ÉXODO 21

1Kay leyesta paykunaman yachachinki: 2Sichus qan rantinki uj hebreo kamachita chayqa, sojta watasta sirvisonqa, chaymantataj qanchis kaj watapi llojsipullanqa ni imata pagaspa. 3Sichus sapallan yaykumorqa chayqa, sapallantaj llojsiponqa. Sitajchus warmiyoj yaykumorqa chayqa, warminwan khuska llojsiponqa. 4Sichus patronnin casarachin, chay warmipitaj churisnin, ususisnin tiyan chayqa, chay warmeqa wawasninwan patronnimpata kaponqa, chay kamachitaj sapallan llojsiponqa. 5Sichus chay kamachi mana munanchu sapallan ripuyta, warminta, wawasninta, patronnintawan munakusqanrayku chayqa, 6patronnin payta pusanqa Diospa ñawpaqenman. Chaypi punkuman, chayrí punku sayantasman k'askachispa, ninrinta jusk'onqa. Ajinamanta chay kamacheqa chay runajta kamachin kanqa wiñaypaj. 7Sichus pillapis ususinta vendenman kamachi kanampaj chayqa, mana llojsipullanqachu, imaynatachus qhari kamachis llojsipunku, jinataqa. 8Sichus patronnin mana paywan casarakuyta munan, mana payta gustasqanrayku chayqa, patronnin saqenqa wajkuna pagaspa, orqhokapunankuta. Chantaqa manataj waj llajtayojman vendeyta atinchu payta ch'awkiyasqanrayku. 9Sichus chay patronqa churinwan payta casarachin chayqa, ususinta jina qhawanqa. 10Sichus chay patrompa churin chay warmiwan casarasqa kashaspa waj warmiwan casarakun chayqa, warmillampuni kanqa; kikillantapuni mikhonqa, p'achallikonqa; qosanwampis kanallampuni tiyan. 11Sichus chay kinsa imasta mana ruwan chayqa, chay warmi ripuyta atin ni imata pagaspa. 12Pichus runa masinta wajtaspa wañuchejqa, paypis cheqamanta wañuchisqallataj kanqa. 13Sichus pipis wañuchinampaj mana mask'ashajtillan, Diospuni makinman chayachimunman chayqa, Noqa nisqayki maymanchus chay wañuchej pakakamunanta. 14Sichus pipis phiñakuspa runa masinta wañurparichin mana khuyaspa chayqa, altarniymanta ch'ipasqapis kachun, wañuchisqapuni kanan tiyan. 15Pichus tatanta, chayrí mamanta maqajqa wañuchisqa kachun. 16Sichus pipis runa masinta suwaspa, venden, chayrí paypa makillampi rikhurin chayqa, wañuchisqa kachun. 17Kikillantataj sichus pipis tatanta, chayrí mamanta maldecin chayqa, wañuchisqa kachun. 18Ichapis iskay runas phiñanakojtinku ujnin kaj sajmaspa, chayrí rumiwan ch'anqaspa parte wañusqata saqerparinman, chay parte wañusqataj umphuspa, puñunampi qhepakunman. 19Sichus pisimanta sayarispa tojnunwan puririn chayqa, chay pichus jinata ruwajqa mana juchachasqachu kanqa; chaywampis jampichinan tiyan. Chantá mashkha unaytachus mana imata ruwaspa karqa, chaymanta paganan tiyan. 20Sichus mayqen patrompis qhari kamachinta, chayrí warmi kamachinta k'aspiwan wajtarparinman, makimpitaj wañun chayqa, chay patrón castigasqa kanqa. 21Chantá sichus kawsanraj uj p'unchayta, chayrí iskay p'unchayta chayqa, mana castigasqachu kanqa, chay kamachi paypata kasqanrayku. 22Sichus iskay runas maqanakushaspa uj wijsallisqa warmita jap'irparichinkuman, chay warmitaj manaraj nacechikunampi wawanta wijch'urparinman mana wañuspalla chayqa, paganqanku mashkhatachus chay warmej qosan nin, chayta, juezkunaj nisqankuman jina. 23Sitajchus aswanraj kanman chayqa, pagasqa kanqa kawsaymanta kawsaywan, 24ñawimanta ñawiwan, kirumanta kiruwan, makimanta makiwan, chakimanta chakiwan, 25ruphasqamanta ruphasqawan, nanachisqamanta nanachisqawan, sajmasqamanta sajmasqawan. 26Sichus mayqempis qhari kamachinta, chayrí warmi kamachinta sajmaspa ñawinta lerq'oyachinman chayqa, ripojta saqenan tiyan, ñawinta jinata ruwasqanmanta. 27Sitajchus maqaspa kirunta phawachinman chayqa, ripojta saqenan tiyan, kirunta phawachisqanmanta. 28Sichus waka uj qharita, chayrí warmita wajraykuspa wañuchinman chayqa, rumiswan ch'anqaykuspa chay wakata wañuchinkichej, aychantataj ni pi mikhonqachu; chay wakayojtajrí chay wañojmanta mana juchachasqachu kanqa. 29Chantá sichus chay waka wajrakojpuni, jinamanta mayqentapis wajraspa wañuchin, dueñompis yachashaspa chay wakanta mana wisq'arqachu chayqa, chay wakaqa rumiswan ch'anqaykuspa wañuchinkichej; jinataj chay wakayojpis wañuchisqallataj kanqa. 30Sitajchus chay runa wañunan kashajtin kawsayninmanta preciota churanman chayqa, mashkhatachus nisqankuta paganan tiyan. 31Kikillantataj ruwanqanku, kay leyman jina, sichus chay waka uj churita, chayrí ususita wajranman chayqa. 32Sichus waka wajranman uj qhari kamachita, chayrí uj warmi kamachita chayqa, chay wakata rumiswan ch'anqaykuspa, wañuchichunku. Chay wakayojtaj mayqen kamachitachus wajrarqa, chaypa patronninman qopuchun kinsa chunka qolqeta. 33Sichus mayqempis uj pujyuta allaspa, mana kirpasqallata saqen, chaymantaj pejpa wakampis, chayrí burrompis urmaykunman chayqa, 34chay pujyuta allaj paganan tiyan chay wakayojman, chayrí burroyojman; chantá chay wañusqa uywataj paypaj qhepakaponqa. 35Sichus mayqempa wakan wajpa wakanta wajraspa wañuchinman chayqa, chay wajraj wakata vendespa qolqeta khuskanmanta rak'inakuchunku, chay wañusqa wakaj aychantapis kikillantataj. 36Sichus uj runaj wakan unaymantapuni wajrayta yachaj, dueñontaj chayta mana wisq'anchu, jinata ruwajta chayqa, chay wakayojman kawsashaj wakata qoponqa, paytaj chay wañusqa wakawan qhepakaponqa.

will be added

X\