ÉXODO 23

1Ama llullakuspa imatapis willankichu; ama sajra runawan yachachinakuychu mana kajta parlanaykipaj. 2Ama ashkha kasqankurayku sajra juchankuta ruwaysinkichu; amataj pleitopi ashkhaspa nisqankuta nillaytajchu paykunata manchachikuspa, mana allin kajta: Allin, nispa. 3Amallataj pleitopi wajcha kajmampis kutikunkichu. 4Sichus enemigoykej chinkasqa wakanta, chayrí burronta tarinki chayqa, paypaman qhaterqapuy. 5Sichus enemigoykej burron cargawan sayk'uspa wijch'ukushan chayqa, ama qhawakullankichu, astawanqa yanapay sayarichiyta. 6Pleitopi imachus cheqan kajta, wajcha runaman chayajtaqa ama q'ewinkichu. 7Llullakuspa juchachaymanta t'aqakuy, amataj wañuchichinkichu mana juchayoj, cheqan runata; chayta ruwajtaqa mana qhawakullasajchu mana juchayojta jinaqa. 8Ama imatapis lluk'ichikunkichu, imaraykuchus tukuy ima sut'i kashajtimpis, lluk'eqa mana rikojta saqen, jinallataj mana juchayojtaqa juchayojta rikhurichin. 9Forasterota ama llakichinkichejchu; qankunapis Egiptopi forasterosllataj tiyakorqankichej. Chayrayku yachallankichej runaj llajtampi imaynachus tiyakuna kasqantaqa. 10Sojta watasta jallp'aykita llank'aspa, chaymanta poqoyninta oqharinki. 11Qanchis kaj watapitaj ama llank'ankichu; saqey samarikojta, chay watapi sapallanmanta poqojta llajtaykimanta kaj wajcha runas mikhunankupaj, chantapis chaymanta qhepakojta animales mikhunankupaj. Ajinallatataj ruwanki uvas huertaykiwan, olivo sach'asniykiwan ima. 12Sojta p'unchaykunata llank'anki, qanchis kaj p'unchaypitaj samarikunki, wakasniyki, burrosniyki samarikunankupaj, jinallataj warmi kamachiykej wawan kallpachakunampaj, jinallataj forasteropis. 13Tukuy kay nisqasniyta kasuychej. Ama jayk'ajpis waj dioskunaj sutinta oqharinkichejchu, nitaj simiykichejmantapis uyarikuchunchu. 14Watapi kinsa kutita jatuchaj fiestasta sutiypi ruwapuwankichej. 15Mana Levadurayoj T'anta fiestata ruwankichej, qanchis p'unchay junt'atataj mana levadurayoj t'antata mikhunkichej, imaynatachus nisusqayman jina. Chaytaqa mikhunkichej Abib killapi, imaraykuchus chay killapi Egiptomanta llojsimorqankichej. Amataj pipis Noqaman makisnin ch'usajlla jamuwachunchu. 16Cosechasmanta fiestasta ruwallaychejtaj, tarpusqasniykichejmanta ñawpaj poqojkunamanta. Jinallataj Wata Tarpuy Cosecha fiestatapis ruwankichej. 17Tukuy qharis watapi kinsa kutita Tata Diospa ñawpaqempi rikhurenqanku. 18Uywa wañuchisqa jaywanasta qoshawaspa, yawarnintaqa ama levadurayoj t'antatawan khuska qowankichu, nitaj chay uywaj wiranta q'ayantinkama puchuchinkichu. 19Jallp'aykej ñawpaj kaj poqoyninta Señorniyki Tata Diospa wasinman apamunki. Ñuñushaj cabra uñastaqa ama mamampa lechempi chayachinkichu. 20Noqaqa angelniyta kachamusaj ñawpaqeykichejta rispa pusasunaykichejpaj, ñampitaj waqaychasunaykichejpaj, chayachisunaykichejpajtaj, ima jallp'atachus qankunapaj wakicherqani, chayman. 21Ama paypa ñawpaqenmanta t'aqakunkichejchu, manachayqa paypa nisqanta uyarinkichej. Ama paywanqa mana kasukoj jina purinkichejchu, imaraykuchus payqa chay imasta Noqaj sutiypi ruwanqa. Manachus jinata ruwankichej chayqa, juchasniykichejtapis mana pampachanqachu. 22Sichus cheqamanta paypa nisqasninta kasunkichej, ruwankichejtaj tukuy nisqasniyta chayqa, enemigosniykichejta castigasaj, llakichisajtaj, contraykichejta sayaykunku, chaykunata. 23Angelniy ñawpaqeykichejta rispa, chayachisonqachej amorreoj jallp'anman, heteojpaman, ferezeojpaman, cananeojpaman, heveojpaman, jebuseojpaman ima, mayqenkunatachus Noqa chinkachisaj ni uj puchuyojta, chaykunajman. 24Ama chay runas jina imatachus ruwayta yachasqankutapis ruwankichejchu. Ama diosninkukunaman qonqorikunkichejchu paykunata yupaychanaykichejpaj, manachayqa tukuyninta chinkachinkichej ni uj puchuyojta; jinamanta chay lantisninkuta, chay yupaychana rumisninkutapis t'unarankichej. 25Señorniykichej Tata Diosta yupaychankichej, Paytaj bendecenqa t'antaykichejta, yakuykichejtawan. Noqataj tukuy onqoykunata qankuna ukhumanta orqhosaj. 26Qankuna ashkha watasta kawsakunkichej. Nacionniykichejpeqa ni pi warmi manaraj nacekunampi wawata wijch'onqachu, nitaj mana wawayoj kayta atej warmispis kanqankuchu. 27Noqa manchachisaj, pawichisajtaj may llajtamanchus chayankichej, chaypi tiyakoj runasta. Enemigosniykichejqa qankunamanta ayqekonqanku. 28Ñawpaqeykichejta wayronqosta kachasaj, chaytaj manchachispa ñawpaqeykichejmanta qharqonqa heveosta, cananeosta, hititastawan. 29Chay runastaqa ñawpaqeykichejmanta mana uj watallapichu qharqosaj, ama chay jallp'a ch'inman tukunampaj, nitaj ima k'ita animalespis chaypi miraykuspa, mana walejta ruwasunaykichejpaj. 30Pisimanta pisi ñawpaqeykichejmanta paykunata qharqosaj, ashkhata miranaykichejkama, jinamanta pisimanta pisi chay jallp'asta jap'ikapunaykichejkama. 31Noqa churasaj maykamachus jallp'aykichej kananta: Puka Qochamantapacha filisteospa jatun qochankukama, ch'in pampamantapacha Éufrates Mayukama. Chay jallp'aspi tiyakojkunataqa makisniykichejman jaywaykusaj, qankunataj paykunata qharqonkichej. 32Ama paykunawanqa ni ima tratota ruwankichejchu, nitaj diosninkukunawampis. 33Chantá ama paykunata chay jallp'aykichejpi kakojta saqenkichejchu, ama Noqaj contrayta qankunata juchallichinankupaj, imaraykuchus diosninkuta yupaychayqa qankunapaj misk'ana kanqa.

will be added

X\