ÉXODO 29

1Paykuna sacerdotesniy Noqapaj t'aqasqa kanankupaj kayta ruwanki: Ajllay uj torillota, iskay sumachaj corderostawan mana iman imanasqasta. 2Chantaqa mana levadurayoj t'antata, mana levadurayoj tortillastawan ruwanki aceitewan. Wakintataj patallanmanta aceitewan jawerqonki. Chaytaqa ruwanki trigo jak'oj yuraj ñut'itunmanta. 3Chaymantaqa chay t'antasta juch'uy canastaman churaykuspa, apanki jaywamunaykipaj torillotawan, chay iskay corderostawan khuskata. 4Chaymantaj pusanki Aaronta, churisnintawan Dioswan Tinkukuna Toldo punku, chaynejman, chaypitaj paykunata yakuwan mayllanki. 5Chantá Aaronta p'achallichinki, ñawpajta jatun puka p'achawan, patanmantaj efod mantata, patanmantaj efodta, chaypa patanmantaj pecherata. Chaymantataj efodpa kantusnimpi ruwasqa chumpiswan chumpiykuchinki. 6Chaymantataj umanman mana ninriyoj chhoqo ch'uluta churanki, chaypa patanmantaj sacerdote kasqanta rejsichej lliphipej pilluta. 7Chaymantataj jawina aceitewan umanman jich'aykuspa, payta jawiykunki sacerdote kanampaj. 8Chaymantaqa churisnintañataj wajyaspa, p'achallichinki, ima p'achastachus ruwacherqayki, chaykunawan. 9Chaymantá Aaronta chumpichinki, jinallataj churisnintapis, jinaspataj churaranki chay ch'ulusta sapa ujninkuman. Ajinamanta qanqa paykunata wiñaypaj sacerdotesniy kanankupaj t'aqapuwanki. 10Chaymantaqa torillota aysanki Dioswan Tinkukuna Toldoj ñawpaqenman. Chaypitaj Aarón, churisninwan chay torilloj umanman makisninkuta churachunku. 11Chaymantataj chay torillota ñak'anki Dioswan Tinkukuna Toldo punkupi Tata Diospa ñawpaqempi. 12Chay yawarman dedoykita chhapurispa, altarpi wajrasnin jina ruwasqasta jawiray. Chay puchojwantaj tukuyninwan altar urata ch'ajchorqoy. 13Chaymantaqa ch'unchulasmanta wirachay; jinaspataj chay wirata, k'iwichantawan, lurunisnintawan wirantinta altar patapi q'olachiy. 14Aychanta, qarantawan, wanusninta imaqa ruphachinki jaramanta jawapi; chayqa jucharayku q'olachina. 15Chaymantaqa chay iskaynin corderosmanta ujninta aysanki; chantá Aarón, churisnin ima makisninkuta uman pataman churachunku. 16Chay corderota ñak'aspa, yawarninwan ch'ajchorqoy altarpa patanta, muyuynintinta ima. 17Chantá chhikan chhikanta aychasninta khuchuranki. Wijsampi ch'unchulastawan, piernasnintawan mayllaranki. Chaykunata, umantawan khuska aychasnin pataman churanki. 18Jinaytawantaj, tukuynin aychasninta altar patapi q'olachinki ima munay q'apashajta Tata Diospa munasqanman jina; chayqa ninapi q'olachisqa Tata Diosman uj jaywana. 19Chaymantaqa chay ujnin corderoj umanmanñataj Aaronwan, churisninwan makisninkuta churachunku. 20Qantaj chay corderota ñak'anki, uj chhika yawarninwantaj Aaronpa paña ninrin uraman jawiykunki. Churisninmampis jawiykullaytaj paña ninrisnin uraman, jinallataj paña makisninkoj machu dedosninkuman, paña chakisninkoj machu dedosninkuman. Chay puchoj yawarwantaj altar patanta, tukuy muyuynintawan ch'ajchorqonki. 21Altar patapi kaj yawarwan, jawina kaj aceitepiwan uj chhikawan Aaronpa p'achasninman ch'ajchuriy, jinallataj churisnimpa p'achasninmampis. Ajinamanta Aaronqa, churisnin ima Diospaj t'aqasqa kanqanku, jinallataj p'achasninkupis. 22Chaymantataj jap'iy corderoj wiranta, chupanta, ch'unchulasninmanta wiranta, k'iwichanta, iskaynin lurunisninta, chaymanta wirasnintawan, chantaqa paña piernantawan; chay corderoqa Diospaj sacerdotesta t'aqanapaj kanqa. 23Jinaytawantaj uj jatun t'antata oqharinki, aceitewan ruwasqa t'antatawan, uj muyu tortillata aceitewan jawisqata, mayqenchus Tata Diospa ñawpaqempi mana levadurayoj t'anta canastitapi kashan, chayta. 