ÉXODO 19

1Israelitasqa ch'in pampa Sinaí Orqoman chayarqanku, kinsa killapi Egiptomanta llojsisqankumantapacha. 2Refidimmanta llojsiytawan, israelitasqa Sinaí ch'in pampaman chayarqanku, chay Sinaí Orqo k'uchupitaj jarakorqanku. 3Chaymanta Moisesqa orqoman wicharerqa Dioswan parlamoj, imaraykuchus Tata Diosqa payta wajyamorqa chay orqomantapacha, nerqataj: Ajinata niy Jacobpa miraynin israelitasman: 4Qankuna rikorqankichej imastachus egipciosta ruwasqayta, imaynatatajchus apamorqaykichej maypichus kashani chayman, chayta, ankaspa lijrasnimpipis jamuwajchej karqa, ajinata. 5Kunanqa sichus tratoymanta nisqasniyta uyarinkichej, kasunkichejtaj chayqa, Noqapaj uj sumaj ayllu kankichej, tukuy ayllusmanta aswan sumaj, imaraykuchus Noqajtamin tukuy jallp'asqa. 6Tukuy qankunaqa kapuwankichej uj sumaj llimphuchasqa sacerdote aylluy. Kay imasta qan israelitasman willamuy, nispa nerqa Tata Diosqa. 7Chaymanta urayk'uspa, Moisesqa tantacherqa tukuy kurajkunata, paykunamantaj willarqa imastachus Tata Dios nisqanta. 8Chayta uyarispa, tukuynin israelitas nerqanku: Tata Diospa nisqasnintaqa kasusqayku, nispa. Moisestaj kutispa, chay jinata runas nisqankuta Tata Diosman willamorqa. 9Chantá Tata Diosqa payman nerqa: Qhawariy, Noqa jamusaj uj yanayarishaj phuyupi, qanwan parlasqayta israelitas uyarinankupaj, ajinamanta wiñaypaj parlasqaykita creenankupaj, nispa. 10Tata Dios nillarqataj: Rispa, israelitasman nimuy, kunan q'ayatawan llimphuchakunankuta, p'achasninkutapis t'ajsarakunankuta. 11Ajinata tukuyninku wakichisqa kachunku minchhapaj, imaraykuchus minchha Tata Dios urayk'amonqa Sinaí Orqoman tukuy israelitaspa rikunankuta. 12Orqoj muyuyninman señalesta churaramuy, ninkitaj ama ni pi orqoman wicharinanta, nitaj chay señalesman qayllaykunanta. Pichá chay orqoman chakinta churaykojqa wañuchisqa kanqa. 13Chay orqomanqa ni makillankutapis churaykuchunkuchu; pichus ajinata ruwajqa rumiswan ch'anqaykusqa kanqa, chayrí flechawan t'ojsisqa, uywaspis kachun, chayrí runaspis kachun. Chay orqomanqa wicharenqanku maypachachus pututu unayta waqamojtillan, nispa nerqa Tata Diosqa. 14Moisés orqomanta urayk'amorqa runasta wakichimoj. Paykunataj mayllakorqanku; p'achasninkutapis tukuyninku t'ajsakorqanku. 15Chantá runasman nillarqataj: Minchhapaj sumaj wakichisqa kanaykichej tiyan; chaykamaqa ni warmiykichejwampis kanaykichejchu tiyan, nispa. 16Minchhantin sut'iyamuyta rikhurimorqa lliuj lliujkuna, qhon qhonkuna, uj yanayarishaj phuyutaj orqoman tiyaykamorqa. Uj cornetaj waqaynin tukuypa jarasninman sinch'ita uyarikorqa mancharikuna jina. 17Moisestaj tukuyninkuta jarasninkumanta llojsicherqa Dioswan tinkukamunankupaj. Jinamanta tukuynin israelitas orqo k'uchukamalla chimparqanku. 18Tukuynin Sinaí Orqo q'oshñirerqa, imaraykuchus Tata Dios ninapi urayk'amorqa chay orqoman. Q'oshñeqa wicharisharqa hornomantapis wicharishanman jina, tukuynin orqotaj manchayta kharkatirerqa. 19Cornetaj waqaynintaj astawan astawan sinch'ita waqarqa. Chaypi Moisesqa Dioswan parlarqa, Diostaj payman kuticherqa qhon qhompis sonashanman jinata. 20Tata Diosqa Sinaí Orqoman urayk'amorqa, kikin orqo puntaman. Payqa Moisesta wajyarqa chayman wicharinanta, paytaj wicharerqa. 21Chantá Tata Diosqa Moisesman nerqa: Urayk'uspa, nimuy runasman señalesta ama pasaramunankuta Noqata rikuwayta munaspa; pajtataj chayta ruwaspa ashkhas wañurankuman. 22Jinallataj tukuy sacerdotespis llimphuchakuchunku Noqawan tinkukuyta munaspaqa. Manachayqa phirita ruwachikuwanqanku, nispa. 23Chaymanta Moisesqa Tata Diosman nerqa: Israelitasqa mana kay Sinaí Orqoman wicharimunkumanchu; Qan chayta kamachiwarqayku, niwarqankitaj: Señalesta churaray kay orqoj muyuyninman, Noqapaj t'aqasqa may santo kanampaj, nispa. 24Chaymantá Tata Diosqa Moisesman nerqa: Qan urayk'uy; qanwan, Aaronllawan wicharimunkichej. Sacerdoteswan, runaswanrí ama señalesta pasaspa, wicharimuchunkuchu kay Noqa kashani, chayman, manachayqa Noqa Tata Dios paykunata phirita ruwarparisaj, nispa. 25Moisestaj urayk'uspa, runasman kikillantataj willamorqa.

will be added

X\