1 Moisesqa tukuynin israelitasta tantachispa, paykunaman nerqa: Kay jinata Tata Diosqa kamachin: 2 Sojta p'unchayta trabajankichej, qanchis kaj p'unchaypitaj samarikunkichej, Diospaj t'aqasqa p'unchay kasqanrayku. Pillapis chay p'unchaypi trabajajqa wañuchisqa kachun. 3 Amapuni ninallatapis wasisniykichejpi jap'ichinkichejchu samarikuna p'unchaypeqa, nispa. 4 Moisesqa tukuynin israelitasman nerqa: Kayta Tata Dios kamachin: 5 Qankuna ukhupi ofrendata Tata Diospaj oqhariychej tukuy runas; tukuy sonqowan maytachus qoyta munasqankuman jina apamuchunku qorita, qolqeta, bronceta, 6 azul telasta, puka panti telasta, puka telasta, sumajnin kaj lino telastawan; cabra pelosta, 7 pukaman tiñisqa mocho qarasta, tejón qarasta, acacia maderasta, 8 k'anchachinapaj aceiteta, sumaj k'achata q'apaj imasta jawina aceitepaj, k'achata q'apashaj inciensopajpis, 9 ónice valorniyoj rumista, valorniyoj waj rumistawan efodta, sacerdotej pecheranta ima k'achanchanapaj. 10 Tukuy qankuna ukhupi yachayniyojkuna, imastapis k'achitusta ruwajkuna jamuchunku, imastachus Tata Dios kamachin, kay imasta ruwanankupaj: 11 Dioswan Tinkukuna Toldota, imaswanchus qhatasqa kanqa chayta, ganchosninta, tablasninta, k'aspisninta, sayantasninta, chukusninta, 12 arca nisqa cajonta, chay arcata wantuspa apana k'aspisninta, Khuyakuyta Tarina nisqa chay arcaj kirpananta, velo nisqa cortinata, 13 mesata, apana k'aspisninta, imaschus chay mesapi kan, chay imasta, Diosman jaywasqa t'antata, 14 k'anchachinata, imasninchus tiyan chaykunatawan, puntasnimpi k'anchan chaykunata, k'anchachina aceiteta; 15 incienso altarta, apana k'aspisninta, jawina aceiteta, k'achata q'apaj inciensota, Dioswan Tinkukuna Toldo jawa punku yaykuyta jark'achina telasta; 16 uywa wañuchisqa q'olachina altarta, broncemanta ruwasqa rejillanta, chay altarta apana k'aspisninta, imaschus chaypaj tiyan chaykunata, mayllakuna jatun ch'illamita, sayanantinta; 17 patiota jark'achina telasta, kurkusninta, chukusninta, patio punku jark'achina telasta; 18 Dioswan Tinkukuna Toldota jap'ichina estacasta, watana waskhasninta, 19 sacerdotej awasqa p'achasninta Dioswan Tinkukuna Toldoman yaykunampaj, sacerdote Aaronpa sumaj kaj p'achasninta, churisnimpa p'achasninkuta ima, chaykunata churakuspa imastapis ruwanankupaj Dioswan Tinkukuna Toldopi. 20 Tukuynin israelitas Moisespa ñawpaqenmanta riraporqanku. 21 Chaymantataj ofrendasta apamorqanku, mashkhatachus tukuy sonqowan qoyta munarqanku, chayta. Astawanqa apamorqanku Dioswan Tinkukuna Toldo nisqa ruwakunampaj, imaswanchus kanan karqa chaykunata, imasninchus kanan karqa chaykunapaj, sacerdote p'achaspaj ima. 22 Ajinata jamorqanku qharis, warmis ima ofrendas aparisqa, mashkhatachus sonqonkupi qoyta munasqankuman jina. Kay imasta apamorqanku: Jap'ichinasta, jaluchusta, qori anillosta, walqasta, imaschus qorimanta ruwasqa karqa imastawan. Ajinata Tata Diosman ofrendasta apamorqanku. 23 Chaymantaqa apamullarqankutaj: Azul telasta, puka panti telasta, puka telasta, sumaj lino telasta, cabra pelosta, pukaman tiñisqa mocho qarasta, tejón qarasta ima. 24 Pikunachus Tata Diosman ofrendata qoyta munajkuna apamullarqankutaj qolqe metalta, bronceta ima. Chantaqa pikunajtachus tiyaporqa acacia maderasninku, chaykunatapis apamullarqankutaj, imaschus ruwakunan karqa chay imas ruwakunankupaj. 25 Yachayniyoj tukuy warmispis ofrendasninkuta apamullarqankutaj, imastachus makisninkuwan sumaj t'ipasqasninkuta: Azul telasta, puka panti telasta, puka telasta, sumaj linomanta t'ipasqasta ima. 26 Chantá sumajta awayta yachajkuna warmis cabra pelosmanta imastapis phushkasqasninkuta apamullarqankutaj. 27 Kurajkunataj apamorqanku ónice valorniyoj rumista, sumaj valorniyoj llusk'achasqa rumista efod nisqapaj, chantaqa pecherapajwan. 28 Apamullarqankutaj k'acha q'apaj jawinasta, k'anchanapaj aceiteta, Diospaj t'aqanapaj jawina aceiteta, k'acha q'apaj inciensotawan. 29 Ajinata tukuy israelita qharis warmis ofrendasninkuta tukuy sonqo apamorqanku kusiywan, Tata Diosqa Moisesman kamachisqanman jina. 30 Moisesqa israelitasman nerqa: Uyariwaychej, Tata Diosqa ñapis ajllanña Judá ayllumanta Hurpa allchhin Urijpa churin Bezaleel sutiyojta. 31 Payta junt'achin Diospa Espiritunwan sumaj yachayniyoj kanampaj, jinamanta kay pachapi imasmanta sumajta yachanampaj, imastapis k'achitusta yuyaynillanmanta ruwanampaj. 32 Payqa imaymana k'acha imasta ruwanqa qorimanta, qolqe metalmanta, broncemanta, 33 ashkha valorniyoj rumismanta, maderamanta ima, chay imas k'achituspuni kanankupaj. 34 Chantaqa ajllallantaj Dan ayllumanta Ahisamacpa churin Aholiab sutiyojta. 35 Iskayninkuman qon yachayta tukuy sonqowan yachachinankupaj, tukuy imata k'achitusta ruwanankupaj pallayniyojta azul telaspi, puka panti telaspi, puka telaspi, sumaj lino telaspiwan. Ajinata imallatapis, imaynachus señalasqa kashan, chayman jina ruwanqanku.
