1 Tata Diosqa parlamuwaspa, niwarqa: 2 Runaj Churin, Magog jallp'aman qhawarispa, Gogpa contrampi sut'inchay; payqa Mesecpata, Tubalpatawan kuraj kamachejnin. 3 Sut'inchaspa, niy: Tukuyta Kamachej Tata Diosqa kay jinata nin: Qanqa Gog, Mesecpata, Tubalpatawan jatun kamachejninku kanki. Sut'inta niyki: Noqa contraykipi kashani. 4 Noqa p'ajchimusqayki, simiykiman ganchosta churaspataj orqhomusqayki qanta, chantá tukuy soldadosniykita, caballosta, chay sumaj p'achallisqa caballospi purej soldadostawan, manchay armasqas, espadasniyoj, tukuy laya jark'akuna escudosniyoj kajkunata. 5 Persiamanta kajkuna, Cusmanta kajkuna, Futmanta kajkunapis paykunawan kanqanku, tukuyninkutaj jark'akuna escudosniyoj, fierro monterayojtaj renqanku. 6 Jinallataj Gomermanta kaj soldados, Bet-togarmamanta, chay aswan wichaynejmanta kajkuna, jinallataj qanman ujchakojkuna naciones qanwan rillanqankutaj. 7 Wakichikuy, armaykukuytaj, qan, chantá qanwan kashanku, chay tukuy ashkha soldadoswan. Qanqa paykunata kamachinki. 8 Kaymanta unayman wajyasqa kanki. Ashkha watas pasajtintaj, kamachisqa kanki wañuchinaku maqanakumanta ujtawan sayarikoj nacionman rinaykipaj. Chay runasqa, ashkha nacionesman ch'eqerasqa kasqankumanta Israelpa orqosninman tantaykusqa karqanku. Chaypitaj tukuyninku ni imamanta manchachikuspa tiyakushanqanku. 9 Qantaj chay jallp'aman chayaspa, phuyu jina junt'aykunki, ashkha tropa soldadosniyki ashkha nacionesmanta qanwan tantakorqanku, chaykunawan khuska. 10 Tukuyta Kamachej Tata Diosqa kay jinata nillantaj: Chay tiempospi sonqoykiman mana allin yuyay jamusonqa, sajra ruwanasta wakichinaykipaj. 11 Chantá qan ninki: Chay mana kutichikuy atej runaspa contrankupi wicharisaj. Mana imata manchachikuspa tiyakushanku, chay runaspa contrankuta risaj, maypichus mana perqawan muyuykuchisqa llajtaspi tiyakunku, mana punkusniyoj, nitaj llavenasniyoj, chayman. 12 Kapuyninkuta suwaspa, apakampusaj; raqaykunamanta watejmanta sayarichisqa llajtaspi runas tiyakushanku, chaykunata t'unaykamusaj. Waj nacionesmanta orqhomusqa kanku, chay runasmantaj makiyta churaykusaj. Paykunaqa ashkha uywasta mirachishanku, jallp'asniyojtaj kanku chay jallp'aj chawpimpi tiyakushaspa, nispa sonqoykipi yuyaychakunki. 13 Sabá nisqa llajtayoj runas, chantá Dedanmanta kajkunapis, jinallataj Tarsis llajtayoj ranqheros, chantá tukuy ranchosnintin tapurisonqanku: Suwajchu jamorqanki? Soldadosniykitapis tantaykorqanki kay tukuy imasta apakapunaykipajchu: Qolqeta, qorita, chantapis uywasta, jallp'asta, waj kapuykunatawan, waj ashkha imastawan? nispa. 14 Chayrayku, Runaj Churin, Gogman sut'inchaspa, niy: Tukuyta Kamachej Tata Diosqa kay jinata nin: Jamoj p'unchaykunapi, Israel aylluy mana imamanta manchachikuspa tiyakushajtin, manachu qan chayta reparanki? 15 Wichaynejpi kaj karu jallp'asniykimanta llojsimuspa, ashkha nacionespa soldadosninkuwan khuska puririmunki. Paykunaqa caballospi lloq'asqa may atiyniyoj ashkha soldados kanqanku. 16 Riychej Israel aylluypa contrampi, yana phuyus jina jallp'ata p'ampaykuspa. Chay qhepa p'unchaykunapi pusamusqayki jallp'aypa contrampi, waj nacionesmanta runas Noqata rejsinawankupaj, maypachachus qannejta santo kasqayta rikuchisaj chaypacha. 17 Tukuyta Kamachej Tata Diosqa kay jinata nin: Qanmanta Noqa sut'inchacherqani ñawpa tiempopi Israelpi kamachisniy profetaspa siminkunejta. Chaypacha paykuna sut'incharqanku qanta paykunaj contrankupi kachaykusunayta. 18 Tukuyta Kamachej Tata Diosqa nin: Maypachachus Israelpa contrampi Gog jatarimonqa, chay p'unchaykunapi k'ajaj phiñakuyniy phatanqa. 19 K'ajaj phiñakuyniypi Noqa nini: Chaypacha Israel naciompi jallp'a ikhakuy kanqa. 20 Chantá mama qochapi kaj challwas, tukuy phawajkuna, campopi kaj animales, pampaspi qhatatikuspa purej animales, tukuy kay pachapi kaj runastaj ñawpaqeypi kharkatitenqanku. Jatuchaj orqos loqherakonqanku, tukuy perqastaj thuñikuspa, pampaman urmanqanku. 21 Tukuynin orqosniypi Gogpa contranta wañurachejkunata wajyasaj. Paykunapura wañuchinakonqanku, nispa nin Tukuyta Kamachej Tata Diosqa. 22 Paytaqa wañuchej onqoywan castigasaj, wañuchinakuywantaj. Paypa patanman, soldadosnimpa patankuman, paywan kaj ashkha nacionesmanta kaj runasnimpa patankuman ima manchay sinch'i parata urmachimusaj. Chejchi parata, larwashaj azufrewan parata parachimusaj. Noqa Tata Dios chayta nini. 23 Ajinamanta sut'inchasaj jatun kayniyta, may santo kaj Dios kasqayta ima. Rejsisqa kasaj tukuy runaspa ñawpaqenkupi, yachanqankutaj Noqa Tata Dios kasqayta.
