ÉXODO 17

1Chay qhepata tukuynin israelitas Sin nisqa ch'in pampamanta purirerqanku, pisimanta pisi rispa Tata Diospa kamachisqanman jina. Jinata rispallapuni, chayarqanku Refidimman. Chaypi manallataj yaku karqachu ujyanankupaj. 2Israelitasqa phiñarikuspa, Moisesman nerqanku: Yakuta qowayku ujyanaykupaj, nispa. Moisestajrí paykunaman nerqa: Imaraykutaj phiñakuspa noqamanta yakuta mañakushawankichejri? Imaraykutaj Tata Diosta pruebaman churayta munankichejri? nispa. 3Chaywampis israelitasqa manchay yaku ch'akiywan kasharqanku, chayrayku Moisespa contranta nerqanku: Ima nispataj Egiptomanta orqhomuwarqayku yaku ch'akiymanta kaypi wañuchinawaykupajri, wawasniykutawan, uywasniykutawan? nispa. 4Jina kajtintaj, Moisesqa Tata Diosman qhaparikorqa: Imanasajtaj kay runaswanri? Pisimantawanqa rumiswan ch'anqaspachá wañuchiwanqanku ari, nispa. 5Chantá Tata Diosqa Moisesta nerqa: Israel runaspa ñawpaqenta pasay, wakin kurajkuna israelitasta pusarikuspa. Tojnuykita oqhariykukuspa mayqenwanchus mayuta wajtarqanki chayta, chaymantaqa Horeb chhankaman kachaykukuy. 6Noqa Horeb chhanka chaynejpi suyasqayki. Qanqa chay chhankata tojnuykiwan wajtanki, yakutaj chaymanta phullchimonqa runas ujyanankupaj, nispa. Moisesqa chayta ruwarqa israelitaspa kurajninkukuna qhawashajtinku. 7Chaymantaqa chay cheqata suticharqa Meriba sutiwan, chaypi israelitas Moisespaj rimasqankurayku. Chantaqa sutichallarqataj Masah sutiwan, imaraykuchus chaypi Diosta probarqanku: Noqanchejwanchu Tata Dios kashan, manachu? nispa. 8Israelitas Refidimpi kashajtinku, amalecitas llojsiykamorqanku paykunawan maqanakoj. 9Jinapi Moisesqa Josueman nerqa: Wakin qharista ajllay; chaykunawan rispa, amalecitaswan maqanakamuychej. Noqataj q'aya jatun orqo puntapi kamusaj, Diospa qowasqan tojnu makiypi jap'irisqa, nispa. 10Josueqa amalecitaswan maqanakamorqa Moisespa nisqanman jina. Chaykama Moiseswan, Aaronwan, Hurwan ima jatun orqo puntaman wicharerqanku. 11Moisés makinta pataman oqharishajtin, israelitas atipanayasharqanku amalecitasta; tumpata makinta urayk'uchejtintajrí, amalecitasqa israelitasta atipanayasharqanku. 12Jinata oqharisqampi Moisespa makisnenqa utiykorqa; chayta rikuspataj, uj rumita churaporqanku, chaypi tiyakunampaj. Aaronwan, Hurwantaj sapa uj makinmanta jap'erqanku. Ajinamanta Moisespa makisnenqa oqharisqallapuni karqa inti chinkaykunankama. 13Josuetaj chaykama amalecitasta espadawan atiparqa. 14Chantá Tata Diosqa Moisesta nerqa: Kaytaqa uj libropi qhelqay yuyarikunankupaj. Josuemantaj niy kayta: Noqamin amalecita runastaqa qonqasqata qonqachisaj, nispa. 15Moisestaj chaymantaqa uj altarta ruwaspa, suticharqa: Tata Diosqa Noqaj Banderaymin, nispa. 16Pay nillarqataj: Tata Diospa contranta amalecitas oqharikusqankurayku, Tata Diosqa juraspa nin: Maqanakupipuni kanqa amalecitaswan uj miraymanta uj miraykama.

will be added

X\