ÉXODO 16

1Elimmanta tukuynin israelitas puririllarqankutaj; chaymanta chayarqanku Sin ch'in pampaman. Chayqa kashan Elimwan Sinaí Orqowan, chay chawpipi. Chay karqa iskay kaj killapi, chunka phishqayoj kaj p'unchayña Egiptomanta llojsisqankumantapacha. 2Chay ch'in pampapi ujtawan rimayta qallarerqanku Moisespaj, Aaronpaj ima. 3Ajinata nerqanku: Allin kanman karqa Egiptopi Tata Diosqa wañurachinawayku. Chaypi aycha mankaykoqa ni jayk'aj pisejchu, chantapis t'antata mikhoj kayku sajsakunaykukama. Qankunaqa kay ch'in orqoman pusamuwayku yarqhaymanta wañuchinawaykupaj kay tukuyniykuta, nispa. 4Chantá Tata Diosqa Moisesman nerqa: Noqa t'antata patamanta parachimusaj qankunapaj. Israelitasqa sapa paqarin jatariytawan pallakonqanku, mashkhatachus uj p'unchay mikhunanku, chaypaj jinalla. Chaypi yachasaj kamachisqasniyta kasonqankuchus, manachus, chayta. 5Sojta kaj p'unchaytaj q'ayantin mikhunankupaj uj jinatawan pallakonqanku, nispa nerqa Tata Diosqa. 6Chaymantaqa Moiseswan, Aaronwan israelitasman nerqanku: Kunan manaraj inti yaykuyta yachankichej Tata Diosmin Egiptomanta orqhomususqaykichejta. 7Tutamanta rikunkichej Tata Diosqa may jina jatunchus kasqanta. Pay uyarimusunkichej Paypa contranta rimasqaykichejta. Noqaykoqa, pikunataj kayku contraykuta rimanaykichejpajri? nispa. 8Moisesqa nillarqataj: Manaraj inti yaykuyta Tata Dios aychata qosonqachej mikhunaykichejpaj, tutamantataj t'antata qosonqachej mikhunaykichejpaj sajsakunaykichejkama, imaraykuchus Tata Dios uyarisunkichej Paypa contranta rimasqaykichejta. Noqaykoqa, pikunataj kaykuri? Qankunaqa mana noqaykoj contraykutachu rimankichej, manachayqa Tata Diospa contranta rimashankichej. 9Chantá Moisesqa Aaronman nerqa: Niy tukuynin israelitasman paykuna Tata Diosman qayllaykunankuta, imaraykuchus Pay uyarimun contranta rimasqankuta, nispa. 10Aarón jinata israelitasman willashajtintaj, paykunaqa ch'in orqonejta qhawarerqanku. Chaypacha Tata Diospa jatun kaynenqa rikhurimorqapacha uj jatun phuyupi. 11Chantá Tata Diosqa Moisesta nillarqataj: 12Noqa uyarimuni israelitaspa rimasqankuta. Paykunaman niy kay jinata: Manaraj inti yaykuyta mikhunkichej aychata, tutamantataj t'antata mikhunkichej sajsakunaykichejkama; chaypi yachankichej Noqa Tata Dios qankunaj Diosniykichej kasqayta. 13Chantá manaraj inti yaykushajtin, puna yuthusqa tukuy jarasninkuman junt'aykamorqanku, sut'iyaytataj rikhurerqa chhullalla jarasninkoj muyuynimpi. 14Chhulla ch'akipojtintaj, tukuy ch'in pampaspi rikhurerqa juch'uy mujitus jinalla, tukuy pampaspi chhulla rit'iman rijch'akoj. 15Chayta rikuspa, israelitasqa ninakorqanku ujkuna ujkunawan: Imataj kayri? nispa, imaraykuchus mana yacharqankuchu imaschus kasqanta. Chaymanta Moisesqa paykunaman nerqa: Kayqa t'anta, mayqentachus Tata Dios qosunkichej mikhunaykichejpaj, chay. 16Kaytaqa Tata Dios kamachisunkichej: Sapa ujniykichej pallakuychej mashkhatachus sapa ujniykichej mikhunaykichejpaj jina, chantaqa mashkhachus sapa jarapi kankichej, chayman wakinampaj jina, chantapis sapa ujpaj iskay kilota jinalla. 17Israelitasqa ajinata ruwarqanku. Wakenqa ashkhata pallaykorqanku, wakintaj pisillata. 