1 Noqaqa Señorninchejrayku preso kaspa, tukuy sonqo niykichej, wajyasqa karqankichej, imaynachus purina kasqanman jina purinaykichejta. 2 Llamp'u sonqo kaywan, k'umuykukuywantaj purajmanta paciencianakuspa, munakuypi kawsakuychej. 3 K'uchi kaychej Espiritupi ujlla kasqaykichejta waqaychanaykichejpaj, allin kawsaypi uj sonqolla kaspa. 4 Tiyan uj cuerpolla, uj Espiritulla, jinallataj uj suyakuyllaman wajyasqa kankichej. 5 Tiyan uj Señorlla, uj creeylla, uj bautismolla. 6 Diospis uj k'atallataj tiyan, tukuypa Tatanku. Payqa tukuy ima patapi, ruwanantaqa tukuy runasnejta ruwan, tukuy runas ukhupitaj tiyakun. 7 Chaywampis Cristoqa sapa ujninchejman ruwanapaj atiyta qowanchej munasqanman jina. 8 Chayrayku Diosmanta Qhelqasqapi nin: Pataman wicharerqa presochasqasta apaspa, runasmantaj qhasilla sumaj imasta qorqa, nispa. 9 Wicharerqa nispaqa, manachu niyta munan Pay ñawpajta kay pachaj aswan ukhunkama urayk'usqanta? 10 Pichus urayk'amorqa, Payllataj janaj pachaj patanman wicharerqa tukuy kaj chhikaman junt'aykunampaj. 11 Paymin wakinkunaman atiyta qorqa apóstoles kanankupaj, wakinmantaj profetas kanankupaj. Wakinman atiyta qollarqataj evangeliota willarajkuna kanankupaj, wakinmantaj yachachej michejkuna ima kanankupaj. 12 Chay tukuyta qorqa Diospa ajllakusqasninta sumajta wakichinankupaj, ajinamanta Diospa ruwananta ruwayta atinankupaj, Cristoj Iglesian wiñachisqa kanampaj. 13 Ajinamanta tukuyninchej creeypi ujchasqa kaspa, Diospa Churinta allinta rejsispataj, wiñay tukusqa runa jina kasunchej, imaynachus Cristo kasqanman jina. 14 Ajina wiñasqa kaspa, manaña wawas jinachu kasunchej, waj yachachiykunawan wayrawan jina kayman jaqayman apaykachachikuspa. Chaykunataqa runaslla wakichinku, misk'i parlaywan ch'awkiyaspa pantachinankupaj. 15 Manachayqa cheqa kajta munakuywan parlaspa, tukuy imapi wiñananchej tiyan Cristopi, imaraykuchus Paymin cuerpoj umanqa. 16 Paymanta tukuy cuerpoqa allin wakichisqa kashan, sumaj ujchasqa, sumaj t'inkisqataj ankuswan. Ajinamanta sapa iman maychus ruwananta junt'ashajtin, tukuy cuerpoqa munakuypi wiñan, purajmanta yanapanakuspa. 17 Kayta ari niykichej; anchatapuni mañakuykichej Señorpa sutimpi: Amaña mana judío kajkuna jinaqa kawsaychejchu. Paykunaqa qhasi manakaj yuyayninkuman jina kawsanku. 18 Yuyayninku laqhayasqa kajtin, Diospi kaj kawsaymanta karunchasqa kanku, mana yuyayniyoj, rumi sonqos kasqankurayku. 19 Paykuna manaña imamanta p'enqakuspa, millay kawsayman qokunku, imaymana ch'ichi ruwaywan mana sajsayta atispa. 20 Qankunarí, mana jinatachu Cristomanta yachaqakorqankichej. 21 Qankunaqa cheqamanta Payta uyarerqankichej, yachachisqataj karqankichej Jesuspi cheqa kaj kasqanman jina. 22 Ñawpa sajra kawsayniykichejpi karqa, chay mawk'a runamanta t'aqakuychej, imaraykuchus chayqa sajra munaynimpa atipasqan, ch'awkiyasqantaj. 23 Qankunaqa mosojman tukuychej sonqoykichejpa yuyaynimpi. 24 Chay mosoj runa kaywan p'achawan jina p'achallikuychej, mayqenchus Diosman jina ruwasqa, cheqan kaypi, cheqamanta santo kaypiwan kashan, chaywan. 25 Chayrayku llullakuyta saqespa, sapa ujpis cheqa kajta parlaychej runa masisniykichejwan, imaraykuchus ujkuna ujkunawan uj cuerpollamanta kanchej. 26 Phiñakuspaqa, ama juchallikuychejchu, nitaj inti yaykunankama phiñasqallapuni kaychejchu. 27 Nillataj Kuraj Supaytapis uyariychejchu. 28 Ñawpajta pichus suwayta yachajqa amaña suwachunchu; manachayqa makisninwan allin kajta ruwaspa trabajachun, mana kapuyniyojman imachus pisisqanta qoriyta atinampaj. 29 Simiykichejmantapis ama ima sajra parlaykuna llojsichunchu, manachayqa maychus kajta parlaychej, uyarisojkuna chaywan yanapasqa kaspa, Diospi wiñanankupaj. 30 Diospa Espíritu Santonta ama llakichiychejchu, imaraykuchus Paywan sellasqa kankichej jaqay jamoj p'unchaypi wiñay kawsaypaj kacharichisqa kanaykichejkama. 31 Qankunamanta wijch'uychej tukuy jaya sonqo kayta, phiñakuyta, rabiakuyta, qhaparqachayta, runaj contranta sajra parlakuyta, tukuy sajra yuyaytawan. 32 Manachayqa ujkuna ujkunawan k'achas kaychej, khuyakuyniyojtaj. Sapa uj perdonanakuychej, imaynatachus Diospis Cristopi perdonasorqachej, ajinata.
