EZEQUIEL 4

1Runaj Churin, qanqa uj adobeta oqharispa, ñawpaqeykiman churay, chay adobepitaj Jerusalén llajtata dibujay. 2Chaymanta soldadoswan muyuykuchiy, maqanakupaj armaswan ima. Jinallataj perqasta ruwaray muyuynimpi, jallp'a moqostawan, atipanapaj muyuykusqa llajta jina rikukunampaj. 3Chantá uj p'alta fierrota oqhariy, chaytataj qanta llajtamanta t'aqasunampaj churay perqapis kanman jina. Qantaj llajta cheqanman qhawarispa, wañuchinaku maqanakuman yaykunaykipaj jina sayaykuy. Chayqa israelitaspaj uj señal jina kanqa. 4Qanqa lloq'emanta siriykunki, Israel aylloj juchasnintataj pataykiman churaykukunki. Mashkha p'unchaykamachá siriykunki, chaykama chay aylloj juchasninta pataykipi apanki. 5Mashkha watatachus paykuna juchallerqanku, chay chhika p'unchaykunata Noqa rikuchiyki, chaytaj ruwakun kinsa pachaj jisq'on chunkayoj p'unchaykuna. Chay chhika p'unchaykunata Israel aylloj juchanta apanki. 6Chay tiempo junt'akojtinkama, pañamantañataj siriykunki. Judá aylloj juchantañataj pataykiman churaykukunki tawa chunka p'unchay junt'akunankama, uj p'unchayta sapa wata juchallisqanmanta. 7Chantá enemigoswan muyuykusqa Jerusalén cheqakojman kutirikunki. Makiykita q'empirakuytawan, Jerusalenpa contrampi sutiypi parlanki. 8Noqa waskhawan wataykusqayki ama purajman tijraykachakunaykipaj, mashkha p'unchaytachus ñak'arinayki kanqa, chayta junt'anaykikama. 9Chantá oqharikuy uj chhika trigota, cebadata, habasta, lentejasta, mijo nisqata, avenatawan. Chaykunata uj ch'illamipi chajruykuspa, t'antata ruwakuy. Chayta mikhunki lloq'emanta siriykusqa kashaspa, kinsa pachaj jisq'on chunkayoj p'unchaykuna junt'akunankukama. 10Señalasqa horapi sapa p'unchay mikhunki khuskan librata. 11Yakutapis señalasqa horallapitaj sapa p'unchay ujyanki khuskan litrota. 12Mikhunaykeqa kanqa cebadamanta ruwasqa tortilla. Chay tortillata runaj wanunmanta ninapi chayachinki, tukuy israelitaspa rikunankuta, nispa niwarqa Tata Diosqa. 13Chantapis Tata Diosqa nillarqapuni: Israelitasqa ajina ch'ichipaj qhawasqa t'antata mikhonqanku, maymanchus paykunata presosta apachisaj, chay nacionespi, nispa. 14Noqatajrí kuticherqani: Ay Señor Tata Diosníy, manapuni jayk'aj kawsayniypeqa ima millaytapis llankharerqanichu, nillataj jayk'ajpis pay kikinmanta wañusqa uywaj aychanta mikhorqanichu, nitaj k'ita animalespa mithasqanku aychasta, nitaj ima ch'ichipaj qhawasqa aychatapis, nispa. 15Chayman Pay kutichiwarqa: Noqa niyki, ajina kajtenqa, runa wanoj cuentanmantaqa waka wanumanta ninapi t'antaykita chayachinki, nispa. 16Chantá nillawarqataj: Runaj Churin, Jerusalenpi mikhunata pisichisaj. Mikhunaqa midisqa kanqa, mancha manchallataj mikhonqanku. Yakupis midisqallataj kanqa, mancharisqataj ujyanqanku. 17Yakoqa paykunapaj pisiyanqa, jinallataj mikhuypis. Ujkuna ujkunaqa may mancharisqa qhawanakonqanku, sajra ruwasqankupitaj tukukonqanku.

will be added

X\