ÉXODO 6

1Chantá Tata Diosqa Moisesman kuticherqa: Kunanraj rikunki imatachus Faraonta ruwasaj, chayta, imaraykuchus paymantaqa sinch'i kallpawampuni kacharichisqaykichej kaymanta ripunaykichejpaj. Pay kikin imata jina qharqosonqachej. 2Jinapi Diosqa Moiseswan parlallarqapuni: Noqamin kani Tata Dios. 3Noqaqa Tukuy Atiyniyoj Dios sutiywan rejsichikorqani Abrahamwan, Isaacwan, Jacobwan ima. Tata Dios nisqa sutiywanrí paykunaman mana rejsichikorqanichu. 4Chantapis paykunawan uj tratota ruwarqani, Canaán jallp'ata qonaypaj, mayqempichus paykuna forasteros jinalla tiyakorqanku pisi p'unchaykunata, chayta. 5Kunanqa rikuniña israelitas sinch'ita ñak'arisqankuta, egipcios sinch'ita paykunata trabajachisqankuta, kunantaj yuyarikuni tratota ruwasqaymanta. 6Chayrayku nimuy israelitasman: Noqamin Tata Dios kani, orqhosqaykichejtaj chay jina ñak'arispa egipciospaj trabajanaykichejmanta, chay jina sinch'i kamachi ruway mana atinamanta. Noqaqa atiyniyta rikuchisaj. Atiyniyoj makiywan jatuchaj castigosta rikuchispa, kacharichisqaykichej. 7Noqaqa orqhokapusqaykichej; qankunaqa aylluy kankichej, Noqataj Diosniykichej kasaj. Chaypi qankunaqa yachankichej Noqamin Tata Dios qankunaj Diosniykichej kasqayta, jinataj egipcios mayta ñak'arichispa trabajachisusqaykichejmanta Noqamin qankunata orqhosqayta. 8Noqaqa pusasqaykichej, ima jallp'atachus Abrahamman, Isaacman, Jacobman ima herenciankupaj qonayta nerqani, chayman. Noqamin kani Tata Dios, nispa nerqa Dios. 9Chay kikinta Moisesqa israelitasman willamorqa; paykunatajrí mana payta kasuta ruwarqankuchu, imaraykuchus may ñak'arisqa kasharqanku, may sinch'ita trabajashasqankurayku. 10Chantá Tata Diosqa Moisesman nillarqataj: 11Rispa, Faraonman nimuy: Saqey israelitasta jallp'aykimanta llojsejta, nispa. 12Moisestajrí Tata Diosman kuticherqa: Qhaway, ni israelitaspis uyarishawankuchu. Imaynatataj Faraón noqata uyariwanqari, noqa mana ch'uwata parlayta atishajtiyri? nispa. 13Chaywampis Tata Diosqa Moisestawan Aarontawan kacharqa israelitasman, rey Faraonmanwan willamunankupaj, paykuna israelitasta Egipto jallp'amanta orqhonankupaj kamachisqa kasqankuta. 14Kaykuna karqanku sapa ayllumanta kurajkuna: Israelpa kuraj kaj churin Rubenpata churisnin kaykuna karqanku: Hanoc, Falú, Hezrón, Carmi ima. Chaykuna karqanku Rubenpa wasi ayllusnin. 15Kaykuna Simeonpa churisnin karqanku: Jemuel, Jamín, Ohad, Jaquín, Zohar, Saúl ima. Kay Saulpataqa maman cananea karqa. Chaykuna karqanku Simeonpa wasi ayllusnin. 16Kaykuna karqanku Levijpa churisnimpa sutisninku kurajmanta sullk'akama: Gersón, Coat, Merari ima. Leviqa pachaj kinsa chunka qanchisniyoj watasta kawsarqa. 17Gersonpa churisnenqa kaykuna karqanku wasi ayllusninkuman jina: Libni, Simei ima. 18Coatqa pachaj kinsa chunka kinsayoj watasta kawsarqa. Churisnintaj karqanku: Amram, Izhar, Hebrón, Uziel ima. 19Merarijpa churisnin karqanku Mahli, Musi ima. Chaykuna karqanku Levijpa wasi ayllusnin, mirayninkuman jina, kurajmanta sullk'akama. 20Amramqa casarakorqa tian Jocabedwan, churisninkutaj karqanku Aaronwan, Moiseswan. Amramqa kawsarqa pachaj kinsa chunka qanchisniyoj watasta. 21Izharpa churisnin karqanku Coré, Nefeg, Zicri ima. 22Uzielpa churisnin karqanku Misael, Elzafán, Sitri ima. 23Aaronqa casarakorqa Elisabetwan, mayqenchus karqa Aminadabpa ususin, Naasonpa panan, chaywan. Paymanta nacejkuna karqanku Nadab, Abiú, Eleazar, Itamar ima. 24Corejpa churisnin karqanku Asir, Elcana, Abiasaf ima. Chaykuna karqanku Corejpa wasi ayllusnin. 25Aaronpa ujnin kaj churin Eleazar casarakorqa Futielpa ususinwan, paypa churintaj karqa Finees. Chaykuna karqanku levitaspa wasi ayllusninkuman jina kurajkuna. 26Kaykuna karqanku chay Aaronwan Moiseswan, pikunamanchus Tata Diosqa nisqa israelitasta orqhomunankuta Egipto jallp'amanta ashkha soldadosta jina, chaykuna. 27Paykunallataj kanku chay Moiseswan Aaronwan, Egiptomanta rey Faraonwan parlamojkuna, israelitasta orqhomunankupaj Egiptomanta. 28Maypachachus Tata Diosqa Egiptopi Moisesman parlarqa chaypacha, Pay nerqa: 29Noqamin kani Tata Dios. Rispa, Egiptomanta rey Faraonman willamuy, imastachus Noqa nisqayki, chayta, nispa. 30Moisestajrí Tata Diosman kuticherqa: Noqaqa mana parlayta atinichu, qalluy watakuwan. Imaynatataj chay jinata Faraonqa uyariwanqari? nispa.

will be added

X\