1 Chantá Tata Diosqa Moisesta nerqa: Faraonman rispa, nimuy: Tata Diosqa ajinata nimusunki: Saqey aylluyta llojsejta yupaychamunawampaj. 2 Manachus llojsejta saqenki chayrí, Noqa castigasaj tukuynin Egiptota k'aylankulasta kachaykamuspa. 3 Nilo Mayoqa k'aylankulasta mirachenqa, chaykunataj llojsimuspa tukuynejman junt'anqanku: Wasiykiman, maypichus puñunki chayman, kamachisniykej wasisninkuman, tukuy runasniykejman, hornosniykiman, maypichus t'antata ruwanki, chayman ima. 4 K'aylankulasqa pataykiman wicharenqanku, tukuy egipcio runaspa patankuman, jinallataj kamachisniykimampis, nispa nisunki Tata Dios. 5 Chaymanta Tata Diosqa Moisesta nerqa: Aaronman niy tojnunta oqharinanta qhawarispa wayq'osman, mayusman, qochasman ima, chaykunamanta k'aylankulas llojsimunankupaj tukuynin Egipto jallp'asman, nispa. 6 Aaronqa makinta jaywarerqa Egipto yakus pataman. Jinajtinkamataj, k'aylankulasqa yakusmanta llojsiykamorqanku tukuynin Egipto jallp'asman junt'aykunankukama. 7 Tukuy yatirispis kikillantataj ruwaspa, k'aylankulasta junt'aykucherqanku Egipto jallp'asman. 8 Jina kajtin, Faraonqa Moisesta, Aarontawan wajyachispa, nerqa: Tata Diosmanta mañaychej ari, k'aylankulasta chinkachinampaj, noqamanta, runasniymantawan karunchachispa, noqataj saqesaj israelitas llojsinankuta Tata Diosman uywa wañuchisqa q'olachinasta jaywamunankupaj, nispa. 9 Moisestaj kuticherqa: Niway: Mayk'ajtaj munanki Tata Diosmanta mañanayta qanrayku, kamachisniykirayku, runasniykirayku ima, k'aylankulas karunchakunankupaj qanmanta, kamachinayki wasimantawan, mayullapiña qhepakunankupajri? 10 Faraonqa nerqa: Q'ayapacha, nispa. Moisestaj nerqa: Qampa munasqaykiman jina mañasaj, ajinamanta qan rejsinaykipaj Señorniyku Tata Dios jinaqa mana pipis kasqanta. 11 K'aylankulasqa riponqanku qanmanta, kamachinayki wasimanta, kamachisniykimanta, runasniykimanta ima; mayullapiña qhepakonqanku. 12 Moiseswan Aaronwan Faraonpa ñawpaqenmanta llojserqanku. Chantá Moisesqa Tata Diosmanta mañaporqa, k'aylankulasta Faraonman apachimusqanta karunchachinampaj. 13 Tata Diostaj Moisespa nisqanman jina ruwarqa. K'aylankulasqa wañurarqanku wasispi, patiospi, tukuy campospi ima. 14 Runasqa k'aylankula wañusqasta tantarqanku qotu qotuta. Chantaqa tukuynejpi millayta asnarerqa. 15 Faraontaj chay imas manaña kajtin, qonqaporqa, sonqontapis astawan rumiyacherqa, manallataj kasorqachu Moiseswan Aaronwan nisqankuta, Tata Diospa nisqanman jina. 16 Tata Diosqa ujtawan Moisesman nerqa: Aaronman niy ujtawan tojnunta oqharinanta, chaywantaj jallp'ata wajtachun. Chay jallp'a usaman tukuspa, tukuynin Egiptoman junt'aykonqa, nispa. 17 Paykuna ajinata ruwarqanku. Aaronqa tojnunta oqhariytawan, pampata wajtaspa jallp'ata oqharicherqa, chaytaj usaman tukorqa. Chay usasqa runasman, uywasman ima junt'aykorqa. Tukuynin Egiptopi maynejpipis usallaña karqa. 