1 Tata Diosqa parlamuwaspa, niwarqa: 2 Runaj Churin, Tiro llajtapajqa llakiy yarawita takipuy, kay jinata: 3 Jatun qocha kantuspi tiyakoj llajta, chawpi qocha churuspi tiyakojkuna, may chhika runaswan ranqheyaj. Kunanqa Tiro llajta, Tukuyta Kamachej Tata Diosqa kay jinata nisunki: Qan nerqanki: Noqaqa manchay k'achitupuni kani, nispa. 4 Qanqa kamachinki mama qocha chawpikama; qanta perqasojkunaqa may k'achatapuni ruwasorqanku. 5 Senir nisqa orqomanta pino sach'asta k'utumorqanku, chaymanta tablaswantaj wasisniyki ruwasqa karqa. Líbano nisqa orqomantataj cedro sach'ata k'utumuspa, mastil nisqa jatun kurkuta ruwapusorqanku. 6 Basán nisqa jallp'amanta encina k'ullusta apamuspa, barco purichina pala jina remo nisqata ruwapusorqanku. Barcoj patanta ruwapusorqanku Chipre churusmanta cedro kurkusta apamuspa; marfilwan k'askaykuchisqata ruwapusorqanku. 7 Barco purichina carpaykeqa Egiptomanta apamusqa sumajnin linomanta ruwasqa karqa wiphalayki kanampaj. Llanthucha toldoykitaj, Elisa nisqa churumanta apamusqa puka kulli telasmanta ruwasqa karqa. 8 Barcoykita remoswan purichej runasniyki Sidón llajtamanta, Arvad llajtamantawan karqanku. Tiro llajta, yachayniyoj runasniykeqa qanwan karqanku, barcoykita maynintachus rinanta purichinankupaj. 9 Gebal llajtayoj machu runas qanwan karqanku, sumaj yachaywan ima mana allin kajtimpis usqhayllata allinchanankupaj. Mama qochapi kaj chhika barcosqa, jinallataj apaykachaj runaspis qanwan ranqheyarqanku. 10 Persia nacionmanta, Lidia nacionmanta, Libia nacionmanta ima runasqa soldadosniyki karqanku maqanakunaykipaj. Jark'akuna escudoswan, monteraswantaj armaykusorqanku, chay armastaj k'achitu kasqaykita rikucherqa. 11 Arvad nacionmanta kajkunaqa soldadosniykiwan khuska perqasniyki pataspi muyuykusqa kasharqanku. Torresniykipi gamadeo runas kasharqanku, llajtata allinta qhawanankupaj. Jark'akuna escudosninkoqa perqasniykipi sinrulla warkhusqa kasharqanku, chaykunataj aswan k'achituman tukuchisorqanku. 12 Chay jina qhapajpuni kasqaykirayku, Tarsis llajtamanta kaj runas qampata kaj imaspaj qanwan chhalarqanku qolqe metalwan, fierrowan, titiwan, qoriwan ima. 13 Greciamanta kajkuna, Tubalmanta kajkuna, Mesecmanta kajkuna ima qanwan chhalanankupaj apamoj kanku wata runasta, broncemanta ruwasqa imastawan. 14 Bet-togarma llajtamanta kajkunaqa, qanwan chhalanankupaj apamoj kanku trabajanapaj caballosta, maqanakunaman rej caballosta, mulasta ima. 15 Rodas nisqa llajtamanta kajkunaqa qanwan ranqheyallajtaj kanku, jinataj mama qocha churuspi llajtayojkunamanta ashkha runas ima. Qanwan chhalanankupaj apamoj kanku marfil nisqa tullusta, ébano nisqa maderatawan. 16 Edom llajtamanta kajkuna qanwan qhatuta ruwallajtaj kanku. Qanwan chhalanankupaj paykuna apamoj kanku granate rumista, puka tiñisqa telasta, awakipasqa p'achasta, chantapis may sumachaj linomanta kaj telasta, coral nisqa rumista, rubí nisqa valorniyoj rumistawan. 17 Judá ayllu, jinallataj Israel jallp'amanta kajkunapis qanwan ranqheyaj kanku. Paykunaqa qanwan chhalanankupaj apamoj kanku minit nisqa trigota, pastelesta, abeja misk'ita, aceiteta, k'acha q'apaj jampistawan. 