1 Tata Diosqa Moisesta nerqa: 2 Noqapaj t'aqay Israel ukhupi tukuy ñawpajta nacejkunata: Runaspa kuraj kaj churisninkuta, jinallataj uywasninkoj phiwi uñasninkuta. Chaykunaqa Noqajta kanku, nispa. 3 Moisestaj runasman nerqa: Kay p'unchaymanta yuyarikuychej, mayk'ajchus Egiptomanta Tata Dios orqhomusorqachej jatun atiyninwan wata runallapuni kanaykichejmanta, chay p'unchaymanta. Chayrayku chay p'unchaykunapi ama mikhuychejchu levadurayoj t'antataqa. 4 Qankuna llojsimunkichej Abib killapi. 5 Kay kikin killallapitaj yuyarikuna fiestata Tata Diospaj ruwankichej, maypachachus Tata Dios chayachisonqachej lechewan misk'iwan purishaj, chay jallp'aman, chaypacha. Chay jallp'apeqa kunan tiyakushanku: Cananeos, heteos, amorreos, heveos, jebuseos ima, mayqentachus Tata Dios juraspa nerqa tatasniykichejman qonanta, chay jallp'api. 6 Qanchis p'unchayta mikhunkichej mana levadurayoj t'antata, qanchis kaj p'unchaypitaj Tata Diospaj fiestata ruwankichej. 7 Qanchis p'unchay junt'ata mana levadurayoj t'antata mikhunkichej, chantaqa mana maypipis kananchu tiyan levadurayoj t'antas chay p'unchaykunapi, nitaj levadurapis tarikunanchu tiyan tukuynin jallp'api. 8 Chantaqa chaypacha wawasniykichejman willankichej: Kaytaqa ruwashanchej yuyarikuspa, imaynatachus Tata Dios Egiptomanta orqhomuwarqayku, chayta. 9 Kayqa kanqa makiykichejpi, manachayqa frenteykichejpi k'askasqa uj señal jina yuyarikunaykichejpaj Tata Diospa leynin simiykichejpi kanampaj, imaraykuchus Tata Dios may jatun atiyninwan Egiptomanta orqhomusorqachej. 10 Chayrayku kaytaqa ruwanaykichej tiyan sapa wata, ima killapichus ruwanaykichej kashan, chaypi. 11 Canaán jallp'aman Tata Dios chayachisojtiykichej, mayqentachus tatasniykichejman, qankunamampis jurarqa qonasuykichejta, chayman chayaspa, 12 Tata Diospaj t'aqankichej tukuy kuraj kaj churisniykichejta, jinallataj tukuy uywasniykichejpa phiwi uñasninkutapis. Orqos kajkunaqa Tata Diospata kanqa. 13 Sichus china burrojta phiwi uñan kanqa chayqa, corderitotawan cambianki. Mana jinata ruwasparí, chay burro uñata kunkanmanta q'ewispa, wañuchinki. Jinallataj kuraj churisniykichejmantapis preciota pagaspa jap'ikapullankichej. 14 Maypachachus wawasniykichej tapusonqachej: Imatataj kay niyta munanri? nispa chaypachaqa, ninkichej: Kayqa niyta munan, ñawpa tatasninchej israelitasta Tata Dios orqhomusqanta jatun atiyninwan Egiptomanta, maypichus wata runas karqanku, chaymanta. 15 Chaypacha Tata Diosqa Faraonpa sonqonta rumiyacherqa, mana ñawpa tatasninchej israelitasta llojsimojta saqenampaj. Jinataj Tata Diosqa Egiptopi tukuy kuraj kaj churista wañuracherqa, jinallataj uywaspa phiwi uñasninkutapis. Chayrayku Tata Diosman uywaspa phiwi uñasninkuta jaywayku, kuraj kaj churej cuentanmantataj uj preciota pagayku. 16 Chayrayku makiykichejpi, frenteykichejpi ima uj señal jina kasonqachej, yuyarikunaykichejpaj Egiptomanta Tata Dios may atiyninwan ñawpa tatasninchej israelitasta orqhomusqanta. 17 Israelitasta Faraón kacharerqa chaypacha, Diosqa israelitasta mana filisteospaman rej ñantachu pusarqa, mayqenchus cheqan ñan karqa, chayta, imaraykuchus Pay nerqa: Paykunawan maqanakoj soldadosta llojsimojta rikuspa, israelitasqa Egiptoman kutiriyta munankuman, nispa. 18 Chayrayku Diosqa israelitasta muyurichimorqa ch'in pampanejta, Puka Qocha nisqaman rej ñannejta. Israelitasqa Egiptomanta sumaj wakichisqas llojserqanku maqanakuman llojsej soldados jina. 19 Moisesqa Josejpa tullusninta aparqa, imaraykuchus Joseqa israelitasta jurachispa, nisqa: Dios watukusonqachej, chaypacha tullusniyta apapuwankichej kaymanta ripushaspa, nispa. 20 Israelitasqa Sucotmanta llojsispa, jarakorqanku Etampi, ch'in pampaj qallarikuynimpi. 21 Tata Diosqa paykunaj ñawpaqenta rerqa p'unchaypi jatun chhoqo phuyu ukhupi paykunata pusaspa, tutantaj nina k'anchaypi ama ñanta pantanankupaj, chantapis tuta p'unchay rinankupaj. 22 Ni jayk'ajpis paykunaj ñawpaqenmanta phuyu oqharikorqachu p'unchay rishajtinku, nillataj tutampis nina k'anchay oqharikorqachu paykunaj ñawpaqenkumanta.
