EZEQUIEL 35

1Tata Diosqa parlamuwaspa, niwarqa: 2Runaj Churin, Seir orqonejman qhawarispa, contranta sut'inchay, 3Kay jinata niy: Tukuyta Kamachej Tata Diosqa kay jinata nin: Seir orqo, Noqa contraykipi kashani. Castigasqayki, chantá ch'impachata, thuñisqatataj saqerparisqayki. 4Llajtasniykita raqayllata saqesaj; ch'in pampaman tukuchisqa qhepakunki. Chaypacha yachanki Noqa Tata Dios kasqayta. 5Israelitaspa wiñay enemigonku kaspa, may llakiypi kashajtinku, paykunataqa wañuchejkunaman jaywarakorqankichej, juchasninkumanta castigo may sinch'i kashajtin. 6Chayrayku Tukuyta Kamachej Tata Diosqa nin: Kawsayniyrayku juraspa, niyki: Noqa wañuyman jaywaykusqayki, wañuytaj qhatiykachasonqa; qanqa runa wañuchimanta juchachasqapuni kanki, chayraykutaj wañoyqa qhatirisonqa. 7Seir orqota ch'in pachata, ni uj runayojta saqerpayasaj, manataj pitapis chayninta purejta saqesajchu. 8Orqosniyki, lomasniyki, vallesniyki, wayq'osniyki ima espadawan wañurachisqa ayaswan junt'a kanqanku. 9Wiñaypaj ch'in pachata saqesqayki; llajtasniykipi manaña jayk'ajpis runas tiyakonqankuñachu. Chaypacha qan yachanki Noqa Tata Dios kasqayta. 10Kay jinata nerqanki: Chay iskaynin naciones, chantá chay iskaynin jallp'as noqajta kanqanku, nispa, Tata Dios chaypi kashajtimpis. 11Chayrayku Tukuyta Kamachej Tata Diosqa nin: Imaynatachus Israel aylluta phiñakuywan, chejnikuywan ruwarqanki, chay kikillantataj qantapis ruwasqayki. Qanta castigasqayki, chaypachataj paykunaqa yachanqanku pichus kasqayta. 12Chaywan yachanki uyarikusqayta, maypachachus Israelpi kaj lomaspa contrampi kay jina sajrata parlarqanki chaypacha: Kay orqosqa ch'impacha saqerasqaña kanku; noqanchejman mikhukapunanchejpaj qopuwanchej, nispa. 13Qankunaqa simiykichejta jatunta kicharispa, runaykacharqankichej, contraypitaj ashkhata parlarqankichej, chaytataj Noqa uyarerqani. 14Tukuyta Kamachej Tata Diosqa kay jinata nin: Qanta t'unaykusojtiy, tukuy kay pachapi runas kusikonqanku. 15Israelpa herencian phirisqa rikhurejtin, qan kusikorqanki. Chayrayku chay kikillantataj qanta ruwasqayki: Seir Orqo, phirisqa kanki, ch'in pampaman tukuchisqataj, tukuynin Edom nacionnintin. Chaypacha yachanqanku Noqa Tata Dios kasqayta.

will be added

X\