ESDRAS 6

1Chantá jatun kamachej Darioqa kamacherqa chayta mask'anankuta Babiloniapi, maypichus qhelqakunata waqaychaj kanku, chaypi. 2Chantá Media jap'iypi, Ecbatana llajtapi, camachina wasipi uj qhelqata tarerqanku, chaypitaj kay jina qhelqasqa kasqa: 3Persiamanta jatun kamachej Ciroqa uj watataña kamachishaspa, kay jinata kamacherqa: Jerusalenpi Diospa Templonqa watejmanta ruwasqa kachun, chaypi uywasta ñak'aspa Diosman jaywanapaj. Jinaqa cimiento churakuchun; chay waseqa sayayninman kanqa iskay chunka qanchisniyoj metros, anchonmantaj iskay chunka qanchisniyoj metro kachun. 4Perqanqa kachun kinsa sinru jatuchaj ch'eqosqa rumimanta, ujnin sinrutaj mosoj k'aspimanta kachun. Chay ruwakunampajqa kamachej paganqa. 5Qorimanta, qolqemanta ruwasqa imakunata Jerusalenpi Diospa Templonmanta jatun kamachej Nabucodonosor orqhospa, Babiloniaman apachisqa. Kunanqa chay tukuy imakuna Jerusalenman kutichisqa kachunku. Chaypeqa Diospa Templompi maypichus kananku, chay kikinman churasqa kachunku, nispa. 6Chayrayku jatun kamachej Darío kamacherqa kay jinata: "Éufrates Mayu chimpapi kamachej Tatenai, chantá Setar-boznai, kamachej masiykichejkunawan ima, 7Jerusalenmanta llojsiychej; saqeychej, judiokunata kamachejninkuta, kurajkunata ima Diospa Templonta maypichus kanampi ruwajta. 8Jinallataj kamachiykichej qankuna judiokunaj kurajninkuta yanapanaykichejta, Diospa Templonta watejmanta ruwachinankupaj: Éufrates Mayu chimpamanta kamachejpaj qonku, chay qolqemanta orqhospa, ruwajkunan pagachunkupuni, ajinamanta templo ruwanaqa ama sayanampaj. 9Ama qonqaychejchu sapa p'unchay jaywayta Jerusalenpi sacerdotekuna nisqankuman jina: Torillokunatachus, carnerokunatachus, chayrí corderokunatachus, janaj pachapi kaj Diosman jaywaspa ruphachinankupaj; manachayqa, trigotachus, kachitachus, vinotachus, aceitetachus. 10Ajinamanta chay imakunata ima munay q'apashajta jaywanqanku janaj pachapi kaj Diosman, chantapis kamachejpaj, wawankunapajpis Diosmanta mañapuchunku. 11Kamachillanitaj, pillapis kay kamachisqayta mana kasojtaqa, paypa wasillamantataj uj k'aspita sik'ispa, chaypi t'ojsisqata chakatachunku. Wasintaj thuñisqa kachun, q'opa wijch'unamantaj tukuchun. 12Mayqen kamachejchus, chayrí llajtachus, Jerusalenpi kashan, chay Temploj contrampi mana allinta ruwayta munanqa chayqa, sutin yupaychasqa kananpaj, Jerusalenta ajllakoj Diosmin paytaqa chinkachichun. Noqa Darío kaytaqa kamachini. Kay nisqayqa kikimpuni junt'akuchun, nispa". 13Chaypacha, Éufrates Mayu chimpapi kamachej Tatenai, chantá Setar-boznaiwan, kamachej masikunawantaj, kamachej Daríoj kamachisqantaqa kikintapuni junt'arqanku. 14Ajinamanta, judiokunata kamachejkunaqa, watejmanta ruwasharqanku, chay Templota ruwallarqankupuni, diosmanta willaj Hageoj nisqanman, chantá, Iddojpa wawan Zacarías diosmanta willaj nisqanman jina. Chay Temploqa tukuchasqa karqa Israelpa Diosnin kamachisqanman jina, chantapis, Persiamanta jatun kamachejkuna Ciro, Darío, Artajerjes 15Chay Temploqa tukuchasqa karqa, Adar nisqa killamanta kinsa p'unchay kashajtin, Persiapi jatun kamachej Darío sojta watataña kamachishajtin. 16Chaypachaqa, israelitakuna, sacerdotekuna, levitakuna, chantá wajkunawantaj, preso apasqa kasqankumanta kutimporqanku chaykunaqa, manchay kusisqa chay Templota Diosman jaywaporqanku. 17Chaypacha Diosman jaywarqanku pachaj torillokunata, iskay pachaj carnerokunata, tawa pachaj corderokunatataj. Chantapis chunka iskayniyoj chivokunatapis jaywallarqankutaj tukuynin israelitakunajpa juchankumanta, mashkha aylluchus kasqankuman jina. 18Chaymantá sacerdotekunataqa mit'ankuman churarqanku, jinallataj levitakunatapis sapa ujta ruwanasninkuman, Jerusalenpi Diosta yupaychanankupaj, Moisespa qhelqasqaman jina. 19Chantá preso apasqa kajkunamanta kutimpojkunaqa Pascua fiestata ruwarqanku, ñawpaj kaj killamanta chunka tawayoj p'unchaypi. 20Sacerdotekuna, chantá, levitakuna imaqa mayllakusqankurayku tukuyninku llimphuña karqanku. Chaymanta Pascua fiestapi jaywana kajta jaywarqanku, preso apasqa kasqankumanta kutimporqanku chay tukuyninkurayku, sacerdotekunarayku, jinallataj paykuna kikinkuraykupis. 21Tukuynin israelitakuna, pikunachus Babiloniamanta kutimpojkunaqa, mikhorqanku Pascua fiestapi wakichisqa mikhuyta. Jinallataj chay jallp'api tiyakojkuna millay kawsayninkumanta t'aqakorqanku, Israelpa Tata Diosninta yupaychayta munaspa, chaykunapis israelitakunawan khuska Pascua mikhuyta mikhullarqankutaj. 22Qanchis p'unchay junt'ata mana levadurayoj t'anta fiestata manchay kusiywan ruwarqanku, imaraykuchus Tata Dios paykunata kusicherqa, Persiamanta kaj kamachejpa sonqonta llamp'uyacherqa, paykunata yanapanampaj Israelpa Diosnimpa Templonta ruwayta.

will be added

X\