EZEQUIEL 42

1Chantá chay runaqa jawa patioman orqhomuwaspa, wichaynejman, chantá wichay ladopi kaj cuartosman pusaykuwarqa. Chaykuna ukhu patioman qhawarisqa karqanku, Temploman k'askasqa. 2Wichay ladopi kaj punku ñawpaqenqa sayt'unman phishqa chunka metrosniyoj karqa, anchonmantaj iskay chunka phishqayoj metrosniyoj. 3Ukhupi patioman yaykunaqa chunka metrosniyoj anchonman karqa, ujnin ladopitaj jawa kaj patioman rina kajqa rumiswan losasqa karqa. Chay cuartos kasharqanku ujkunaqa uj chimpapi, ujkunataj uj chimpapi; chay cuartostaj kinsa altos patasniyoj karqanku. 4Cuartospa ñawpaqenkupi uj corredor karqa anchonman phishqa metrosniyoj, sayt'unmantaj phishqa chunka metrosniyoj; chayninta ukhuman yaykuna karqa. Cuartospa punkusninkutaj wichaynejman qhawarisqa karqanku. 5Altospi kaj cuartosqa aswan k'ullkus karqanku chawpi altopi kajkunamanta nisqaqa, imaraykuchus sapa altomanta jina aswan ithiykusqa karqanku urapi kajkunamantaqa. 6Kinsa kaj alto patapi, mana patiopi kaj cuartos jina sayantasniyojchu karqanku, manachayqa patapi kaj cuartosqa aswan k'ullkus karqanku chawpipi kajkunamanta, urapi kajkunamantapis. 7Patio jawapi kaj cuartospa ñawpaqenkupi perqaqa iskay chunka phishqayoj metrosniyoj karqa. 8Chay cuartospa ñawpaqenkupi kaj patio perqataj, iskay chunka phishqayoj metros sayt'unman karqa jawa pationejman. Corredortaj tukuynimpi phishqa chunka metrosniyoj karqa. 9Inti llojsimuy ladopi kaj punkoqa chay cuartospa urampi karqa, jawa patiomanta yaykunapaj. 10Inti llojsimuy lado patio perqaj sayt'unnejpeqa cuartospis kallarqankutaj, ñawpaqempitaj corredorniyoj karqa. 11Chay cuartospa corredorninku, wichay ladopi kaj cuartospata jinallataj karqa, sayt'unmampis jinataj anchonmampis. Jinallataj yaykunasniyoj, llojsinasniyoj karqa. 12Uray ladopi kaj cuartosman chayanapajqa, corredor qallarikushan, chaynejpi punku karqa, chaytaj karqa inti llojsimuy cheqa perqaj chimpampi; chayninta chay cuartosman yaykuna karqa. 13Chay runaqa niwarqa: Wichay ladopi kaj cuartos, jinallataj uray ladopi kaj cuartospis, mayqenkunachus patio wisq'asqapi kashanku, chay cuartosqa Diospaj t'aqasqa kanku. Chaypeqa Tata Diospaj t'aqasqa sacerdotes mikhunku Tata Diosman jaywasqa kaj imasta. Paykunaqa chayllamantaj Diosman jaywasqa imasta churanku, uywa wañuchisqasta, jucharayku jaywasqasta ima, imaraykuchus chay cheqaqa Diospaj t'aqasqamin. 14Sacerdotesqa Temploman yaykuspaqa, jawa patioman mana llojsinankuchu tiyan, ima p'achawanchus ruwasharqanku, chay p'achanta mana orqhokuspaqa, imaraykuchus chay p'achaqa Diospaj t'aqasqamin. Maypichus runas kashanku, chayman rinankupajqa waj p'achata churakunanku tiyan. 15Chantá chay runaqa Temploj ukhunta midiyta tukusqantawan, jawaman pusawarqa inti llojsimuy lado punkunejta. Chantá Temploj jawa muyuynimpi jallp'anta midiyta qallarerqa. 16Midina varawan inti llojsimuy ladota miderqa; iskay pachaj phishqa chunka metrosniyoj karqa. 17Midillarqataj wichay ladota; iskay pachaj phishqa chunkayoj metrosniyoj karqa. 18Chantá uray ladotañataj miderqa; iskay pachaj phishqa chunkayoj metrosniyojllataj karqa. 19Chantá inti yaykuy ladotañataj midillarqataj; chaypis iskay pachaj phishqa chunkayoj metrosniyojllataj karqa. 20Tawantin ladosta miderqa. Temploj jallp'anqa, muyuynimpi sapa ladoman iskay pachaj phishqa chunkayoj metrosniyoj perqawan muyuykusqa karqa, chay perqawan Diospaj t'aqasqa imasta waj imasmanta t'aqanampaj.

will be added

X\