1 Tata Diosqa parlamuwaspa, niwarqa: 2 Runaj Churin, manachu runa wañuchi llajtataqa juzganki? Manachu millay juchawan ch'ichichakusqanta sut'iman orqhonki? 3 Chay llajtataqa ninki: Tukuyta Kamachej Tata Diosqa kay jinata nin: Qampi tiyakojkunata wañuchej llajta, qhasi manakaj lantista ch'ichichakunaykipaj ruwakunki, chay p'unchayqa qampaj chayamonqaña. 4 Runasta wañuchisqasniykiwan juchayoj rikhurinki; lantista ruwakusqasniykiwan ch'ichichakunki. Ajinamanta qanqa castigasqa kanayki p'unchayta qayllachimunki, tukukunayki tiempotaj chayamunña. Chayrayku tukuy runaswan Noqa p'enqachisqayki, tukuy nacionespi tiyakoj runastaj asipayasonqanku. 5 Qayllapi kajkuna, jinallataj karuspi kajkunapis qanmanta alqochakonqanku, millay kawsayniykirayku, mentasqa llajta, ch'ajwawan junt'a. 6 Israelpi kuraj runasqa sapa ujninku atiyniyoj kasqankuwan runasta wañuchinankupaj kallpachakunku. 7 Kay llajtapeqa tatasninkuta, mamasninkutapis pisipaj qhawanku. Forastero runasta ñak'arichinku. Wajcha wawasmanta, viuda warmismantataj ch'uskinku. 8 Noqapaj t'aqasqa kaj imasta pisipaj qhawanku, chantá samarikuna p'unchayniytapis mana kasuta ruwankuchu. 9 Kay llajtapi llullata parlaj runas kanku, runasta wañuchiyta munaspa. Lomaspi lantisman jaywasqa imasmanta mikhumoj rinku, millay khuchiriostataj ruwanku. 10 Wakin runasqa tatasninkoj warminwan khuchichakunku, wakinkunataj, warminku killa yawarnimpi kashajtimpis paywan puñuykunku. 11 Wakinkunaqa runa masinkoj warminwan khuchichakunku, chayrí ñojch'anwan, manachayrí kikin tatampa ususinwan khuchichakunku. 12 Wakin qampi tiyakojkunamanta qolqeta pagachikunku waj runata wañuchinankupaj. Qolqeta mañarinku interesniyojta, ancha ashkhata ganakuyta munaspa. Runa masisninkuta ch'awkiyanku, ñak'arichinkutaj kallpankuman atienekuspa. Noqamantarí qonqakapunku. Noqa Tukuyta Kamachej Tata Diosmin chaytaqa nini. 13 Phiñakuywan makisniyta morq'orikuni sut'i suwa kasqaykimanta, qampi ashkha runas wañuchisqa kasqankumantawan. 14 Noqa contraykita jatarisaj chaypachaqa, sonqoyki wapuchakuwanqachu? Makisniykipis kallpayojllapunichu kanqanku? Noqa Tata Diosmin chayta nini, chay nisqaytataj junt'asajpuni. 15 Tukuy nacionesman ch'eqerachisqayki, tukuy jallp'asman wijch'usqayki; chay jinamanta ch'ichichakusqaykita chinkachisaj. 16 Waj jallp'aspi tiyakoj runaspa ñawpaqenkupi qan kikiyki p'enqaypi rikhurichikunki, chaywantaj yachanki Noqa Tata Dios kasqayta. 17 Tata Diosqa parlamuwaspa, nillawarqataj: 18 Runaj Churin, Israel aylloqa imaynatachus cobreta, estañota, fierrota, qorita, chayrí qolqe metaltapis k'ajarishaj nina hornoman churaykojtinku tukuy ch'ichisnin qhepakun, ajinamin Israel Noqapajqa. 19 Chayrayku Tukuyta Kamachej Tata Diosqa nin: Tukuyniykichej q'opaman jina tukusqaykichejrayku Jerusalén llajta chawpiman tantaykusqaykichej. 20 Imaynatachus uj runaqa qolqeta, bronceta, fierrota, qorita ima tantaykuspa hornoman churaykun, ninawantaj enqhaykun chay imasta unuyachinampaj, ajinallatataj Noqa manchay rabiasqa, k'ajaj phiñakuyniypi tantaykusqaykichej, chaypitaj unuyachisqaykichej. 21 Noqa tantaykusqaykichej, chantá k'ajaj phiñakuyniyta qankuna pataman kachaykamusaj, chay llajta chawpipitaj unuyankichej. 22 Imaynatachus hornopi qolqe metal unuyan, ajinata qankunata unuyachisqaykichej llajta chawpipi. Chaywan yachankichej Noqa Tata Dios phiñakuyniyta qankunaman kachaykamusqayta. 23 Tata Diosqa parlamuwaspa, niwarqa: 24 Runaj Churin, Israelman niy: Qanqa mana llimphuchasqa jallp'a kanki, phiñakuy p'unchaypitaj parawan mana ch'ajchusqachu kanki. 25 Kay naciompi kamachejkunataj qhaparej leones jina kanku, jap'isqankuta mithaspa. Runasta mikhuranku; qolqe waqaychasninkuta, kapuyninkutawan suwanku, ashkha warmistataj, qosasninkuta wañurachispa, viudasta saqeranku. 26 Kay naciompa sacerdotesnenqa leyesniyta p'akinku. Noqapaj t'aqasqa imasta ch'ichichanku. Imachus llimphu kajta, imachus ch'ichi kajtapis mana reparankuchu. Manataj wajkunaman yachachinkuchu reparayta imachus allin kajta, imachus mana allin kajtapis. Samarikuna p'unchayniykunamanta mana dakunkuchu, nitaj jatumpaj qhawawankuchu. 27 Kay llajtapi kurajkunaqa atojkuna jina jap'isqankuta mithanku, yawartataj jich'anku; runasta wañuchinku kapuyninkuta suwaspa qhapajyanankupaj. 28 Profetasninkutaj imachus cheqan kajta pakanku, imaynatachus runas uj perqata yesowan lluch'inku, ajinata, manakajta sut'inchaspa, mosqoypi jina llulla rikusqankuta willaspataj. Paykuna ninku: Kay jinata Tukuyta Kamachej Tata Diosqa parlaykuwan, nispa, Noqa Tata Diosqa ni imatapis parlashajtiy. 29 Chaypi tiyakoj runasqa mayta sajrayanku, suwankutaj. Wajcha runasta, mana kapuyniyojkunatapis munasqankuta ruwanku. Waj llajtamanta kajkunatapis ñak'arichispa, mana paykunapaj justiciata ruwankuchu. 30 Chay runas ukhupi Noqa mask'arqani pillapis kay naciompa allinninta mask'aspa ñawpaqeypi Noqamanta kay nacionrayku mañapunampaj, ajinamanta kay nacionta ama chinkachinaypaj; manataj ujllatapis tarerqanichu. 31 Chayrayku paykunaj patankuman k'ajaj phiñakuyniyta kachaykamusaj; nina larway jina phiñakuyniywanqa paykunata tukuchisaj, chay sajra ruwasqasninkumanta cuentata mañaspa, nispa nin Tukuyta Kamachej Tata Diosqa.
