ÉXODO 31

1Chantá Tata Diosqa Moisesman nillarqataj: 2Qhawariy, Noqa ajllani Judá ayllumanta Hurpa allchhin Urijpa churin Bezaleel sutiyojta. 3Payman junt'achini Diospa Espiritunwan, yachayniyoj kanampaj, tukuy ima kajta yachanampaj, tukuy imata walejta ruwanampaj, 4ima ruwanatapis sumajta ruwanampaj, qorimanta, qolqemanta, broncemanta; 5sumajta llusk'achanampaj rumista, maderastawan, jinallataj imallamantapis walejta ruwanampaj. 6Payta yanapanampaj ajllallanitaj Dan ayllumanta Ahisamacpa churin Aholiab sutiyojta. Tukuy yachayniyojkunamantaj aswan yachayta qoni, qanman kamachisqasuyta kay tukuyninta ruwanankupaj: 7Dioswan Tinkukuna Toldota, Diospa trato ruwasqan arcata, Khuyakuyta Tarina nisqa kirpanantapis, Dioswan Tinkukuna Toldopi kashan, kay imastapis: 8Mesata, chay patapi kaj qori purumanta imastapis, k'anchachinata tukuy imasnintinta, incienso altarta, 9q'olachina altarta, tukuy imasnintinta, mayllakuna ch'illamita, sayanantawan. 10Ruwallanqankutaj Diospa sacerdotesnillampaj t'aqasqa awasqa p'achasta, sacerdote Aaronpa p'achasninta, Aaronpa churisnimpa p'achasnintawan sacerdotej ruwananta ruwanankupaj. 11Chaymantaqa wakichillanqankutaj jawina aceiteta, q'apashaj inciensota ima Dioswan Tinkukuna Toldopaj. Chay imasta paykuna ruwanqanku imaynatachus kamachisusqayman jina. 12Ujtawan Tata Diosqa Moisesman parlallarqataj: 13Israelitasman willanki kay jinata: Cheqamanta qankunaqa waqaychankichej samarikuna p'unchayniyta, imaraykuchus chay p'unchayqa uj señal qankunawan, mirayniykichejwan ima uj tratota ruwasqaymanta, yachanaykichejpaj Noqa Tata Dios qankunata ajllakusqayta. 14Samarikuna p'unchayta waqaychaychej, imaraykuchus qankunapajqa jatun p'unchay kanqa, Noqapaj t'aqasqa. Pichus chay p'unchayta mana waqaychajqa wañuchisqa kanqa. Chantapis, pichus chay p'unchaypi ima trabajotapis ruwajqa ayllun Israel ukhumanta wijch'usqa kanqa. 15Sojta p'unchayta trabajanqanku, qanchis kaj p'unchaypitaj samarikuna p'unchay kanqa Tata Diospaj t'aqasqa. Chayrayku pichus chay p'unchaypi ima trabajotapis ruwajqa cheqamanta wañuchisqa kanqa. 16Ajinata israelitasqa samarikuna p'unchayta waqaychanqanku, wiñaypaj trato kasqanrayku. 17Chayqa señal kanqa wiñaypaj israelitaspaj, Noqapajwan, imaraykuchus Tata Diosqa sojta p'unchaypi ruwarqa cielota, kay pachatawan, qanchis kaj p'unchaypitaj samarikorqa. 18Tata Diosqa ajinata Sinaí Orqopi Moiseswan parlayta tukuytawan, payman qorqa leyta p'alta rumispi, kikin Diospa dedonwan qhelqasqata.

will be added

X\