24Chay tukuyninta Aaronman jaywanki, jinallataj churisninmampis, chaytataj paykuna Tata Diospa ñawpaqempi ikhaspa jaywanqanku. 25Makinkumanta oqhariytawantaj, chay t'antasta altarpi q'olachiy cordero wañuchisqa q'olachinawan khuska, Tata Diospa ñawpaqempi sumajta q'aparishajta. Chay ofrendaqa Tata Diospaj q'olachisqapuni kanqa. 26Aaronqa Diospaj t'aqasqa kanampaj, chay corderoj pechonta ikhasqa ofrendata Tata Diospa ñawpaqempi jaywanki. Chaytaj qampaj kanqa. 27Aarón, churisninwan Diospaj t'aqasqa karqanku, chay corderoj ikhasqa ofrenda pechonta, piernantawan t'aqanki. 28Chay t'asqasqataj kallanqapuni Aaronpaj, churisnimpajwan israelitasmanta wiñaypaj. Israelitas allinyakuy jaywanata jaywaspa, chay t'aqasqata Tata Diosman qonanku tiyan. 29Aaronpa sacerdote p'achasnenqa qhepakonqa, aswan qhepaman churisninmanta kajkuna churakunankupaj, chay p'achasta churakuspa aceitewan jawichikunankupaj, jinallataj Diospaj t'aqasqa kanankupaj. 30Aarón wañupojtin, mayqen churimpis cuentanmanta sacerdote jina sayajqa, Dioswan Tinkukuna Toldoman yaykuspa sacerdotej ruwanasninta ruwanampaj, Diospaj t'aqasqa cheqapi qanchis p'unchayta chay p'achasta churakonqa. 31Chaypaj wakichisqa kaj corderoj aychanta kankanki Diospaj T'aqasqa Cheqapi. 32Chaymantataj Aaronwan, churisninwan chay aychata mikhonqanku, juch'uy canastapi kashan, chay t'antatawan, Dioswan Tinkukuna Toldo punkupi. 33Paykuna chay aychata mikhonqanku, juchankoj cuentanmanta jaywasqa karqa sacerdotepaj t'aqasqa kashajtinku, chayta. Waj runasqa mana chayta mikhuyta atinkuchu, Diospaj t'aqasqa kasqanrayku. 34Sichus q'ayantimpaj chay aychawan, t'antaswan ima puchunman chayqa, ninapi ruphachinki ama pipis mikhunampaj, imaraykuchus chayqa Diospaj t'aqasqamin. 35Ajinata qanqa Aaronpaj ruwanki, churisnimpajwan imaynatachus Noqa kamachisqasuyman jina. Chay tukuy imasta qanchis p'unchayta ruwanki. 36Chaymantaqa sapa p'unchay Diosman jaywanki uj torillota juchaj cuentanmanta. Altarta sumajta llimphuchanki; chay patapitaj uj uywa wañuchisqa q'olachinata jaywanki juchasrayku; aceitewantaj jawiykunki Diospaj t'aqasqa kanampaj. 37Qanchis p'unchay junt'ata altar patapi uywa wañuchisqa q'olachinasta jaywanki altarrayku. Ajinamanta Diospaj t'aqasqa kanqa. Chay altartaj may santo kanqa. Imallapis chay altarman chayaykojqa Diosllapaj t'aqasqa kanqa. 38Kayta jaywanki sapa p'unchay mana qonqaspa altar patapi: Iskay corderosta uj watayojtakama. 39Ujnin kajta tutamanta jaywanki, ujnin kajtataj ch'isiyaykuyta. 40Chantapis, ñawpaj kaj corderowanqa jaywallankitaj iskay kilo trigo jak'oj yuraj ñut'itunta, uj litro olivo aceitewan chajrusqata. Chaymantaj ch'ajchuykunki uj litro ofrenda vinowan. 41Kikillantataj chay ujnin kaj corderotapis ch'isiyaykuyta jaywanki tutamanta jina, jak'uwan, vinowan ima. Sumaj q'apashaj ofrendata Tata Diospa munananta q'olachinki. 42Chay q'olachisqa ofrendaqa ñawpaqeypi Noqaman jaywasqapuni kanqa tukuy runaspa miraynimpi wiñaypaj, Dioswan Tinkukuna Toldo punkupi, maypichus tinkukusunchej parlasunaypaj, chaypi. 43Chaypipis tantakullasajtaj israelitaswan. Chay cheqataj, chaypi jatun kayniypa k'anchaynin kasqanrayku Noqallapaj t'aqasqa kanqa. 44Noqapaj t'aqasaj chay Tinkukuna Toldota, altarta ima. Chaymantaqa t'aqallasajtaj Aaronta, churisnintawan, paykuna sacerdotesniy kanankupaj. 45Israelitas ukhupi Noqa tiyakusaj, Diosninkutaj kasaj. 46Ajinamanta yachanqanku Noqa Señorninku Tata Dios kasqayta, pichus paykunata Egiptomanta orqhomorqa paykunaj chawpinkupi kanaypaj, chay. Noqamin kani Señorninku Tata Diosqa.

will be added

X\