EZEQUIEL 6

1Tata Diosqa parlamuwaspa, niwarqa: 2Runaj Churin, Israelpa orqosninta qhawariy, sutiypitaj paykunaj contrampi sut'inchay kay jinata: 3Uyariychej Israelpi orqos, imatachus Tukuyta Kamachej Tata Dios nisqanta lomasman, mayusman, vallesman ima: Wañuchinaku maqanakuta qankunaman apachimusqaykichej, lantita yupaychanasniykichejtataj thuñirasaj. 4Altaresniykichejta, intiman rijch'akoj lantisniykichejtapis t'unarasaj, runasniykichejtataj lantisniykichejpa ñawpaqenkupi wañurachisaj. 5Israelitaspa ayasninkuta lantisninkoj ñawpaqenkuman churasaj, tullusniykichejtataj altaresniykichejpa muyuyninman wijch'urasaj. 6Maypichus tiyakunkichej, chay tukuynejpi llajtasqa thuñisqallataj kanqanku. Altaresniykichejqa tukuynin phirisqapuni kanqanku. Lantisniykichej, intiman rijch'akoj lantisniykichejpis phirisqa kanqanku; inciensota q'oshñichinaykichej altarespis thuñichisqallataj kanqanku; tukuy ima ruwasqasniykichejpis chinkachisqa kanqanku. 7Chay chhika runas qankuna ukhumanta wañurajta rikuspa, yachankichej Noqa Tata Dios kasqayta. 8Chaywampis Noqa saqesaj qankunamanta wakinkuna ama wañunankuta, astawanqa kawsanankuta waj nacionesman ch'eqerasqa kasqankupi. 9Chay nacionesman ayqekojkunaqa Noqamanta yuyarikuwanqanku. Yuyarikullanqankutaj imaynatachus Noqa paykunata ñak'arichisqayta Noqawan mana allinta kawsasqankurayku, lantista yupaychanankupaj Noqamanta karunchakuspa. Paykuna kikinku p'enqachikonqanku tukuy sajra ruwasqankumanta, tukuy ima khuchiriosta ruwasqankumanta ima. 10Chaypacha yachanqanku Noqa Tata Dios kasqayta, imaraykuchus mana qhasitachu chay mana allin imasta paykunaman apachimunayta nerqani. 11Tukuyta Kamachej Tata Diosqa kay jinata nin: Pechoykita takakuy, chakisniykiwantaj sapateyay. Israel aylloj millay imasta ruwasqasninmanta nanaywan qhaparqachay, imaraykuchus wañuchinaku maqanakupi, yarqhaywan, wañuchej onqoywantaj wañonqanku. 12Karupi kajkunaqa wañuchej onqoywan wañonqanku, qayllapi kajkunataj wañuchinaku maqanakupi wañonqanku. Kawsashajkunataj yarqhaywan wañuranqanku. Ajinata phiñakuyniyta paykunawan thasnukusaj. 13Maypachachus runa wañurasqasta rikonqanku lantisninku chawpipi, altarespa muyuynimpi, chantá orqos patapi, lomaspa kinraykunampi, jinallataj thansa sach'as urapi, encinas nisqa thansarara sach'as urapi, chantá maypichus tukuy lantisninkuman inciensota q'oshñicherqanku, chay tukuynejpitaj, chaypacharaj yachanqanku Noqa Tata Dios kasqaytaqa. 14Makiyta oqharisaj paykunata castiganaypaj, uray ladopi ch'in pampamanta wichaypi kaj Ribla nisqa chaykama. Maynejpichus tiyakunku, chay jallp'astaqa mancharina ch'inman tukuchisaj. Chaypacharaj yachanqanku Noqa Tata Dios kasqaytaqa.

will be added

X\