EZEQUIEL 2

1Chantá niwarqa: Qan, Runaj Churin, sayarikuy parlasunaypaj, nispa. 2Ajina parlamushawajtin, Diospa Espíritun sonqoyman yaykorqa, sayarichiwarqataj; chantá uyarerqani chay parlamuwajta nishawajta: 3Runaj Churin, qanta kachasqayki israelitasman, mana kasukoj, Noqaj contraypi oqharikoj aylluman. Paykunapis ñawpa tatasninku jinallataj kunan p'unchaykama contraypi sayaykunku. 4Mirayninkupis mana q'ewiy atina, rumi sonqostaj kanku. Paykunaman parlamunaykipaj qanta kachasqayki, kay jinatataj ninki: Tukuyta Kamachej Tata Dios kayta nin, nispa. 5Contrayta oqharikoj runas kaspa, kasusuchunkupis amapis, yachanqankupuni paykuna ukhupi uj profeta kasqanta. 6Qanrí, Runaj Churin, paykunamanta ama manchachikuychu imata nisojtinkupis, khishkas chawpipi jina tarikuspapis, chayrí alacranes chawpipi jina kashaspapis. Amapuni paykunaj parlasqankumanta manchachikuychu, amataj kharkaychu paykunaj ñawpaqenkupi, imaraykuchus contraypi oqharikoj ayllumin kanku. 7Qanqa Noqaj nisqayta paykunaman willay, uyarisuchunkupis amapis, imaraykuchus paykunaqa contraypi oqharikojkuna kanku. 8Qanqa, Runaj Churin, parlasusqayta allinta uyariy, amataj paykuna jinaqa mana kasukoj kaychu. Simiykita kichariy, mikhuytaj imatachus Noqa qosqayki, chayta, nispa niwarqa Tata Diosqa. 9Qhawarispa, rikorqani noqa ladoman maki jaywarisqata, chay makipitaj karqa uj k'uyuna libro. 10Ñawpaqeypi chay k'uyuna libro kicharikorqa, chay puraj ladompitaj qhelqasqa karqa llakiy, waqay, ayqoykuna, ay ay niykuna ima.

will be added

X\