1 Qanrí Ezequiel, Israel aylloj reyesnimpaj kay llakiy takiyta takipuy: 2 Mamaykeqa china león karqa, leones chawpipi kawsakorqa, chaypitaj juch'uy uñitasninta uywakorqa. 3 Ujnin uñanta uywarqa, kallpayoj jatun león kanankama. Mikhunampaj animalesta jap'iyta yachaykorqa. Runastapis mikhuykullarqataj. 4 Chantá tukuy nacionesmanta kaj runasqa chay leonmanta parlajta uyarispa, uj tojllapi payta jap'iykorqanku, cadenaswan wataykuytawantaj, Egiptokama qhatatispa aparqanku. 5 Mama leonqa unaytaña suyasqampi, imapichus atienekusqan mana junt'akojtin, ujnin uñantañataj uywarqa kallpayoj jatun león kanankama. 6 Chay kajpis jatuchaj leones chawpipi rerqa, jamorqataj, kallpayoj kasqanrayku. Mikhunampaj animalesta jap'iyta yachaykorqa; runastapis mikhukapullarqataj. 7 Jark'achasqa kamachinanku wasista urmaracherqa, llajtasninkutataj ch'inyaracherqa. Qhapariyninwanqa tukuyta kharkatiticherqa. 8 Chantá tukuy nacionesqa paypa contranta jatarerqanku, muyuynimpi kaj llajtas ima. Ch'ipasninkuta choqaykuspa, payta jap'erqanku. 9 Ganchoswan qhatatispa, payta wisq'aykorqanku, chantá Babiloniapi kaj reyman aparqanku. Chaypitaj payta wisq'aykorqanku, amaña qhaparisqan Israel orqospi uyarikunampaj. 10 Mamaykeqa yaku kantupi uj sach'a plantasqaman rijch'akun. Sumaj poqoj sach'a jina karqa, ashkha ramasniyoj, yaku patapi kasqanrayku. 11 Ramasnintaj may sinch'ita rakhuyarqanku reyespa tojnusnimpaj jina kanankama; maytapuni wiñarqa, phuyusta taripanankama. Tukuy sach'asmanta aswan wiñasqa karqa, chhika jatumpuni, ashkha q'omer ramasniyojtaj. 12 Chaywampis phiñakuywan sik'isqa karqa, pampamantaj wijch'usqa. Inti llojsimuynejmanta wayra wayramuspa, poqoyninta ch'akirparicherqa. Chay sinch'i ramasnin ch'akirapojtin, ninaman enqhaykorqanku. 13 Kunanqa ch'in pampapi plantasqa kashan, ch'aki jallp'api, t'ajra pampapi. 14 Ramasnimpis jatunta larwaykuspa, poqoyninta q'olaykorqa. Manaña sinch'i ramasnin kanchu reyespa tojnusnimpaj jina. Kay takeyqa llakiy yarawi, llakiy tiempollapi takinapaj.
