1 Tata Diosqa makinwan llankharimuwarqa, Paypa Espirituntaj uj valleman pusawarqa. Chay valletaj tulluswan junt'a karqa. 2 Tukuy ladosman pusaykachawarqa chay tullus qayllata. Tukuy pampas ashkha tulluswan junt'a karqa, chay tullustaj allin ch'aki, tunti tullus karqanku. 3 Chantá Tata Diosqa tapuwarqa: Runaj Churin, kay tullusqa watejmanta kawsayniyojman tukunkumanchu? nispa. Noqataj nerqani: Tukuyta Kamachej Tata Dios, Qan yachanki chaytaqa, nispa. 4 Chantá Tata Diosqa niwarqa: Chay tullusman sut'inchaspa, niy: Ch'aki tullus, Tata Diospa nisqanta uyariychej. 5 Tukuyta Kamachej Tata Diosqa tullusman kay jinata nin: Noqa kawsay samayta kawsarinaykichejpaj churasqaykichej. 6 Ankusta churaykusqaykichej, aychawantaj junt'arachisqaykichej, chantá qarachasqaykichej, chaymantaj kawsay samayta churasqaykichej chaywan watejmanta kawsanaykichejpaj. Chaypacha yachankichej Noqa Tata Dios kasqayta. 7 Chantá Tata Dios kamachiwasqanman jina tullusman sut'incharqani. Sut'inchashaspataj, uj sonayta uyarerqani, chaytaj tulluspa takarakusqasnin karqa. Tullusrí tantaykukorqanku sapa uj tullusninkuwankama. 8 Chay tullustaj ankuchakorqanku, aychachakorqanku, qarachakorqankutaj; chaywampis mana kawsay samayniyojrajchu kasharqanku. 9 Chantá Tata Diosqa niwarqa: Kawsay samayman niy: Tukuyta Kamachej Tata Diosqa nisunki: Kawsay samay, tawantin ladosmanta jamuspa, kay wañusqasman kawsayta samaykuy, paykunataj kawsanqanku, nispa. 10 Kamachiwasqanman jina sut'incharqani, paykunamantaj kawsay samay yaykorqa. Chantá paykuna kawsarerqanku, sayarerqankutaj. May ashkhapuni karqanku, manchay ashkha soldados jina. 11 Jinapi Tata Diosqa niwarqa: Runaj Churin, kay tukuy tullusqa Israel ayllu kashan. Paykunaqa kay jinata ninku: Tullusninchejqa ch'akisqa kanku, atienekuspa suyakusqanchejtaj chinkapun; noqanchejpajqa manaña imapis kanchu, nispa. 12 Chayrayku paykunaman kay jinata sut'inchay: Tukuyta Kamachej Tata Diosqa nisunkichej: Israel ayllúy, Noqaqa covachaykichejta kicharispa, chaymanta orqhomusqaykichej, Israel jallp'amantaj pusamusqaykichej. 13 Ayllúy, maypachachus Noqa covachaykichejta kicharispa chaymanta orqhomusqaykichej chaypacha, yachankichej Noqa Tata Dios kasqayta. 14 Kawsay samayniyta qankunaman qosqaykichej, kawsankichejtaj. Jinataj jallp'aykichejpi allimpi kawsachisqaykichej. Chantá yachankichej Noqa Tata Dios chayta ruwasqayta, chay nisqaytataj junt'asqayta, nispa nin Tata Diosqa. 15 Tata Diosqa parlamuwaspa, niwarqa: 16 Runaj Churin, uj k'aspita oqharispa, chaypi qhelqay kay jinata: Kayqa Judá ayllupaj, chantá payman tantakamorqanku, chay israelitaspajwan, nispa. Chantá waj k'aspita oqharispa, chaypi qhelqallaytaj: K'aspin, Efraínpa tukuynin Israel ayllu Josejpatawan, tantakamojkunajtawan, nispa. 17 Chantá chay k'aspista tantaykuy ujlla kanankupaj. Ajinamanta ujlla makiykipi kanqanku. 18 Llajta masisniyki tapurisojtinku: Manachu willawasqayku imatachus kaywan yachachiyta munawasqaykuta? nispa, 19 paykunaman kutichiy: Tukuyta Kamachej Tata Diosqa kay jinata nin: Josejpa varanta jap'isaj, mayqenchus Efraínpa makimpi kashan, chayta. Chantá jap'illasajtaj, Israelpa ayllusnin payman ujchasqa kashanku, chaykunatapis. Chaymanta Judajpa varanwan ujllaman tantaykuspa, uj varallaman tukuchisaj; jinamanta makiypeqa ujlla kanqanku, nispa. 20 Chaykama chay qhelqasqayki varasta makiykipi paykunaj rikunankuta jap'inki. 21 Chantá paykunaman ninki: Tukuyta Kamachej Tata Diosqa kay jinata nin: Israelitas maymanchus rerqanku, chay naciones ukhumanta orqhomuspa, paykunata tukuynejmanta tantaykamusaj, jallp'ankumantaj kutirichimusaj. 22 Kay jallp'apitaj paykunata uj nacionllaman tukuchisaj; Israelpa orqosnimpi uj reyniyojlla kanqanku. Manaña ujtawan iskay nacioneschu kanqanku, nitaj iskayman t'aqakonqankuchu sapa ujpis waj kamachejniyoj kanankupaj. 23 Manañataj qhasi manakaj millay lantisninkuwan ch'ichichakonqankuchu, ni millay kawsayninkupi, nitaj sajra ruwayninkupipis. Noqa paykunata librasaj, maypichus juchallikorqanku, chay cheqasmanta, paykunatataj llimphuchasaj. Ajinamanta aylluy kanqanku, Noqataj paykunaj Diosninku kasaj. 24 Kamachiy Davidqa paykunaj reyninku kanqa; uj k'ata michejniyojlla tukuyninku kanqanku. Leyesniyta kasonqanku, kamachisqasniytataj ruwaspa, junt'anqanku. 25 Kamachiy Jacobman qorqani, chay jallp'api tiyakonqanku, ñawpa tatasninku tiyakorqanku, chaypi. Chay jallp'api wiñaypaj tiyakonqanku paykuna, wawasninku, paykunaj mirayninku ima. Kamachiy Davidtaj paykunaj kuraj kamachejninku kanqa wiñaypa wiñaynintinkama. 26 Paykunawan allin kawsakuy tratota ruwasaj, mana jayk'aj tukukojta. Paykunata ashkhaman mirachisaj, sumajtataj sayachisaj. Paykuna chawpipi Santo Temployta wiñaypaj sayachisaj. 27 Paykunawan khuska tiyakusaj. Noqa paykunaj Diosninku kasaj, paykunataj aylluy kanqanku. 28 Paykuna chawpipi santo kaj Temploy wiñaypaj kashajtin, yachanqanku tukuy naciones Noqa Tata Diosmin Israelta Noqapaj ajllakusqayta wiñaypaj.
