1 Kay pachapi uj mana allin imata rikullanitaj, chaytaj runas ukhupi kallampuni: 2 Diosqa runasman qon qhapajyayta, tukuy imasta, allimpaj qhawasqa kayta, imastachus munasqanta ima. Chay tukuywampis Diosqa mana chay runata saqenchu chay imaswan kusikunanta, manachayqa waj runasraj chay kapuyninwan kusikunku. Chayqa jatun llakiy, qhasi manakajtaj. 3 Runaqa pachaj wawasniyojpis kachun, unaytapis kawsachun, unay watasniyojpis kachun, sichus allin imaswan mana sajsakorqa, nitaj allimpi p'ampasqa karqa chayqa, noqaqa nini, uj sullusqaraj paymanta nisqaqa aswan allin kasqanta. 4 Chay wawaqa qhasi manakajta nacen, laqhayaymantaj ripun, jinataj sutenqa laqhayaypi p'ampasqa kashan. 5 Payqa mana intita rikunchu, nitaj imatapis yachallampischu. Chaywampis payqa aswan misk'ita samarikun, chay runamanta nisqaqa, 6 pichus iskay waranqa watasta kawsanman tukuy kapuyninwan, chay kapuyninwan mana kusikuspalla, chay runamanta. Chay tukuywampis manachu tukuyninku rinku chay cheqallamantaj? 7 Runaj tukuy trabajasqanqa mikhunallampaj; chaywampis manapuni sonqo junt'asqa kayta atinchu. 8 Yachayniyoj kayqa imapajtaj aswan walej kanman wapu kanamanta nisqaqa? Wajcha runaqa ima allintataj tarin wajkunaj ñawpaqenkupi allinta kawsayta yachaspapis? 9 Rikunapuni aswan allin qhasi manakajta imatapis munapayaspa yuyanallamanta nisqaqa. Chaypis qhasi manakajllataj, wayra jap'iyta munay jinalla. 10 Imaschus kunan kajqa ñawpajtaña sutichasqa karqa, yachakuntaj runalla kasqan. Chayrayku paymanta aswan atiyniyojwanqa mana pipis tinkuyta atinmanchu. 11 Anchata parlayqa, yanqha imasman apan. Chaywantaj runaqa mana imatapis tarinchu. 12 Cheqamanta mana pipis yachanchu, chay pisi p'unchay qhasi kawsaynimpi runapajqa imaschus allin kananta, imaraykuchus chay tukuy qhasi manakaj ruwasqanqa llanthu jinalla chinkarin. Pitaj runaman willanqa imachus kay pachapi kananta wañupusqanmanta qhepaman?
