ÉXODO 24

1Tata Diosqa Moisesta nerqa: Maypichus Noqa kashani, chayman wicharimuy Aaronwan, Nadabwan, Abiuwan, israelitasmanta qanchis chunka kurajkunapiwan, karumantapachataj qonqorikunkichej. 2Moisés, qanlla Noqaman qayllamuwanki; paykunaqa karunejllapi kanqanku, nitaj waj runasqa qankunawan jamonqankuchu, nispa. 3Moisesqa chaymanta kutirispa, runasman willarqa imaynatachus payman Tata Dios parlasqanta, kamachisqantataj. Runastaj chay nisqanman jina uj similla kuticherqanku: Noqaykoqa Tata Diospa tukuy kamachisqasninta ruwasqayku, nispa. 4Chaymanta Moisesqa Tata Diospa tukuy nisqasninta qhelqarqa. Tutamanta jatarispataj, uj altarta orqo k'uchupi chunka iskayniyoj rumiswan ruwarqa, chay rumistaj Israel ayllusman jina karqa. 5Jinataj Moisesqa israelita waynasta kacharqa Tata Diosman jaywamunankupaj torillosta uywa wañuchisqa q'olachinasta, allinyakuy jaywanasta ima. 6Moisestaj chay torillospa yawarninmanta khuskanta jap'ispa, ch'illamispi jallch'arqa. Khuskan yawarwantaj chay altar ruwasqanta ch'ajchorqa. 7Jinaspataj, chay trato ruwasqan libro qhelqasqanta runasman leeykorqa. Chaypachataj runasqa nerqanku: Noqaykoqa Tata Diospa nisqasninta, kamachisqasninta ima ruwasqayku, nispa. 8Chantá Moisés chay yawarta jap'iytawan, runasman ch'ajchuspa, nerqa: Kay yawarqa Tata Dios qankunawan uj tratota ruwasqan yawar, tukuy kay nisqaman jina, nispa. 9Chaymanta Moisesqa orqoman wicharerqa Aaronwan, Nadabwan, Abiuwan, israelitasmanta qanchis chunka kurajkunawan khuska. 10Chaypitaj Israelpa Diosninta rikorqanku, chakisnin urapitaj rikorqanku lliphipirishajta safiromantapis pampan ruwasqa kanman jinata, pichasqa cielo jina sut'isituta. 11Chay ajllasqa israelitastarí Diosqa mana imanarqachu; paykunaqa Diosta rikorqanku, chantaqa mikhorqanku, ujyarqankutaj. 12Tata Diosqa Moisesta nerqa: Jamuy, orqoman wicharimuy, maypichus Noqa kashani, chayman; chaypi suyaway, Noqataj p'alta rumista qosqayki. Chay rumispi uj ley qhelqasqa kanqa, kamachisqas ima, qankunaman yachachinaypaj. 13Sayarispa, Moisesqa Josué yanapajninwan khuska wicharerqa Diospa orqonman. 14Chay qanchis chunka kurajkunamantaj Moisesqa nerqa: Kayllapi suyashawayku kutimunaykukama. Qankunawan qhepakushanku Aaronwan, Hurwan; paykunaman ima kajtapis willakunaykichejpaj, nispa. 15Chantá Moisesqa orqoman wicharerqa, phuyutaj chay orqota p'ampaykorqa. 16Jinapitaj Tata Diospa jatun kaynimpa k'anchaynin chay Sinaí Orqoman urayk'amorqa. Chay phuyoqa chay orqota sojta p'unchayta p'ampaykorqa. Qanchis kaj p'unchaypitaj phuyu ukhumanta Tata Diosqa Moisesta wajyamorqa. 17Chay p'unchaypi Tata Diospa jatun kaynimpa k'anchaynin israelitasman rikhurimorqa q'olaj nina jina. 18Moisestaj chay phuyu ukhuman yaykuspa, orqoman wicharerqa. Chaypitaj payqa kamorqa tawa chunka p'unchayta, tawa chunka tutatawan.

will be added

X\