18Medidaman jina ashkhata pallakojmampis mana puchorqachu, nitaj piserqachu pisillata pallakojmampis. Sapa ujninku pallakorqanku mashkhatachus mikhunankupaj jinalla. 19Chaymantá Moisesqa nillarqataj: Ama mayqenniykichejpis puchuchinkichejchu q'ayantimpaj, nispa. 20Chaywampis wakenqa Moisesta mana kasorqankuchu; q'ayantin mikhunankupaj puchuchikorqanku, chay puchuchisqankutaj khuruykorqa, asnaykorqataj. Chaymanta Moisesqa paykunapaj phiñakorqa. 21Chaymantaqa sapa ujninku pallakoj kanku sapa paqarin mashkhatachus mikhuyta yachasqankuman jinalla. Chay pampapi puchojtaj inti q'oñimojtinkama, unuyarparipoj. 22Sojta kaj p'unchaypitaj uj jinatawan pallakoj kanku iskay medidaspi sapa ujninkupaj. Chaymantaqa israelitaspa tukuy kurajninkukunataj Moisesman jamuspa, willaj kanku mashkhatachus pallakusqankuta. 23Moisestaj nerqa: Tata Dios kamachin kayta ruwanaykichejta. Q'ayaqa samarikuna p'unchay Tata Diospaj t'aqasqa. Kunan chayachikuychej imatachus chayachinaykichej kajta; t'impuchiychej imatachus t'impuchinaykichej kajta. Chantaqa ima mikhunachus puchun, chaytapis q'ayapaj waqaychaychej. 24Moisespa nisqanman jina ima mikhunachus puchoj, chayta waqaychakorqanku q'ayantin mikhunankupaj; chayqa manaña khurorqachu, nitaj asnaykorqachu. 25Chaymanta Moisesqa nerqa: Chaytaqa kunan mikhunkichej, imaraykuchus kay p'unchayqa Tata Diospa p'unchaynin, samarikuna p'unchay; kay p'unchaypi jinaqa kay mikhunata campopi mana tarinkichejchu. 26Sojta p'unchaypi sapa paqarin pallakullankichej. Qanchis kaj p'unchayrí Tata Diospata; chaypajqa mana imapis tarikonqachu. 27Jinapi wakin israelitasqa qanchis kaj p'unchaypi llojserqanku pallakoj, nitaj imatapis tarerqankuchu. 28Chaymantá Tata Diosqa Moisesta nerqa: Mayk'ajkamataj mana kasuwankichejchu kamachisqasniyta, yachachisqasniyta imari? 29Uyariwaychej: Noqa Tata Diosqa uj samarikuna p'unchayta qoykichej. Chayrayku sojta kaj p'unchaypi qoykichej t'antata iskay p'unchaypaj pallanaykichejpaj. Ajinata sapa ujniykichej jarasniykichejpi qhepakuychej; qanchis kaj p'unchaypi ama llojsiychejchu, nispa. 30Chantá israelitasqa qanchis kaj p'unchaypi samarikorqanku. 31Israelitasqa chay t'antata suticharqanku Maná nispa. Chay t'antaqa yurajsitus karqa, culantro muju jina, misk'itaj, misk'iyoj t'antapis kanman jina. 32Chaymanta Moisesqa nerqa: Kaytaqa Tata Dios kamachiwanchej: Iskay kilo yaykoj medidaman kay Maná t'antata waqaychaychej mirayniykichej yachanankupaj ima t'antatachus qankunaman ch'in pampapi mikhuchisqayta, Egipto jallp'amanta qankunata orqhomushaspa, nispa. 33Chaymanta Moisesqa Aaronman nerqa: Iskay kilo yaykoj mankitaman junt'aykuchiy Maná nisqa mikhunata. Chaytataj Tata Diospa ñawpaqenman churanki, waqaychasqa kanampaj mirayninchej rejsinankupaj, nispa. 34Aaronqa kikinta ruwaspa, Tata Diospa ñawpaqenman churarqa, maypichus ley kanan karqa, chayman, jallch'asqa kanampaj, Tata Diosqa Moisesman kamachisqanman jina. 35Israelitasqa Maná nisqa t'antata mikhorqanku tawa chunka watasta, may jallp'aspichus runas tiyakorqanku, chayman chayanankukama. Chay t'antata mikhorqanku Canaán jallp'aj lindesninman chayanankukama. 36Chay medidaqa karqa efapi chunka kajmanta ujnin kaj.

will be added

X\