ESDRAS 10

1Diospa Templompa ñawpaqempi, pampakama k'umuykuytawan, Esdrasqa waqan waqan juchankuta Diosman rimarisharqa. Chaykamataj israelitakunamanta ashkha qharikuna, warmikuna, wawakuna ima, qayllanman muyuykamuspa jik'un jik'unta waqallarqankutaj. 2Chaypacha Elampa ayllunmanta Jehielpa wawan Secaniasqa Esdrasman parlaspa, nerqa: Noqaykoqa Diosninchejpa contrampi juchalliyku, imaraykuchus waj llajtayoj warmikunawan casarakorqayku. Chaywanpis Israel suyupaj suyay kanran. 3Kunanqa Diosninchejwan tratota ruwasqayku waj llajtayoj warmikunata, wawankutawan kachapunaykuta kamachisqa junt'akunampaj, imaynatachus qan, chantá pikunachus Diospa kamachisqanta kasunku, chaykuna yuyaychawasqaykuman jina. 4Sayarillayña, imaraykuchus qanmin kayta ruwanayki tiyan, noqaykutaj nisqaykiman jina ruwasqayku. Kallpachakuspa, qallariypacha, nispa. 5Chantá Esdras sayarikuspa, juramentota ruwacherqa sacerdotekunajpa kurajninkuta, jinallataj levitakunajpa kurajninkuta, tukuynin israelitakunajpa kurajninkukunatapis trato ruwasqankuta junt'anankupaj. Paykunataj juraspa, junt'anankuta nerqanku. 6Chaymanta Esdrasqa Diospa Templonmanta llojserqa Eliasibpa wawan Johananpa wasinman rinampaj. Chaypitaj mana imata mikhuspa, nitaj imatapis ujyaspa tutantin, may phutisqataj karqa, babilonimanta kutimojkuna juchallisqankumanta. 7Chay qhepata tukuynin babiloniamanta kutimojkuna wajyachisqas karqanku Judapi tiyakojkuna, Jerusalenpi tiyakojkuna ima, Jerusalenpi tantakunankupaj. 8Kurajkuna chantá yuyaychajkuna kamacherqanku, pillapis kinsa p'unchaypi mana chayamunman chayqa, babiloniamanta kutimojkuna ukhumanta wijch'usqa kananta, jallp'antataj qhechunankuta. 9Chayrayku Judamanta kajkuna, Benjaminmanta kajkunapis kinsa p'unchay ukhupi Jerusalenpi tantakorqanku. Chay karqa jisq'on killamanta iskay chunka p'unchaynimpi. Chantá Diospa Templompa patiompi tukuyninku tiyarakorqanku, kharkatitispa imatachus parlanankumanta, chantá manchayta parasqanmantawan. 10Chaypacha sacerdote Esdrasqa sayarikuspa, nerqa: – Qankunaqa Diosta wasanchaspa, waj llajtayoj warmikunawan casaraykorqankichej, ajinamanta Israel suyu juchanman yapaykuspa. 11Chayrayku tatasniykichejpa Tata Diosninku ñawpaqempi qankunaqa juchaykichejta willakuychej, Tata Diospa munaynintataj junt'aychej. T'aqakuychej Diosta mana kasojkuna runakunamanta, jinataj waj llajtayoj warmikunamantapis, nispa. 12Chantá tukuynin runakuna jatunmanta qhaparispa, kuticherqanku: –Arí, imatachá kamachiwasqaykuta, ruwasqayku. 13Askha kayku, manchaytataj paramushan; chayrayku mana jawallapi qhepakuykumanchu. Kayqa mana uj p'unchayllapichu nitaj iskay p'unchayllapichu allinchana kashan, imaraykuchus askha kayku kay juchata ruwajkunaqa. 