ESTER 6

1Chay kikin ch'isipacha reyqa mana puñuyta aterqachu. Chayrayku kamachisninman nerqa, imatachus kamachishaspa ruwasqasninmanta willaj librota apamuspa leenankuta. 2Chay libropitaj qhelqasqata tarerqanku, Mardoqueoj willasqanta, kamachina wasejpa punkunta qhawajkunaqa reyta wañuchinankupaj wakichikushasqankumanta. Chay kamachisqa Bigtanwan, Tereswan karqanku. 3Chaymantataj reyqa nerqa: Chay jinata Mardoqueo ruwasqanmanta, ima t'inkata qospa payta jatuncharqanchejri? nispa. Chay kamachisnintaj reyman nerqanku: Mana imatapis paypajqa ruwapunchejchu, nispa. 4Amanrí chaypachapuni kamachina wasi patioman yaykumusharqa reymanta mañakunampaj Mardoqueota warkhuchinanta chay sipinata ruwachisqampi. Chantá reyqa kamachisninta taporqa: Pitaj chay patiopi kashan? nispa. 5Kamachisnintaj reymanqa nerqanku: Patiopeqa Amán kashan, nispa. Reytaj nerqa: Yaykumuchun, nispa. 6Amán yaykojtintaj, reyqa payta tapurerqa: Imatataj ruwana kanman, pi runatachus reyqa pataman oqhariyta munashan, chaypajri? nispa. Amantaj sonqompi nerqa: Pitataj reyqa chay jinata ruwanman, noqamanta astawanri? nispa. 7Chantá Amán kuticherqa: Pi runatachus reyqa pataman oqhariyta munashan, 8chaypajqa reypa churakunan p'achata, reypa purinan caballotawan, reypa umampi kashan chay pillutawan ima apamuchunku. 9Jinataj chay p'achata, caballotawan ima, reypa mayqen kamachinchus aswan kuraj kaj kashan, chayman jaywachunku. Chay runataj p'achallichichun, pitachus reyqa jatunchayta munan, chay runaman. Chantá reypa caballonman lloq'aykuchispa, plazanta muyurichimuchun, ñawpaqentataj richun sinch'ita qhaparispa: Ajina ruwakun, pitachus reyqa jatunchayta munan, chay runapajqa, nispa. 10Chantá reyqa Amanta nerqa: Usqhayllata caballoytawan, p'achaytawan jap'ispa, nisqaykiman jina ruway judío Mardoqueowan, pichus kamachina wasi punkupi kunan tiyasqa kashan, chaywan. Chay nisqaykitaqa kikintapuni ruway, ama imatapis qonqaspa, nispa kamacherqa Asueroqa. 11Jinapi Amanqa reypa p'achanta orqhomuspa, Mardoqueota p'achallicherqa, caballoman lloq'aykuchispataj, llajtaj plazanta muyurichimorqa. Payqa Mardoqueoj ñawpaqenta qhaparispa rerqa: Ajina ruwakun, pitachus reyqa jatunchayta munan, chay runapajqa, nispa. 12Ajinata muyurimuytawan, Mardoqueoqa kamachina wasi punkuman kutiporqa. Amantajrí usqhay usqhayta wasinman kachaykukorqa may llakisqa, uyan suk'umpasqa. 13Wasimpitaj Amanqa warmin Zeresman, tukuy kawsaqesninman ima willarqa imaschus payta qhatirisqanta. Yachayniyoj kawsaqesnin, warmin Zerespiwan nerqanku: Sichus chay judiospa mirayninkumanta kaj, judío Mardoqueoj ñawpaqempi urmayta qallarinki chayqa, manapuni atipawajchu, manachayqa urmallankipuni chay runaj ñawpaqempi, nispa. 14Ajinata manaraj parlayta tukushajtinku, reypa kamachisnin chayaykamorqankupacha Amanta pusanankupaj, Esterpa sumaj mikhuyta wayk'uchisqanta mikhumunankupaj.

will be added

X\