1 Chantá Moiseswan, Aaronwan Faraonman parlaj rispa, nerqanku: Israelpa Diosnin Tata Diosqa ajinata nin: Saqey israelita wawasniyta ch'inman rinankuta, chaypi yupaychana fiestata sutiypi ruwanankupaj, nispa. 2 Faraontajrí kuticherqa: Pitaj kasqa chay Tata Dios, noqa Paypa nisqanta kasunaypaj, israelitastataj rejta saqenaypaj? Noqaqa mana rejsinichu chay Tata Diosta, nitaj saqesajchu israelitasta rejta, nispa. 3 Paykunataj nerqanku: Hebreospa Diosnin taripawayku. Chayrayku rinaykupuni tiyan ch'in pampaman kinsa p'unchay puriyta, chaypi uywa wañuchisqa q'olachinasta Señorniyku Tata Diosman jaywamunaykupaj, ama ima onqoywampis nitaj espadawampis wañuchisqa kanaykupaj, nispa. 4 Chantá Egiptomanta reyqa paykunaman nerqa: Qankunarí, Moisés, Aarón, imaraykutaj runasta trabajosninkuta saqechiyta munashankichejri? Riychej qankunapis, trabajosniykichejta ruwamuychej, nispa. 5 Chantá Faraonqa nillarqataj: Kunanqa ashkha kanku israelitasqa kay tukuynejpi. Qankunachu saqechiwajchej kasqa trabajosninkuta? nispa. 6 Chay kikin p'unchaypacha Faraonqa sapa t'aqamanta kaj kurajkunata, jilaqatastawan kamacherqa: 7 Kunanmanta ñawpajmanqa, amaña pajata israelitasman qonkichejchu ladrillosta ruwanankupaj, imaynatachus kunan qoshankichej, jinataqa. Manachayqa paykuna kikinku rispa, oqharikamuchunku pajataqa. 8 Qankunataj ninaykichej tiyan, imaynatachus kunankama ruwarqanku, ajinallatapuni ladrillosta ruwanankuta ni uj pisita, imaraykuchus paykunaqa qhellamanta nishanku: Rispa, Diosniykuman uywa wañuchisqa q'olachinasta jaywamusqayku, nispa. 9 Qankunaqa astawan sinch'ita trabajachiychej, imatachus ruwanallankupi yuyanankupaj, amataj kasunankupaj llulla nisqasta, nispa nerqa Faraonqa. 10 Chaymanta sapa t'aqata kamachejkuna, jilaqatas ima llojsiytawan, runasman nerqanku: Faraonqa kamachiwayku amaña pajata qankunaman qonaykuta. 11 Kunanqa qankuna kikiykichej maymantapis pajata oqharikamunaykichej tiyan, nitaj ni uj ladrillo pisita ruwanaykichejchu tiyan, kunankama ruwarqankichej, chaymanta. 12 Chayrayku israelitasqa tukuynejta ch'eqerakorqanku rastrojosta pajaj cuentanmanta oqharimoj. 13 Sapa t'aqata kamachejkunaqa astawan sinch'ita trabajacherqanku, nerqankutaj: Tukunaykichej tiyan sapa p'unchay, mashkhatachus ruwanaykichej kashan, chay chhikata, pajata qoshajtiyku ruwaj kankichej, chay chhikallatataj, nispa. 14 Jinataj Faraonpa jilaqatasnenqa maytapuni jasut'erqanku, israelitas ukhupi jilaqatas churasqa karqanku, chaykunata, nerqankutaj: Imaraykutaj mana mashkhatachus ruwaj kankichej, chay chhikallatataj ladrillosta ruwankichejchu, ni qayna, nitaj kunampisri? nispa. 15 Chaymantaqa israelita jilaqatasqa Faraonman quejakoj rispa, nerqanku: Imaraykutaj chay jinata ruwanki kay kamachisniykitari? 16 Manaña qowaykuchu pajata, munankitaj ladrillosta ruwanaykuta; chantapis anchata jasut'iwayku. Chaypajqa runasnillaykitaj juchayoj kanku, nispa. 17 Faraontajrí paykunaman nerqa: Qankunaqa qhellas kankichej, sinch'i qhellas. Chayrayku ninkichej: Rispa, Tata Diosman uywa wañuchisqa q'olachinasta jaywamusqayku, nispa. 18 Riychej, ruwanaykichejta ruwamuychej. Pajataqa mana qosonqachejchu; chaywan mana chaywan qankunaqa, mashkhatachus ruwaj kankichej, chay chhikallatapuni ladrillosta ruwanaykichej tiyan sapa p'unchay, nispa. 19 Israelita jilaqatasqa, aswan llakiypi rikukorqanku, Faraón nisqanrayku: Ladrillo ruwanasniykichejmanta sapa p'unchay mana pisitachu ruwankichej, nispa. 20 Paykunataj Faraonwan parlasqankumanta llojsimuspa, Moiseswan Aaronwan jawapi suyashajwan tinkukorqanku. 21 Paykunamantaj nerqanku: Tata Diosqa rikuchun qankunaj ruwasqaykichejta, juzgachuntaj. Qankuna juchayoj kankichej Faraón, tukuy kamachisnin ima astawan noqanchejta chejninakunawanchejpaj. Qankuna kikiykichej churankichej espadata Faraonpa makisninman, noqanchejta wañuchinawanchejpaj, nispa. 22 Moisesqa chaymanta rispa, Tata Diosmanta mañakorqa: Señorníy, imaraykutaj chay jinatapuni llakichinki kay ayllutari? Chaypajqa imapajtaj kachamuwarqankiri? 23 Kayman jamuspa Faraonman sutiykipi parlasqaymantapacha payqa astawan llakiyman churan israelitasta, Qantaj chaymanta manaraj kacharichinkichu aylluykita, nispa.
