1 Chantá niwarqa: Qanqa Runaj Churin, kay qhelqasqa librota mikhuykuy, jinaspataj Israel aylluman parlamuypacha, nispa. 2 Jinataj simiyta kicharerqani, chay qhelqasqa librotataj mikhuykuchiwarqa. 3 Niwarqataj: Runaj Churin, kay jaywasusqay qhelqasqa librota mikhuspa, chaywan wijsaykiman junt'aykuchiy, nispa. Noqataj mikhuykorqani. Simiypeqa may misk'i karqa, abeja misk'i jina. 4 Chantá niwarqa: Runaj Churin, rispa, Israel aylluman Noqaj nisqasniyta willamuy. 5 Manamin mana rejsisqa parlayniyoj ayllumanchu kachashayki, nitaj mana entiendey atina parlayniyojmanchu. Manachayqa Israel aylluman kachashayki. 6 Mana ashkha nacionesmanchu, nitaj mana atinapaj jina parlayniyojkunamanchu kachashayki, nitaj entiendejta mana atinaykipaj jinamanchu. Chaykunaman kachaykiman chaypis, paykunaqa uyarisunkuman. 7 Chaywampis Israel aylloqa mana uyarisuyta munanqankuchu, imaraykuchus Noqata mana kasuwayta munankuchu. Israel aylloqa tukuyninku mana k'umuykoj rumi sonqos kanku. 8 Noqataj paykunata jina sinch'i sonqoyojman qanta tukuchisqayki, paykuna jina k'ulluta ruwasqayki. 9 Diamante nisqa valorniyoj rumita jina sinch'i kanaykipaj ruwasqayki, chhanka rumimantapis aswan chukitaraj. Ama paykunata manchachikuychu, ni phiña uya qhawarimusojtinkupis, aswan mana kasukoj kajtinkupis. 10 Chantapis nillawarqataj: Qan, Runaj Churin, allinta uyariway, tukuy ima nisusqaytataj sonqoykipi sumajta jap'iy. 11 Rispa, llajta masisniykita watukamuy, waj nacionman presos apasqa karqanku, chaykunata. Paykunaman willaspa, niy: Kay jinata Tukuyta Kamachej Tata Diosqa nin, nispa, uyarisuchunkupis amapis. 12 Chaymantá Diospa Espíritun oqhariwarqa, uj parlamojtataj uyarerqani, jallp'a ikhakuspa sonarin, jinatapuni. Chay parlamoj nerqa: Tata Diospa jatun kaynenqa maypichus kasqanta yupaychasqa kachun, nispa. 13 Chay sonay karqa chay kawsajkunaj lijrasninku ujkuna ujkunawan tinkunakusqankurayku, paykunawan kasharqanku, chay ruedaspiwan. Chay sonaytaj jallp'a ikhakuy jina karqa. 14 Jinapi Diospa Espíritun jap'iwaspa chaymanta orqhowarqa, noqataj may llakisqa, sonqo p'akisqataj risharqani. Chaywampis Tata Diosqa sinch'ita makinwan jap'iwarqa. 15 Tel Abibman Quebar Mayoj kantusninkama chayarqani, maypichus preso apasqa israelitas tiyakusharqanku, chayman. Chaypi paykunawan qanchis p'unchay junt'ata karqani, mana yachaspa imatachus ruwanayta, nitaj imatachus parlanayta. 16 Qanchis p'unchay tukukuypi Tata Diosqa parlamuwaspa, niwarqa: 17 Runaj Churin, Noqa qanta churayki Israel ayllupaj qhawaj soldadota jina. Noqa imatachá nisqayki, chayta Noqamanta paykunaman willanki, Noqaj sutiypi k'amispa, reparachispataj. 18 Noqa juchasapaman nejtiy: Cheqamanta wañunki, nispa, sichus qan mana k'amiwaj, nitaj parlawaj chay runaman sajra kawsayninmanta reparachispa chayqa, payqa chay juchanrayku wañonqa, Noqatajrí paypa wañuyninmanta cuentata mañasqayki. 19 Sichus qan chay runata k'aminki sajra kawsayninmanta reparachispa, paytaj juchanmanta mana karunchakunman, nitaj sajra kawsaynintapis saqenman chayqa, pay juchanrayku wañonqa, qantajrí wañuyninmanta mana juchayoj kanki. 20 Sichus mayqen cheqan runa cheqan kawsayninta saqespa sajra imasta ruwanman, Noqataj urmanampaj misk'anata paypaj churayman chayqa, juchanmanta reparachispa mana k'amisqaykirayku wañonqa. Noqataj mana cuentaman churasajchu allin imasta ruwasqasnintaqa; jinaqa juchampi wañonqa. Chaywampis chay wañusqanmanta qanmanta cuentata mañasqayki. 21 Sitajchus cheqan runata reparachispa k'amiykunki ama juchallikunanta, manataj pay juchallinman chayqa, pay kawsallanqapuni, imaraykuchus reparachisqaykita kasukorqa, qantaj mana juchachanapaj jina kanki. 22 Chay kikimpi Tata Diosqa makinwan llankhaykuwaspa, niwarqa: Sayarikuspa, valle pampaman riy, chaypitaj parlaykusqayki, nispa. 23 Jatariytawan, valle pampaman rerqani, chaypitaj Tata Diospa jatun kaynimpa k'anchayninta rikorqani, imaynatachus Quebar nisqa mayu kantupi rikorqani, chay jinallatataj. Chantá k'umuykorqani uyayta pampaman chayachinaykama. 24 Chaypacha Diospa Espíritun sonqoyman yaykuspa, sinch'ita sayachiwarqa. Tata Diostaj parlamuwaspa, niwarqa: Wasiykiman rispa, wisq'aykakamuy. 25 Qan, Runaj Churintaqa waskhawan wataykusonqanku, ajinamanta paykunawan mana llojsinkichu; 26 astawampis Noqa qalluykita simiykipi k'askaykuchispa, mana parlajman tukuchisqayki. Paykunataqa mana k'amiyta atinkiñachu, imaraykuchus mana kasukoj k'ullu runas kanku. 27 Chaywampis, maypachachus parlasuyta munasaj chaypacha, simiykita kicharisqayki, Noqaj nisqayta paykunaman willanaykipaj. Kay jinata ninki: Tukuyta Kamachej Tata Diosqa kayta nin, nispa. Uyariyta munajqa uyarichun, mana uyariyta munajtaj amapis uyarichunchu, imaraykuchus contrayta oqharikoj ayllu kanku.
