nispa. 31Ajinaqa, hermanos, mana kamachi warmej wawasninchu kanchej, manachayqa mana kamachi kajpata.

will be added

X\