EZEQUIEL 34

1Tata Diosqa parlamuwaspa, niwarqa: 2Runaj Churin, Israelta michejkunaj contrankuta parlaspa, paykunata niy: Tukuyta Kamachej Tata Diosqa kay jinata nisunkichej: Ay qankunamanta, Israel aylluta michejkuna. Qankunaj allinnillaykichejta mask'akunkichej. Manachu michejkunaqa ovejaspa allinninkuta mask'ananku tiyan? 3Qankunaqa lecheta ujyankichej, millmamantataj p'achasta ruwakunkichej. Sumaj wira ovejastataj ñak'aspa mikhunkichej, oveja tropatatajrí mana allinta qhawankichejchu. 4Qankunaqa tulluyajkunata mana yanaparinkichejchu, onqosqastapis mana jampinkichejchu. Chakin p'akisqastapis mana tableyaykunkichejchu. T'aqarakojkunata mana tropaman kutirichimunkichejchu, nitaj chinkasqastapis mask'amunkichejchu. Astawampis oveja tropataqa munayniykichejman jina apaykachaspa ñak'arichinkichej. 5Ovejasneyqa mana michejniyoj kasqankurayku ch'eqerakorqanku, campospitaj phiña k'ita animales paykunata mikhurarqanku. 6Ovejasneyqa tukuy lomaspi, tukuy orqospi chinkasqa purerqanku, tukuynejpi ch'eqerasqas, manataj pipis paykunamanta llakirikoj karqachu, nitaj mask'amojpis. 7Chayrayku, Israelta michejkuna, Tata Diospa nisqanta uyariychej: 8Noqa Tukuyta Kamachej Tata Diosqa kawsayniyrayku juraspa, nini: Ovejasniytaqa campopi kaj imaymana k'ita phiña animales jap'ispa, mikhuykorqanku mana michejniyoj kasqankurayku. Michejniykunaqa ovejasniyta mana mask'amorqankuchu. Paykuna allin mikhusqa kanallankumanta dakorqanku, ovejasniytatajrí mana michipuwarqankuchu. 9Chayrayku Israelta michejkuna, Tata Diospa nisqanta uyariychej: 10Tukuyta Kamachej Tata Diosqa nin: Noqaqa michejkunaj contrankupi sayarini, ovejasniytataj paykunaj makisninkumanta mañakapusaj. Manaña astawan ovejasniyta michenqankuchu, amaña paykuna kikillankuta allimpi qhawakunankupaj. Ovejasniyta paykunaj siminkumanta qhechurakapusaj, manañataj ovejasniyta mikhukapullanqankupunichu. 11Tukuyta Kamachej Tata Diosqa kay jinata nillantaj: Noqa kikiy ovejasniyta mask'aj risaj, michikapusajtaj. 12Imaynatachus uj michejqa ch'eqerasqa ovejasnin chawpipi rikhurispa rejsirakapun, ajinata Noqapis ovejasniyta rejsirakapusaj. Maykunamanchus phuyusqa laqha p'unchaypi ch'eqerakorqanku, chaykunamanta paykunata tarikampusaj. 13Waj nacionesmanta orqhomuytawan ujllaman tantaykuspa, paykunata kikin jallp'ankuman qhatikapusaj. Israel lomaspi paykunata michisaj, tukuy mayu kantuspi, runaj tiyakunan jallp'aspi. 14Israelpa orqo puntasnimpi sumachaj pastospi paykunata mikhuchimusaj. Chaynejpi puñukonqanku, may sumachaj pastostataj mikhukonqanku. 15Noqa ovejasniytaqa michikusaj, Noqallataj puñuchikusaj, nin Tukuyta Kamachej Tata Diosqa. 16Chinkasqasta Noqa mask'amusaj, ch'eqerasqastataj tropaman kutirichimusaj. Chakin p'akisqata tableyaykusaj, mayt'uykusajtaj. Tulluyajkunata yanaparisaj, kallpasapa wira ovejastataj wañurachisaj. Ovejasniyta justiciawan michisaj maychus michinata jina. 17Qankuna ovejasníy, allinta uyariwaychej, nispa nin Tukuyta Kamachej Tata Diosqa: Noqamin juzgasaj sapa uj ovejata. Jinallataj mochosta, chivostapis juzgasaj. 18Pisichu karqa sumachaj pastosta mikhusqaykichejqa? Chayraykuchu chay puchojta sarurarqankichej? Ch'uwa yakusta ujyaytawan, chakisniykichejwan chay yakusta qonchuyachisqaykichejqa allinchu karqa? 19Ovejasneyqa sarusqaykichej pastosta mikhunku, chakisniykichejwan qonchuyachisqaykichej yakusta ujyanku. 20Chayrayku Tukuyta Kamachej Tata Diosqa kay jinata nisunkichej: Tulluyasqa ovejaswan, wirayasqa ovejaswan paykuna ukhupi justicia kananta ruwasaj. 21Qankunaqa tulluyasqa ovejasta teqerarqankichej, wajraspataj chay tullu ovejastaqa ayqecherqankichej. 22Noqatajrí ovejasniyta salvasaj, manañataj pipis paykunamanta suwanqachu. Ovejapurata justiciata ruwasaj. 23Noqaqa kamachiy Davidta kutirichimusaj, paytataj ovejasniyta michinampaj churasaj. Pay ovejasniymanqa sumaj q'achuta mikhuchipuwanqa, sumajtataj paykunata michenqa. 24Noqa Señorninku Tata Dios kasaj, David kamachiytaj jatun kamachejninku kanqa. Noqa Tata Diosmin chaytaqa nini. 25Allin kawsay tratota paykunawan ruwasaj; jallp'amantaqa tukuy phiña k'ita animalesta wijch'usaj, ovejasniy mana imamanta manchachikuspa ch'in pampaspi tiyakunankupaj, jinallataj orqospipis puñukunankupaj. 26Noqaqa ovejasniyta bendecisaj jinallataj orqoypa muyuynintapis. Tiempompi parachimusaj, chay parataj paykunapaj bendición kanqa. 27Campospi kaj sach'asqa sumajta poqonqanku, jallp'ataj tukuy imata sumajta poqochenqa. Ajinamanta ovejasneyqa kikin jallp'ankupi mana imamanta manchachikuspa kawsanqanku. Maypachachus Noqa aylluyta kacharichisaj, pikunachus ñak'aricherqanku, chaykunaj makisninkumanta chaypacha, yachanqanku Noqa Tata Dios kasqayta. 28Waj llajtayojkunaqa manaña ujtawan paykunata presochanqankuchu, nillataj campospi kaj phiña k'ita animalespis paykunata mikhuykonqankuchu. Astawanqa allimpi kawsakonqanku ni pejpa mancharichisqan. 29Paykunaman qosaj may sumaj poqoj jallp'ata, manataj ujtawan yarqhaywan chay jallp'apeqa tukukonqankuchu, nitaj waj llajtayojkunapis paykunataqa astawan asipayanqankuchu. 30Chaynejta yachanqanku Noqa Señorninku Tata Dios paykunawan kasqayta, jinallataj Israel aylluy kasqanta, nispa nin Tukuyta Kamachej Tata Diosqa. 31Qankunaqa ovejasniy kankichej, sumaj pastosniyoj jallp'api kaj tropa ovejasniy, Noqataj Diosniykichej kani, nispa nin Tukuyta Kamachej Tata Diosqa.

will be added

X\