ÉXODO 40

1Chantá Tata Diosqa Moisesman nerqa: 2Ñawpaj kaj p'unchaypi ñawpaj kaj killamanta Dioswan Tinkukuna Toldota sayarichinki. 3Chay ukhuman churaykunki Diospa leyninwan kashan, chay arcata, chaytataj velowan pakasqata jina t'aqaykunki. 4Mesata apaykuspa, maychus kananman churaykunki, tukuy imasnintinta. K'anchachinata apaykuspapis, tukuy imasnintapis maychus kananman churaykunki. 5Chantá apaykullankitaj qori altarta, chaypi inciensota q'oshñichinapaj Diospa leyninwan kashaj arcaj ñawpaqenman, jinaspataj Dioswan Tinkukuna Toldo punkuman cortinawan jark'aykuchiy. 6Dioswan Tinkukuna Toldoj ñawpaqenman churallankitaj jaywanasta q'olachina altarta. 7Chaymantaqa jatun ch'illamita yakuyojta churallankitaj, Dioswan Tinkukuna Toldowan, altarwan kashan, chay chawpiman. 8Chaymantataj cortinaswan pationta muyuykuchinki, punkumantaj uj cortinata warkhuykunki. 9Chantá Diospaj t'aqanapaj aceitewan Dioswan Tinkukuna Toldota jawiykunki, jinallataj chay ukhupi imaschus kajkunatapis. Ajinata chaytaqa tukuy imasnintawan Diospaj t'aqanki. 10Jaywanasta q'olachina altartapis jawina aceitewan jawiykunki, tukuy imasnintawan. Ajinata chay altartaqa Diospaj t'aqanki, may santo kanampaj. 11Jatun ch'illamitapis sayanantinta jawina aceitewan jawillankitaj, ajinamanta santollataj kanampaj. 12Chaymantataj Aaronta, churisnintawan Dioswan Tinkukuna Toldo punkuman pusay, chaypitaj paykunata yakuwan mayllanki. 13Chantá Aaronta sumaj ruwasqa p'achaswan p'achallichinki, aceitewantaj jawispa, payta t'aqanki sacerdotey kanampaj. 14Chaymantaqa churisnintañataj qayllachimuspa, chay t'aqasqa p'achaswan paykunatapis p'achallichillaytaj. 15Jinaytawantaj, aceitewan paykunata jawiy, imaynatachus tatankuta jawerqanki, ajinata, paykunapis sacerdotesniy kanankupaj. Ajinata aceitewan jawisqaykeqa wiñaypaj kanqa, wawasninkupis qhepaman sacerdotesllapuni kanankupaj, nispa nerqa Tata Diosqa. 16Moisesqa chay tukuyta kikinta ruwarqa Tata Diospa kamachisqanman jina. 17Ajinata Egiptomanta llojsimusqankumanta iskay watanman qallarikuy killapi, ñawpaj kaj p'unchaypitaj Dioswan Tinkukuna Toldo sayarichisqa karqa. 18Moisesqa Dioswan Tinkukuna Toldota sayaricherqa; chukustapis sumajta churarqa, chaymantaj tablasninta sayaykucherqa, jinaspataj k'aspisninta jusk'uracherqa, chaymantataj sayantasninta sayaracherqa. 19Chantá Moisesqa Dioswan Tinkukuna Toldota jatunman aysaspa sayaricherqa, jinaspataj patanta qhatanawan qhataykorqa, Tata Diospa kamachisqanman jina. 20Chaymanta Moisesqa, rumispi Diospa leynin qhelqasqa karqa, chayta arcaman churaykorqa, chay arcaj ninrisninmantaj k'aspista jusk'uracherqa; jinaspataj, Khuyakuyta Tarina nisqa kirpananwan kirpaykorqa. 21Chantá chay arcata apaykorqa Dioswan Tinkukuna Toldoman; velota warkhuykuspataj, chaywan chay arcata pakasqata jina t'aqaykorqa, Tata Diosqa Moisesman kamachisqanman jina. 22Dioswan Tinkukuna Toldoman apaykullarqataj mesata, Dioswan Tinkukuna Toldo wichaynejman, velomanta jawanejpi. 23Chay mesa patamantaj t'antasta churaykorqa maychus kananman Tata Diospa ñawpaqempi, Tata Dios payman kamachisqanman jina. 24Jinallataj Dioswan Tinkukuna Toldoman apaykullarqataj k'anchachinata, mesaj chimpanman Dioswan Tinkukuna Toldo uraynejman. 25Chaymantataj k'anchachinaj puntasninman k'anchaykunata jap'iracherqa Diospa ñawpaqempi, Tata Diosqa payman kamachisqanman jina. 26Qori altartapis apaykullarqataj Dioswan Tinkukuna Toldoman veloj ñawpajninman. 27Chay altar patapitaj sumaj q'apashaj inciensota q'oshñicherqa, Tata Diosqa Moisesman kamachisqanman jina. 28Chaymantaqa Dioswan Tinkukuna Toldo punkuman Moisesqa uj cortinata warkhuykorqa. 29Chay punkoj ñawpaqenman jaywanasta q'olachina altarta churarqa. Chantá chay altar patapi Tata Diosman q'olacherqa uywa wañuchisqasta, ch'aki mikhuy ofrendastawan, Tata Diosqa Moisesman kamachisqanman jina. 30Chaymantaqa jatun ch'illamitañataj, Dioswan Tinkukuna Toldowan altarwan kashan, chay chawpiman churaykorqa, chaymantaj mayllakunapaj yakuta churarqa. 31Chaypi mayllakoj kanku makisninkuta, chantá chakisninkuta ima Moiseswan, Aaronwan, chantá churisnin ima. 32Chaypi mayllakoj kanku Dioswan Tinkukuna Toldoman yaykunankupaj, jinallataj altarman qayllaykunankupajpis, Tata Diosqa Moisesman kamachisqanman jina. 33Chay imasta ruwayta tukuytawan, Dioswan Tinkukuna Toldoj patiompa muyuyninta, altarpa muyuyninta ima cortinawan muyuykucherqa. Chaymantataj patio punkumampis uj cortinata churaykullarqataj. Ajinata Moisesqa chay tukuy imasta ruwayta tukuycharqa. 34Chantaqa Dioswan Tinkukuna Toldota phuyuykamorqa, Tata Diospa jatun kaynintaj chay toldoman junt'aykorqa. 35Jinamanta Moisesqa manaña chayman yaykuyta aterqachu, imaraykuchus tukuyninta phuyuykorqa, Tata Diospa jatun kaynimpa k'anchaynintaj toldoman junt'aykorqa. 36Chay phuyu oqharikojtin, israelitasqa tukuy imasninkuta oqharikuytawan, purirej kanku maymampis rinankupaj. 37Mana chay phuyu oqharikojtintaj, israelitasqa mana oqharikojchu kanku, ima p'unchaychus chay phuyu oqharikunankama. 38Israelitaspa chay tukuy puriyninkupi Tata Diospa phuyun sapa p'unchay Dioswan Tinkukuna Toldomanta manapuni oqharikojchu; tutantaj nina k'anchayllapuni kaj Dioswan Tinkukuna Toldo patapi.

will be added

X\