ÉXODO 11

1Tata Diosqa Moisesta nisqa: Uj castigotawan Faraonman, Egipto runasmanwan apamusaj. Chaymantaraj qankunata kaymanta rejta saqesonqachej. Cheqamanta pay kikin kaymanta qharqosonqachej. 2Kunantaj niy israelitasman, qharisman warmisman, sapa uj qayllankupi kaj egipciosmanta mañakunankuta imaschá qolqemanta, qorimanta ruwasqa kashan, chay imasta, nispa. 3Tata Diosqa may k'achasman tukucherqa egipciosta israelitaspa ñawpaqempi. Chantapis Faraonpa kamachisnin Moisesta qhawarqanku may yachayniyoj runapaj, jinallatataj tukuynin Egiptopi kaj runaspis yuyarqanku. 4Chantá Moisesqa Faraonta nillarqataj: Ajinatamin nin Tata Dios: Chawpi tutata jamuspa, tukuynin Egiptonta pasasaj. 5Chaypacha wañonqanku egipciospa tukuy kuraj kaj churisninku, qallarispa kamachina tiyanapi tiyasqa Faraonpa kuraj kaj churinmantapacha; warmi kamachi molinota muyuchejpa kuraj kaj churimpis wañullanqapuni. Chantá wañullanqankutaj tukuy uywaspa phiwi uñasninkupis. 6Egiptopeqa manchay waqay kanqa tukuynimpi; chayqa ni jayk'aj karqachu, nitaj jayk'ajpis kanqachu. 7Qankuna yachanaykichejpaj imaynatachus Tata Dios waj jinamanta egipciosta qhawasqanta, israelitastataj waj jinamanta, israelitastaqa ni alqollapis ayñanqachu, nitaj israelitaspa ima uywallantapis. 8Chaymantaqa tukuy kuraj kamachisniyki jamuwanqanku, ñawpaqeyman qonqoriykukuspataj, niwanqanku: Ripuychej, qan, chantá pikunachá qanwan kashanku, chaykunapis, nispa. Chay qhepantataj noqaqa ripusaj, nispa nerqa Moisesqa. Chantá may phiñasqa llojsiporqa Faraonpa ñawpaqenmanta. 9Chaymanta Tata Diosqa Moisesta nerqa: Faraonqa manapuni kasusonqachejchu. Pay ajina kasqanrayku, t'ukuna ruwanasniy ashkhayanqa kay tukuynin Egiptopi. 10Moiseswan, Aaronwan chay t'ukuna imasta ruwasqanku Faraonpa ñawpaqempi. Tata Diostajrí Faraonpa sonqonta rumiyachisqa, chayrayku israelitasta mana saqerqachu nacionninmanta llojsinankuta.

will be added

X\