EZEQUIEL 41

1Chantá runaqa Templo ukhuman pusaykuwaspa, sayantasninta miderqa. Sapa uj sayanta kinsa metrosniyoj karqa. 2Punkonqa anchonman phishqa metrosniyoj karqa. Punkoj perqasnintaj purajman iskay metrosniyoj karqanku. Chaymantaqa chawpinta midillarqataj, chaytaj iskay chunka metrosniyoj sayt'unman karqa, anchonmantaj chunka metrosniyoj. 3Chantá aswan ukhunejman pusaykuwaspa, midillarqataj punkoj sapa sayantasninta; sapa ujnin uj metroyoj rakhunman karqa. Yaykuna punkutaj kinsa metrosniyoj anchonman karqa. Sayantasnintaj sapa ujnin kinsa metros phishqa chunka centimetrosniyoj karqanku, jinallataj rakhunmampis. 4Chaymanta aswan ukhu kajtañataj miderqa, chaytaj sayt'unman chunka metrosniyoj karqa, anchonmampis kikillantaj. Chantá Temploj ñawpaqempi niwarqa: Kaymin Aswan Santo nisqa cheqaqa, nispa. 5Chaymanta runaqa midillarqataj Temploj jawa perqanta, chaytaj kinsa metros phatu karqa. Temploj muyuynimpitaj cuartos karqa, chaykunataj iskay metroskama anchonman karqanku. 6Chay cuartostaj patan patampi kinsa alto patasniyoj ruwasqa karqanku, sapa altopitaj kinsa chunka cuartos karqanku. Wasi perqapi muyurisqa, llojsisqasniyoj ruwasqa karqanku. Chaykunapi wasisqa atisqa karqanku, chay jinamanta Templo perqapi ama atiykukunampaj. 7Aswan pata kaj cuartosqa aswan anchos karqanku. Cuartos ukhunejpi kaj patillanejta patakama wicharina karqa. Chay jinamanta cuartosqa pataman aswan ancho karqa. Urapi kaj cuartosmanta chawpi altoman wicharina karqa, chaymantataj aswan patapi kaj cuartosman. 8Temploqa alto cimientosniyoj karqa. Temploj cimientontaj kinsa metros alto karqa. 9Cuartospa jawa perqasninkoqa iskay metros phishqa chunka centimetrosniyoj phatus karqanku uj cuartomanta ujnin cuartokama. 10Ujnin cuartomanta ujnin cuartokamaqa purajman chunka metrosniyoj karqa. 11Cuartospa punkusninkoqa ujnin wichaynejman qhawarisqa karqa, ujnintaj uraynejman qhawarisqa. Chay juch'uy patio qhepakorqa, chaytaj iskay metros phishqa chunka centimetrosniyoj tukuy muyuyninman karqa. 12Inti yaykuynejpi, patioman qhawarisqa uj wasi karqa. Chay kajqa anchonman kinsa chunka phishqayoj metrosniyoj karqa, sayt'unmantaj tawa chunka phishqayoj metrosniyoj, perqataj iskay metros phishqa chunka centimetrosniyoj phatu karqa. 13Chantá chay runaqa Templota miderqa, chaytaj sayt'unman phishqa chunka metrosniyojllataj karqa. Patio ukhoqa wasiwan, tukuynin perqaswan ima phishqa chunka metrosllataj karqa. 14Temploj uyanqa patio ukhuman inti llojsimuynejman qhawarisqa karqa, phishqa chunka metrosniyojtaj. 15Chantá perqa ruwasqata sayt'unman midillarqataj, Temploj qhepa ladon kajta, mayqenchus ukhu patioj chimpan karqa, chayta. Chantá perqatapis sapa ladoman midillarqataj, chaytaj phishqa chunka metrosniyoj karqa. 16Temploj ukhumpi, cuartos, corredorpa punkumpis, chantá kinsa altosniyoj cuartospis pampamantapacha ventanakama maderawan k'askachisqa karqanku. Ventanaspis kikillantaj karqanku. 17Templo patamanta ukhu kaj wasikama chay wasej jawanta, tukuynin perqasninta, ukhunta jawantawan chay runaqa miderqa. 18Querubineswan, palma sach'a warawaswan imaqa kikin perqapi ruwasqa karqanku. Sapa iskay querubinespa chawpinkupi uj palma sach'a karqa. Sapa uj querubintaj iskay uyasniyoj karqa. 19Ujnin uyanqa runaj uyan karqa, palmanejman qhawarisqa, ujnin uyantaj leompa uyan jina, ujnin ladompi kajtaj palmanejman qhawarisqa. Templo perqaqa chay jina ruwasqawan muyuykusqa karqa. 20Pampamantapacha punkuspa patankama chay jina querubineswan, palmaswan kikin perqasnimpi ruwasqasniyoj karqa tukuy Temploj ukhumpi. 21Temploj sayantasnenqa tawa esquinasniyoj karqanku. Aswan Santo nisqa cheqampa chimpampi kikillantaj karqa. 22Maderamanta ruwasqa altarqa sapa ladoman iskay metrosniyoj karqa. Uramanta patamantaj uj metro khuskanniyoj karqa. Esquinasnin pampaman, jinataj ladosnimpis maderamanta karqa. Chay runataj niwarqa: Kay mesamin Tata Diospa ñawpaqempi kashan, nispa. 23Templowan, Aswan Santo cheqawanqa iskay punkusniyoj karqanku. Chay wisq'anastaj sapa ujpata iskayman kicharikoj kanku perqa ladoman. 25Temploj wisq'anasnimpipis querubineswan, palma sach'aswan warawasqa karqanku, imaynachus Temploj perqasnimpi, chantá patio jawa perqaspipis karqa, ajina. Yaykunapitaj maderamanta wisq'anayoj karqa. 26Corredor punkoj ladompi rejillasniyoj ventanas karqanku, puraj ladosnimpi palma warawasniyoj. Temploman k'askasqa cuartospis rejillasniyojllataj karqanku.

will be added

X\