14Aswan allin kanman kurajniykukuna noqaykuj cuentaykumanta qhepakunankoqa. Tukuy pikunachus llajtankupi tiyakunku, waj llajtayoj warmikunawantaj casararqanku, chaykunaqa uj señalasqa p'unchaypaj, wajyachisqaman jina jamuchunku kamachejkunawan juezkunankuwan khuska. Chay jinamanta Diospa k'ajaj phiñakuynin tiyaykonqa, nispa. 15Asaelpa wawan Jonatan, Ticvaj wawan Jahaziaswan mana munarqankuchu. Paykunaj nisqankuman yanapaykorqanku Mesulam, chantá Sabetai levitawan. 16Babiloniamanta kutirimojkunarí chayta ruwarqanku. Chantá Esdras sacerdoteqa ajllarqa wakin runakunata, ayllunkumanta kurajkuna karqanku, chaykunata sutisninkuman jina. Chunka kaj killa qallariypi tantakuspa, parlarqanku sapa ujmanta sut'ita yachanankupaj. 17Wata qallariy killapi, killa qallariyta parlayta tukorqanku, waj llajtayoj warmikunawan casarasqanku, chay runakunamanta. 18Waj llajtayoj warmikunawan casarasqanku, chay sacerdotekuna kaykuna karqanku: Josadacpa wawan Josuejpa ayllunmantawan, wawqenkunamantawan karqanku kaykuna: Maasías, Eliezer, Jarib, Gedalías ima. 19Paykunaqa warminkuta kachapunankuta nerqanku, uj carnerotataj juchanku panpachasqa kananpaj qorqanku . 20Imerpa ayllunmanta karqanku: Hanani, Zebadías ima. 21Harimpa ayllunmanta karqanku: Maasías, Elías, Semaías, Jehiel, Uzías ima. 22Pasurpa ayllunmanta karqanku: Elioenai, Maasías, Ismael, Natanael, Jozabad, Elasá ima. 23Leví ayllunmanta karqanku: Jozabad, Simí, Quelaías, waj sutin Quelitá karqa, Petahías, Judá, Eliezer ima. 24Takejkunamanta karqa Eliasib. Punkuta qhawajkunamanta karqanku: Salum, Telém, Urí ima. 25Israelitakunamanta Parospa ayllunmanta karqanku: Ramía, Jezías, Malquías, Mijamín, Eleazar, Malquías, Benaías ima. 26Elampa ayllunmanta karqanku: Matanías, Zacarías, Jehiel, Abdí, Jeremot, Elías ima. 27Zatujpa ayllunmanta karqanku: Elioenai, Eliasib, Matanías, Jeremot, Zabad, Azizá ima. 28Bebaijpa ayllunmanta karqanku: Johanán, Hananías, Zabai, Atlai ima. 29Banijpa ayllunmanta karqanku: Mesulam, Maluc, Adaías, Jasub, Seal, Ramot ima. 30Pahat-moabpa ayllunmanta karqanku: Adná, Quelal, Benaías, Maasías, Matanías, Bezaleel, Binuy, Manasés ima. 31Harimpa ayllunmanta karqanku: Eliezer, Isías, Malquías, Semaías, Simeón, 32Benjamín, Maluc, Semarías ima. 33Hasumpa ayllunmanta karqanku: Matenai, Matatá, Zabad, Elifélet, Jeremai, Manasés, Simí ima. 34Banijpa ayllunmanta karqanku: Madai, Amram, Uel, 35Benaías, Bedías, Queluhu, 36Vanías, Meremot, Eliasib, 37Matanías, Matenai, Jaasai ima. 38Binuypa ayllunmanta karqanku: Simí, 39Selemías, Natán, Adaías, 40Macnadebai, Sasai, Sarai, 41Azarel, Selemías, Semarías, 42Salum, Amarías, José ima. 43Neboj ayllunmanta karqanku: Jeiel, Matatías, Zabad, Zebiná, Jadau, Joel, Benaías ima. 44Chay tukuyninku waj llajtayoj warmikunawan casaraykusqanku, chaywanpis warminkuta wawankutapis kachaporqanku.

will be added

X\