18 Yatirisqa kikillantataj ruwayta munaspa imatachus yachasqankuwan, mana ajinata ruwayta aterqankuchu. Usasqa tukuynin runasta tukuykorqa, jinallataj uywastapis. 19 Chaymantaqa chay yatirisqa Faraonta nerqanku: Kayqa Diospa castigon, nispa. Faraontajrí astawan sonqonta rumiyacherqa, manataj imatapis kasorqachu, Tata Diospa nisqanman jina. 20 Tata Diosqa ujtawan nillarqataj Moisesman: Q'aya paqarin Faraonqa tutamanta mayuman renqa; qampis tutamanta jatarispa, riy paywan parlaj. Ajinata ninki: Tata Diosqa ajinata nimusunki: Saqey wawasniyta llojsejta yupaychamunawankupaj. 21 Manachus saqenki llojsejta chayqa, Noqa apachimusaj imaymana khanikoj ch'uspista qampa pataykiman, kamachisniykiman, runasniykiman, wasisniykiman ima junt'aykunampaj. Tukuy egipciospa wasisninkuman junt'aykonqanku, tukuy pampasnintinman. 22 Ajina kashajtimpis, Gosén jallp'apeqa mana kanqachu khanikoj ch'uspisqa, maynejpichus wawasniy tiyakushanku, chaypi. Ajinamanta yachankichej Noqa Tata Dios kay jallp'a patapi kashasqayta. 23 Ajinata aylluyta t'aqasaj aylluykimanta. Chaytaj q'ayapacha kanqa, nispa nin Tata Dios. 24 Ajinata Tata Dios ruwarqa. Khanikoj ch'uspisqa manchay ashkhas aywirimorqanku Faraonpa kamachinan wasiman, kamachisnimpa wasisninkuman, tukuynejman junt'aykunankukama. Tukuynin Egipto naciompi tukuy imasta tukurparerqanku. 25 Chaymanta Faraonqa Moisesta, Aarontawan wajyachispa, nerqa: Rispa, Diosniykichejman uywa wañuchisqa q'olachinasta jaywamuychej, mana kay jallp'amanta ripuspalla, nispa. 26 Moisestajrí kuticherqa: Jinata kayllapi ruwanaykoqa mana allinchu; ima uywastachus Señorniyku Tata Diosman jaywasqayku, chaykunaqa egipciospaj mana allinchu; paykunapajqa diosninku. Sichus egipcios rikuwasqayku chay uywasta wañuchispa q'olachinasta jaywashajta chayqa, mayqenkunatachus paykuna yupaychanku chaytaqa, cheqamanta rumiswan ch'anqaykuspa wañurparichiwasqayku. 27 Noqaykoqa rinayku tiyan kinsa p'unchay puriyta ch'in pampaman, chaypi Señorniyku Tata Diosman uywa wañuchisqa q'olachinasta jaywamunaykupaj, Pay kamachiwasqaykuman jina. 28 Faraontaj nerqa: Noqa saqesqaykichej ch'in pampaman rispa Señorniykichej Tata Diosman uywa wañuchisqa q'olachinasta jaywamojta, ama ancha karuman rinaykichej kajtenqa; chaypi noqapajpis mañapuwaychej. 29 Moisestaj kuticherqa: Kaymanta riytawan, Tata Diosmanta mañapusqayki kay khanikoj ch'uspis qanmanta jatarinankupaj, jinallataj kamachisniykimanta, llajtaykimantapis q'ayapacha. Qantajrí ama ch'awkiyawaykuñachu, amañataj jark'aychu israelitasta Tata Diosman uywa wañuchisqa q'olachinasta jaywamojta. 30 Moisesqa Faraonpa ñawpaqenmanta llojsispa, Tata Diosmanta mañaporqa. 31 Tata Diostaj Moisespa mañapusqanman jina ruwarqa. Tukuynin khanikoj ch'uspista chinkacherqa Faraonmanta, kamachisnimpamanta, runaspa wasisninmanta ima ni uj puchuyojta. 32 Faraontajrí chayta rikuytawan, sonqonta rumiyachillarqapuni, manataj saqerqachu israelitasta rejta.
