ÉXODO 1

1Kaykuna kanku Israelpa churisnimpa sutisnin, pikunachus Jacobwan khuska sapa uj familiantin Egiptoman yaykojkunajta: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, Aser ima. 5Jacobpa miraynin tukuynimpi karqanku qanchis chunka chaypacha. Joserí Egiptopiña karqa. 6Josewan, wawqesninwan wañuporqanku, jinallataj paykunaj mitasninkupis. 7Israelitasqa ashkha kasqankuman jina ashkhata mirarqanku, may atiyniyojtaj karqanku; jinamanta paykunaqa Egiptoman junt'aykorqanku. 8Chay qhepata waj reyñataj Egiptopi sayarerqa; payqa Joseta mana rejserqachu. Chayrayku payqa kamachisninta nerqa: 9Qhawaychej, israelitasqa noqanchejmanta aswan ashkha kanku. 10Chayrayku kunan noqanchejqa sumaj yuyaywan imatapis ruwananchej tiyan, paykuna ama astawan miranankupaj. Manachayqa mayk'ajpis wañuchinaku maqanaku kajtin, enemigosninchejwan tantakuspa atipawasunman, jinaspataj ripunkuman, nispa. 11Chantá Egiptomanta kajkunaqa jilaqatasta churarqanku, israelitasta jasut'ispalla mayta trabajachinankupaj. Paykunawan iskay llajtasta ruwacherqanku Pitonta, Ramsestawan. Chay llajtasqa karqa rey Faraón poqoykunata jallch'achinampaj. 12Jinata astawan jasut'ispa trabajachishajtinkupis, israelitasqa miraykuspa, astawan ashkhayarqanku. Chayrayku egipciosqa astawan manchachikorqanku israelitasmanta. 13Jinapi egipciosqa israelitasta maytapuni ñak'aricherqanku, wata runasta jina trabajachispa. 14Kay jinata maytapuni llakichispa, israelitasta trabajacherqanku: T'uruta sarucherqanku, ladrillosta ruwacherqanku, wakintaqa campospi llank'acherqanku, wakintataj mayta jasut'ispa waj trabajosman churarqanku. 15Chantapis Egiptomanta reyqa hebreaspa parterasninku Siframan, Fuamanwan nerqa: 16Hebreo warmisqa wawata nacechikushajtinku sichus yanapankichej chayqa, allinta qhawankichej. Qhari wawa kajtenqa, wañuchinkichej; warmi kajtinrí, saqellankichej kawsajta, nispa. 17Chaywampis parterasqa Diosta manchachikuspa, Egiptomanta reypa nisqanta mana kasorqankuchu; saqellarqanku qhari wawasta kawsajta. 18Reytaj payta mana kasusqankuta yachaytawan, parterasta wajyachispa, nerqa: Imaraykutaj qankuna kamachisqayta mana kasuspa, qhari wawasta kawsajta saqellankichejri? nispa. 19Paykunataj Faraonman kuticherqanku: Hebreo warmisqa mana egipcio warmis jinachu kanku, imaraykuchus paykunaqa may sinch'i warmis kanku; manaraj noqayku parteras chayashajtiyku, ñapis nacechikunkuña, nispa. 20Ajinata ruwasqankurayku Dios yanaparqa chay parterasta, israelitastaj astawan mirarqanku, astawantaj kallpachakorqanku. 21Diosqa parterasta mayta yanaparqa Payta manchachikusqankurayku, familiasninkuta ashkhayachispa. 22Chaymanta Faraonqa tukuy egipcio runasman kamacherqa: Kunanqa hebreo warmismanta nacekoj tukuy qhari wawasta Nilo Mayuman wijch'umuychej, warmi wawastatajrí saqellaychej kawsajta, nispa.

will be added

X\