18 Damasco llajta, qampi tukuy imas kasqanrayku, qanwan ranqheyanankupaj apamoj kanku Helbón llajtamanta kaj vinota, Saharmanta yuraj millmatawan. 19 Chantá Vedán nisqamanta, Javá nisqamanta ima qanwan chhalanankupaj Uzalmanta apamoj kanku sumachaj ruwasqa fierrosta, mirra surusqata, misk'ita q'apaj cañatawan. 20 Dedanmanta kajkunaqa caballoman sinchana monturasta qanwan ranqheyaj kanku. 21 Arabia llajtamanta kajkuna, chantá Cedarpi kaj kurajkuna ima, qanwan ranqheyanankupaj apamoj kanku corderosta, carnerosta, chivosta ima. 22 Sabamanta kajkuna, Raamamanta kajkunapiwan, qanwan ranqheyanankupaj apamoj kanku ima munay q'apashaj perfumesta, qorita, valorniyoj tukuy laya k'acha rumistawan. 23 Haranmanta kaj runas, Canemanta, Edenmanta kaj runaspiwan qanwan ranqheyallajtaj kanku. Jinataj, Sabamanta, Asiriamanta, chantá tukuynin Mediamanta kaj runas qanwan ranqheyanankupaj tratota ruwarqanku. 24 Paykunaqa qanwan chhalanankupaj apamoj kanku may sumachajnin telasta, azulman tiñisqa awakipasqa mast'asta, tukuy laya coloresmanta ruwasqa qhatanasta, sumaj simp'asqa imaswan k'achanchasqasta ima. 25 Tarsismanta kaj barcos qhepampi qhepampi tukuy qhatunasta apampusorqanku. Chay tukuywanqa mama qochapi uj jatun barco jina karqanki tukuy laya ashkha imaswan junt'a. 26 Chantá barco purichejkunaqa mama qocha chawpista apasonqanku, chaypitaj inti llojsimuynejmanta wayra wayramuspa phirirparisonqa. 27 Ashkha kapuyniyki, qhatu ruwanasniyki, tukuy ruwasqasniyki, mama qochapi purej runasniyki, barcota purichej runasniyki, barcoj k'allkasninta llup'aj runasniyki, qhatunasniykita allin yachaywan qhawajkuna, soldadosniyki, tukuy qanwan purejkuna ima, chinkanayki p'unchay chayamojtin, mama qocha ukhuman p'ultiykukonqanku. 28 Mama qochapi maynintachus rinaykita purichejkunaj qhaparisqankuta uyarispa, mama qochaj kantusnin kharkatitenqanku. 29 Barcosta remoswan purichejkunaqa, barcosninkumanta pampaman urayk'onqanku. Barcota tukuy apaykachajkunaqa mama qocha kantullapi qhepakonqanku. 30 Qannejta jatunmanta qhaparenqanku, sonqo nanaytataj waqanqanku. Umasninkuman jallp'awan qhallikonqanku, ushphaspitaj sunt'enqanku. 31 Qannejta umankutapis t'ojluchikonqanku. Qhashqa p'achasta churakonqanku. Sonqo nanayta jatunmanta qhaparispa waqanqanku. 32 Qannejta llakiy yarawita takenqanku. Llakiywantaj nenqanku: Mana mayqen llajtapis Tiro jina ch'in qhepakunchu jatun qocha chawpipi. 33 Tukuy ima qhatunasniyki maymampis chayajtin, ashkha nacionesta sajsachej kanki. Ashkha kapuyniykiwan, qhatunasniykiwantaj kay pachapi kaj reyesta qhapajyacherqanki. 34 Kunantajrí jatun qocha qantaqa phirisunki; tukuy ima qhatunasniyki, qanwan kaj runaspis qanwan khuska jatun qocha ukhuman chinkaykunku. 35 Jatun qocha kantupi tukuy tiyakoj runas qanmanta t'ukonqanku. Reyesninkupis manchariywan kharkatitenqanku; uyankupis t'ojralla rikhurenqa. 36 Waj nacionesmanta ranqherospis rikususpa, asipayasonqanku. Cheqamanta mancharinapaj jinapuni kanki, manañataj ujtawan rikhurimuyniyoj chinkapunki.
